കെഎസ്ആര്ടിസി ബസ് തടഞ്ഞ സംഭവം : മുന്മേയര് ആര്യാ രാജേന്ദ്രനും എംഎല്എ സച്ചിന് ദേവിനും കോടതി നോട്ടീസ്
തിരുവനന്തപുരം: കെഎസ്ആര്ടിസി ബസ് തടഞ്ഞ സംഭവത്തില് തിരുവനന്തപുരം മുന് മേയര് ആര്യാ രാജേന്ദ്രനും സച്ചിന് ദേവ് എംഎല്എയ്ക്കും കോടതി നോട്ടീസ്. ഇരുവരെയും കുറ്റപത്രത്തില് നിന്ന് ഒഴിവാക്കിയതിനെതിരെയാണ് യദു കോടതിയില് സ്വകാര്യ അന്യായം നല്കിയത്. ആര്യാ രാജേന്ദ്രന്റെ സഹോദരന് അരവിന്ദ് മാത്രമാണ് കേസിലെ പ്രതി.
ഔദ്യോഗിക കൃത്യനിര്വഹണം തടസപ്പെടുത്തിയിട്ടില്ലെന്നാണ് കന്റോണ്മെന്റ് പൊലീസ് തയ്യാറാക്കിയ കുറ്റപത്രത്തില് പറയുന്നത്. ഏപ്രില് 27-നാണ് കേസിനാസ്പദമായ സംഭവമുണ്ടായത്. പാളയത്ത് വെച്ച് രാത്രി മേയറും ഭര്ത്താവും അടക്കം സഞ്ചരിച്ച സ്വകാര്യ വാഹനം വെച്ച് കെഎസ്ആര്ടിസി ബസ് തടയുകയും ഡ്രൈവറുമായി വാക്ക് തര്ക്കമുണ്ടാവുകയുമായിരുന്നു.
തിരുവനന്തപുരം ജെഎഫ്എംസി കോടതിയിലായിരുന്നു കുറ്റപത്രം സമര്പ്പിച്ചത്. സംഭവത്തില് ആര്യാ രാജേന്ദ്രനെയും സച്ചിന് ദേവിനെയും ആര്യയുടെ ബന്ധുവായ സ്ത്രീയെയും ഒഴിവാക്കിയാണ് കുറ്റപത്രം സമര്പ്പിച്ചത്. സീബ്ര ലൈനില് വാഹനം നിര്ത്തിയിട്ട് യാത്ര തടഞ്ഞത് മാത്രമാണ് കുറ്റമായി ചേര്ത്തിരിക്കുന്നത്. അസഭ്യം പറയല്, ഔദ്യോഗിക കൃത്യനിര്വഹണം തടസപ്പെടുത്തല് തുടങ്ങിയ കുറ്റങ്ങളാണ് ഒഴിവാക്കിയത്.
കെഎസ്ആര്ടിസി ബസ് ഡ്രൈവര് യദു അശ്ലീല ആംഗ്യം കാണിച്ചതിനെ പ്രതിരോധിക്കുകയായിരുന്നു മേയര് ആര്യാ രാജേന്ദ്രനും സച്ചിന് ദേവ് എംഎല്എയും എന്നാണ് കുറ്റപത്രത്തില് പറയുന്നത്. ഒരു കുറ്റകൃത്യം നടന്നപ്പോഴുണ്ടായ പ്രതിരോധത്തെ കുറ്റമായി കാണാനാവില്ലെന്നാണ് പൊലീസിന്റെ വാദം. നിയമോപദേശത്തിന്റെ അടിസ്ഥാനത്തിലാണ് നടപടിയെന്നും പൊലീസ് അറിയിച്ചു.
