' ആസിഫ് ഒരിക്കലും എന്നെ ഉപദേശിച്ചിട്ടില്ല, ഞാന്‍ അദ്ദേഹത്തെ അനുകരിക്കാന്‍ ശ്രമിക്കുന്നുവെന്ന് പറയാന്‍ യാതൊരു മടിയുമില്ല' ; അസ്‌കര്‍ അലി

മലയാളികളുടെ പ്രിയപ്പെട്ട നടനാണ് ആസിഫി അലി. ആസിഫിന്റെ സഹോദരന്‍ അസ്‌കര്‍ അലിയും പ്രേക്ഷകര്‍ക്ക് സുപരിചിതനാണ്. ഹണി ബീ 2.5, ജീം ബൂം ബാ തുടങ്ങിയ സിനിമകളില്‍ അസ്‌കര്‍ അലി അഭിനയിച്ചിട്ടുണ്ട്. ആസിഫിന്റെ സിനിമാ തിരഞ്ഞെടുപ്പുകളില്‍ അടുത്ത കാലത്തായി മാറ്റം സംഭവിച്ചിട്ടുണ്ടെന്നും ചേട്ടനെ അനുകരിക്കാന്‍ ശ്രമിക്കാറുണ്ടെന്ന് പറയാന്‍ തനിക്ക് യാതൊരു മടിയുമില്ലെന്ന് പറയുകയാണ് അസ്‌കര്‍.

സിനിമാ എക്സ്പ്രസിന് നൽകിയ അഭിമുഖത്തിലാണ് അസ്കർ ഇക്കാര്യം പറഞ്ഞത്. "ഞാൻ പത്താം ക്ലാസിൽ പഠിക്കുമ്പോഴാണ് ഇക്ക സിനിമ ചെയ്യാൻ തുടങ്ങിയത്. അതുവരെ ഞാൻ വിചാരിച്ചിരുന്നത് സിനിമയുമായി ബന്ധമുള്ളവർ മാത്രമാണ് അതിൽ പ്രവർത്തിക്കുന്നത് എന്നാണ്. തീർച്ചയായും, മറ്റെല്ലാ കുട്ടികളെയും പോലെ, അതിന്റെ തിളക്കവും ഗ്ലാമറും എന്നെയും ആകർഷിച്ചു.

പക്ഷേ എന്നെ സംബന്ധിച്ച് അതെന്നും ഒരു വിദൂര ലോകമായിരുന്നു. ഇക്കയുമായി സിനിമകളെക്കുറിച്ച് അധികം ചർച്ച ചെയ്യാറില്ല. പക്ഷേ, അദ്ദേഹം എങ്ങനെയാണ് തിരക്കഥകൾ കേൾക്കുന്നത്, എങ്ങനെയുള്ള പ്രൊജക്ടുകളാണ് അദ്ദേഹം തിരഞ്ഞെടുക്കുന്നത്, അടുത്തകാലത്തായി എങ്ങനെയാണ് അദ്ദേഹം സെലക്ടീവ് ആകുന്നത് എന്നൊക്കെ ഞാൻ ശ്രദ്ധിക്കാറുണ്ട്.

അദ്ദേഹത്തിന്റെ സമീപനത്തിൽ ഇപ്പോൾ ശ്രദ്ധേയമായ മാറ്റമുണ്ടായിട്ടുണ്ട്. ഞാൻ അദ്ദേഹത്തെ അനുകരിക്കാൻ ശ്രമിക്കുന്നുണ്ടെന്ന് പറയുന്നതിൽ എനിക്ക് യാതൊരു മടിയുമില്ല. ആസിഫ് ഒരിക്കലും എന്നെ ഉപദേശിച്ചിട്ടില്ല. എന്റെ പ്രൊജക്ടുകളിലോ സ്ക്രിപ്റ്റ് തിരഞ്ഞെടുപ്പിലോ ഒന്നും ഇക്ക ഒരിക്കലും ഇടപെടാറില്ല.

പരാജയങ്ങൾ പരിഗണിക്കാതെ, അനുഭവത്തിലൂടെ മാത്രമേ നമുക്ക് മികച്ച രീതിയിൽ മുന്നേറാൻ കഴിയൂ എന്നാണ് അദ്ദേഹം വിശ്വസിക്കുന്നത്".- അസ്കർ പറഞ്ഞു. സംഭവം അധ്യായം ഒന്ന് എന്ന ചിത്രമാണ് അസ്കറിന്റേതായി ഇപ്പോൾ തിയറ്ററുകളിലെത്തിയിരിക്കുന്ന ചിത്രം.