മലബാര് സിമെന്റ്സ്: മുന് ചീഫ് സെക്രട്ടറി ജോണ് മത്തായിയും വിചാരണ നേരിടണം: സുപ്രീം കോടതി, നടപടികള് വൈകിപ്പിക്കാനുള്ള പ്രതികളുടെ നീക്കത്തിന് തിരിച്ചടി
കൊച്ചി : മലബാര് സിമെന്റ്സിലെ അഴിമതിക്കേസുകളുടെ വിചാരണ നടപടികള് വൈകിപ്പിക്കാനുള്ള പ്രതികളുടെ നീക്കത്തിന് തിരിച്ചടി. കേസില് പ്രതിയായ മുന് ചീഫ് സെക്രട്ടറി ജോണ് മത്തായിയും വിചാരണ നേരിടണമെന്നു സുപ്രീം കോടതി വിധിച്ചു.
തൃശൂര് വിജിലന്സ് കോടതിയില് വിചാരണ നടപടികള് ആരംഭിക്കുന്നതിനു പ്രതികള് സൃഷ്ടിച്ച നിയമതടസങ്ങള് സുപ്രീം കോടതി ഉത്തരവോടെ ഇല്ലാതായി. വിചാരണ നടപടികള് ഈ മാസം ആരംഭിക്കുമെന്ന് അറിയുന്നു.
2010-11 ലാണ് മലബാര് സിമെന്റ്സില് കോളിളക്കം സൃഷ്ടിച്ച കേസുകളുടെ കുറ്റപത്രം പാലക്കാട് വിജിലന്സ് ബ്യൂറോ തൃശൂര് വിജിലന്സ് കോടതിയില് സമര്പ്പിച്ചത്. അതില് ശശീന്ദ്രന് സാക്ഷിയായ മൂന്ന് കേസുകളിലും കമ്പനിയുടെ സി.എം.ഡിയും വ്യവസായവകുപ്പ് പ്രിന്സിപ്പല് സെക്രട്ടറിയുമായിരുന്ന ജോണ് മത്തായി ഐ.എ.എസ്. പ്രതിയായിരുന്നു. കമ്പനിയുടെ ഇന്റേണല് ഓഡിറ്ററും കമ്പനി സെക്രട്ടറിയുമായിരുന്ന വി. ശശീന്ദ്രന് മൂന്ന് കേസുകളിലെയും മുഖ്യസാക്ഷിയായിരുന്നു. കുറ്റപത്രം സമര്പ്പിച്ച് മൂന്നാം നാള് 2011 ജനുവരി 24 നാണ് ശശീന്ദ്രനെയും രണ്ട് മക്കളെയും തൂങ്ങിമരിച്ച നിലയില് കണ്ടെത്തിയത്.
വിജിലന്സ് കോടതിയില് വിചാരണ നടപടികള് ആരംഭിക്കാനിരുന്ന, ശശീന്ദ്രന് സാക്ഷിയായ മൂന്ന് കേസുകളുടെ പ്രതിപട്ടികയില് നിന്ന് ജോണ് മത്തായി, എന്. കൃഷ്ണകുമാര്, ടി. പത്മനാഭന്നായര് എന്നിവരെ ഒഴിവാക്കി 2012 ല് സര്ക്കാര് ഉത്തരവിറക്കിയിരുന്നു. ഈ ഉത്തരവ് മൂലം വിചാരണ കോടതി നടപടികള് തടസപ്പെട്ടത് ഒന്നര പതിറ്റാണ്ടാണ്. സര്ക്കാര് ഉത്തരവ് റദ്ദ് ചെയ്യുന്നതിനും നിയമാനുസൃതമായ നടപടികള് സ്വീകരിക്കുന്നതിനും സംസ്ഥാന മനുഷ്യാവകാശ സംരക്ഷണകേന്ദ്രവും ശശീന്ദ്രന്റെ കുടുംബവും ദീര്ഘകാലമായി നടത്തിയ നിയമനടപടികളുടെ അന്തിമഫലമാണ് സുപ്രീം കോടതിയുടെ ഈ ഉത്തരവ്.
ഇതോടെ കരാറുകാരന് വി.എം. രാധാകൃഷ്ണന് ഉള്പ്പെടെ പ്രതികളായിട്ടുള്ളതും കുറ്റപത്രം സമര്പ്പിച്ചതുമായ എട്ട് അഴിമതിക്കേസുകളുടെ വിചാരണ നടപടികളാണ് തൃശൂര് വിജിലന്സ് കോടതിയില് ആരംഭിക്കുക. നാല്പതോളം പ്രതികളാണ് ഇതിലുള്ളത്. ഉദ്യോഗസ്ഥരും ഇടനിലക്കാരും ഇതില് ഉള്പ്പെടും.
2025 സെപ്റ്റംബറില് നാല് മാസത്തിനകം അഴിമതിക്കേസുകളുടെ വിചാരണ നടപടികള് പൂര്ത്തീകരിക്കണമെന്ന ഹൈക്കോടതി ഉത്തരവിന്റെ അടിസ്ഥാനത്തില് വിജിലന്സ് കോടതി നിയമനടപടി സ്വീകരിച്ചുവരവെയാണ് ജോണ് മത്തായി സുപ്രീം കോടതിയെ സമീപിച്ചത്. അതിനുമുമ്പേ മനുഷ്യാവകാശ സംരക്ഷണകേന്ദ്രം ജനറല് സെക്രട്ടറി ജോയ് കൈതാരം സുപ്രീം കോടതിയില് അഡ്വ. ജോസ് അബ്രഹാം വഴി തടസവാദ ഹര്ജി ഫയല് ചെയ്തിരുന്നതിനാല് അട്ടിമറി നീക്കം ഫലിച്ചില്ല.
YOU MAY BE INTERESTED
LATEST NEWS
- സുധാകരന്മാര് ഇടംവലം തലവേദന; സ്വയം സ്ഥാനാര്ഥിത്വം പ്രഖ്യാപിച്ച് ജി. സുധാകരന്, ഹൈക്കമാന്ഡിനെ വെല്ലുവിളിച്ച്, മത്സരിക്കുമെന്നു കെ. സുധാകരന്
- പാചകവാതകക്ഷാമം: 'വാര് റൂം' തുറന്ന് സംസ്ഥാനസര്ക്കാര്; വാണിജ്യ സിലിണ്ടറില് ഇളവ് പരിഗണിക്കാമെന്ന് കമ്പനികള്, സ്റ്റോക്ക് എല്ലാ ദിവസവും വിലയിരുത്തും
- 'പുറത്താക്കേണ്ടിവന്നേനേ'; ജി. സുധാകരന് പോയത് നന്നായെന്ന് സി.പി.എം., സഖാവല്ല, 'വെറും' സുധാകരനെന്ന് തിരുത്ത്! പ്രതിരോധിക്കാന് നേതാക്കള് ആലപ്പുഴയിലേക്ക്
- മുകുന്ദനില് തട്ടി കോണ്ഗ്രസ്; സ്വതന്ത്രനായി മത്സരിക്കട്ടെയെന്ന് ഒരുവിഭാഗം, തീരുമാനമെടുക്കാനാവാതെ സംസ്ഥാന നേതൃത്വം, പന്ത് ഹൈക്കമാന്ഡിന്റെ കോര്ട്ടില്
- നസ്രാണികള് ഒന്നിച്ചുനില്ക്കേണ്ടത് കാലഘട്ടത്തിന്റെ ആവശ്യം: കാതോലിക്കാ ബാവ
