സംസ്ഥാനത്തെ സ്വർണ്ണവിലയിൽ വൻ കുതിപ്പ്; 3 ദിവസത്തെ ഇടിവിന് ശേഷം വിപണിയിൽ തിരിച്ചടി

സംസ്ഥാനത്തെ സ്വർണ്ണവിലയിൽ ഇന്ന് വൻ കുതിപ്പാണ് രേഖപ്പെടുത്തിയിരിക്കുന്നത്. കഴിഞ്ഞ മൂന്ന് ദിവസങ്ങളിലായി വില കുറഞ്ഞ് ആശ്വാസം പകർന്നിരുന്ന വിപണിയിലാണ് ഇന്ന് വലിയ വർദ്ധനവുണ്ടായത്. 1680 രൂപയാണ് ഒരു പവൻ സ്വർണത്തിന് ഇന്ന് കൂടിയത്.

ഇതോടെ 1,14,760 രൂപയാണ് ഇന്ന് ഒരു പവൻ സ്വർണത്തിന്റെ വില. 14,345 രൂപയാണ് ഒരു ഗ്രാം സ്വർണത്തിന് ഇന്ന് നൽകേണ്ടത്. കഴിഞ്ഞ മൂന്ന് ദിവസങ്ങളിലായി 2500 രൂപയോളം കുറഞ്ഞ വിപണിയിലാണ് ഇന്നത്തെ കുതിപ്പ് എന്നതും ശ്രദ്ധേയമാണ്.

ആഭരണം വാങ്ങാൻ കാത്തിരിക്കുന്നവർക്കും നിക്ഷേപകർക്കും ഒരുപോലെ ആശങ്ക നൽകുന്നതാണ് വിപണിയിലെ ഈ പെട്ടെന്നുള്ള മാറ്റം. ഫെബ്രുവരി മാസത്തിന്റെ തുടക്കത്തിൽ വലിയ ചാഞ്ചാട്ടങ്ങൾക്കാണ് വിപണി സാക്ഷ്യം വഹിച്ചത്. ഫെബ്രുവരി 2-ന് പവൻ വില 1.07 ലക്ഷം രൂപയിലേക്ക് താഴ്ന്ന് ഈ മാസത്തെ ഏറ്റവും കുറഞ്ഞ നിരക്ക് രേഖപ്പെടുത്തിയിരുന്നു. എന്നാൽ പിന്നീട് വില കുതിച്ചുയരുകയും ഫെബ്രുവരി പകുതിയോടെ പവൻ വില 1.17 ലക്ഷം കടക്കുകയും ചെയ്തിരുന്നു. കഴിഞ്ഞ ദിവസങ്ങളിലെ കുറവിന് ശേഷം വില വീണ്ടും ഉയരുന്നത് ഉപഭോക്താക്കളെ പ്രതിസന്ധിയിലാക്കുന്നു.

ആഗോള വിപണിയിലെ അസ്ഥിരതയും വില വർദ്ധനവും

അന്താരാഷ്ട്ര വിപണിയിൽ സ്വർണ്ണവിലയിൽ ഉണ്ടായ മാറ്റങ്ങളാണ് ആഭ്യന്തര വിപണിയിലും പ്രതിഫലിക്കുന്നത്. അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച പുതിയ താരിഫ് നിയന്ത്രണങ്ങൾ ആഗോള വിപണിയിൽ വലിയ അനിശ്ചിതത്വം സൃഷ്ടിച്ചിരുന്നു. ഇത് നിക്ഷേപകരെ സുരക്ഷിത നിക്ഷേപമെന്ന നിലയിൽ സ്വർണ്ണത്തിലേക്ക് ആകർഷിക്കുകയും ജനുവരി അവസാനം വില പവന് 1.30 ലക്ഷം രൂപ കടന്ന് റെക്കോർഡ് ഇടുകയും ചെയ്തിരുന്നു. നിലവിൽ യുഎസ് ഫെഡറൽ റിസർവിന്റെ പലിശ നിരക്ക് സംബന്ധിച്ച നിലപാടുകളും വിപണിയിലെ ഡോളർ കരുത്തിൽ വരുന്ന മാറ്റങ്ങളും സ്വർണ്ണവിലയെ സ്വാധീനിക്കുന്നുണ്ട്.