അദ്ദേഹത്തിന്റെ സിനിമകള്‍ എന്റെ സന്തോഷവും എന്റെ ജീവിതത്തിന്റെ ഭാഗവുമാണ്; ശ്രീനിവാസനെക്കുറിച്ച് അനു സത്താര

photo-www.instagram.com/anu_sithara/

നടന്‍ ശ്രീനിവാസന്റെ വിയോഗത്തില്‍ നൊമ്പരപ്പെടുത്തുന്ന കുറിപ്പുമായി നടി അനു സിത്താര. ശ്രീനിവാസനൊപ്പമുളള ചിത്രം പങ്കുവെച്ചാണ് അനു സിത്താരയുടെ കുറിപ്പ്. ഒഴിവുനേരങ്ങളില്‍ വീണ്ടും വീണ്ടും കാണുന്ന സിനിമകള്‍ ശ്രീനിവാസന്റേതാണ്. സ്‌ക്രീനില്‍ ശ്രീനിവാസന്‍ സാറിനെ കാണുമ്പോള്‍ ഒരുപാട് കാലമായി അറിയുന്ന ഒരാളെ കണ്ടതുപോലെ തോന്നും. അദ്ദേഹം ഒരു ഇതിഹാസമാണെന്നും അനു സിത്താര പറയുന്നു.

അനു സിത്താരയുടെ കുറിപ്പ്

എനിക്ക് സിനിമ കാണുക എന്നത് സന്തോഷം തരുന്ന കാര്യമാണ്. ഒഴിവുസമയം കിട്ടുമ്പോഴൊക്കെ ഞാൻ വീണ്ടും വീണ്ടും കാണുന്ന ചില സിനിമകൾ ഉണ്ട് . അതിൽ കൂടുതലും ശ്രീനിവാസൻ സാറിന്റെ സിനിമകളാണ്.

പാവം പാവം രാജകുമാരൻ, പൊന്മുട്ടയിടുന്ന താറാവ്, അങ്ങനെ ഒരു അവധിക്കാലത്ത്, തലയണ മന്ത്രം, കൺകെട്ട്, നഗരങ്ങളിൽ ചെന്നു രാപ്പർക്കാം, സന്ദേശം, വടക്കുനോക്കിയന്ത്രം, ചിന്താവിഷ്ടയായ ശ്യാമള, കഥ പറയുമ്പോൾ തുടങ്ങിയ സിനിമകൾ എല്ലാം എത്ര തവണ കണ്ടാലും മടുക്കാത്തവയാണ്.

സ്ക്രീനിൽ ശ്രീനിവാസൻ സാറിനെ കാണുമ്പോൾ, എനിക്ക് ഒരുപാട് നാള് പരിചയമുള്ള എനിക്ക് പ്രിയപ്പെട്ട ഒരാളെ കാണുന്നതുപോലെ തോന്നാറുമുണ്ട്. അദ്ദേഹത്തിന്റെ കഥാപാത്രങ്ങളെ നമുക്കു ചുറ്റും കാണാൻ കഴിയും. അദ്ദേഹത്തിന്റെ ഹാസ്യം നമ്മളെ ചിരിപ്പിക്കുകയും ചിന്തിപ്പിക്കുകയും ചെയ്യുന്നു.

And the Oskar Goes To എന്ന സിനിമയുടെ ലൊക്കേഷനിൽ വെച്ച് നേരിൽ കാണാനും സംസാരിക്കാനും ഒരു ഫോട്ടോ എടുക്കാനും കഴിഞ്ഞത് എന്റെ ഭാഗ്യമായിരുന്നു. ആ നിമിഷം ഞാൻ എന്നും സ്നേഹത്തോടെ സൂക്ഷിക്കുന്ന ഒരു ഓർമ്മയാണ്.

എനിക്ക് ശ്രീനിവാസൻ സാർ ഒരു നടനോ എഴുത്തുകാരനോ മാത്രമല്ല. അദ്ദേഹം ഒരു ഇതിഹാസമാണ്. അദ്ദേഹത്തിന്റെ സിനിമകൾ എന്റെ സന്തോഷവും എന്റെ ജീവിതത്തിന്റെ ഒരു ഭാഗവുമാണ്.