‘പൊരുത്തക്കേടുകളിൽ പൊരുത്തം കണ്ടെത്തി 26 വർഷങ്ങൾ’; കുറിപ്പുമായി എം.ബി പദ്മകുമാര്‍

photo-www.facebook.com/mbpadmakumar/

അഭിനയവും സംവിധാനവും എന്നതിൽ ഉപരി മനോഹരമായ ഏഴുത്തിലൂടെയും ആരാധകരെ നേടിയ ആളാണ് എം ബി പദ്മകുമാർ . കുടുംബത്തിലെ വിശേഷങ്ങളെല്ലാം അദ്ദേഹം മിക്കപ്പോഴും പങ്കുവെക്കാറുണ്ട്. കുടുംബ ബന്ധങ്ങളുടെ കെട്ടുറപ്പിനെക്കുറിച്ചും അദ്ദേഹം സംസാരിച്ച വാക്കുകൾ വൈറൽ ആയിരുന്നു. ഇപ്പോഴിതാ വിവാഹവാര്ഷികദിനം പങ്കിട്ട കുറിപ്പ് ആണ് വൈറൽ ആകുന്നത്

പദ്മകുമാറിന്റെ വാക്കുകള്‍

‘പൊരുത്തക്കേടുകളിൽ പൊരുത്തം കണ്ടെത്തി 26 വർഷങ്ങൾ! കല്യാണം കഴിക്കുന്നതിന് ജാതകവും കുടുംബമഹിമയും ബാങ്ക് ബാലൻസുമല്ല കീറിമുറിച്ച് പരിശോധിക്കേണ്ടത്, മറിച്ച് മനസ്സുകൾ തമ്മിലുള്ള പൊരുത്തമാണ്”. എന്റെ ഒരു സിനിമയിൽ ഈ ഡയലോഗ് എഴുതുമ്പോൾ എന്റെ ജീവിതവും അതിനൊരു കാരണമായിരിക്കാം.

ആദ്യരാത്രിയിൽ കൈയ്യിൽ പാലിന്റെ ഗ്ലാസ്സുമായി നാണം കുണുങ്ങി വരുന്ന ഭാര്യയെ കാത്തിരിക്കുന്ന ഒരു ശരാശരി മലയാളിയുടെ പുറംകാഴ്ചയുടെ അനുഭവമേ എന്നിലുമുണ്ടായിരുന്നുള്ളൂ. ഭർത്താവിനെ അനുസരിക്കുന്ന, ഭർതൃതാൽപര്യത്തിനായി സ്വയം മറക്കുന്ന 'പതിവ്രതാ രത്നം'. ഒരുപക്ഷേ, എവിടെയൊക്കെയോ ഞാൻ കണ്ടുശീലിച്ച പുരുഷ സ്വഭാവത്തിന്റെ കഷണങ്ങൾ എന്നിലുമുണ്ടായിരുന്നതു കൊണ്ടായിരിക്കാം, ആദ്യരാത്രിയുടെ ആകാംഷയ്ക്കപ്പുറം, ഒരു സാധാരണ നാട്ടിൻപുറത്തുകാരന്റെ വീട്ടുനടപ്പിന്റെ രീതികളിൽ ശ്വാസംമുട്ടി പകച്ചു നിൽക്കുന്ന ഭാര്യയുടെ മനസ്സ് എനിക്ക് മനസ്സിലാകാതെ പോയത്.

ഒന്നു തിരിച്ചാൽ ടാപ്പിലൂടെ വെള്ളമെത്തുന്നതും, ഒന്നുകറക്കിയാൽ തീപടരുന്നതുമായ ശീലമുള്ള മനസ്സിന്, കിണറ്റിലെ വെള്ളം അരിപാത്രത്തിലെത്തിക്കാനും മരം ആഹാരമായി മാറാനുമെടുക്കുന്ന സാവകാശം ഇനിയുള്ള ജീവിത യാത്രയിൽ സഹിക്കേണ്ടി വരുമെന്നോർത്ത് സങ്കടപ്പെട്ട് തള്ളിനീക്കിയ ചിത്രയുടെ മനസ്സ് മനസ്സിലാക്കാൻ എനിക്ക് ഒരു പെൺകുട്ടിയുടെ അച്ഛനാകേണ്ടിവന്നു.

ഇന്ന് ഡിസംബർ 11. ഞാനും ചിത്രയുമൊന്നിച്ചിട്ട് വർഷം ഇരുപത്തിയാറ്. മഹാഭാരതയുദ്ധം അവസാനിച്ച് വിലപിക്കുന്ന ഗാന്ധാരിയല്ല ചിത്ര, അഗ്നിശുദ്ധിയിലും ഭാര്യ നഷ്ടപ്പെട്ട രാമനുമല്ല ഞാൻ. പൊരുത്തക്കേടുകളിൽ പൊരുത്തം കണ്ടെത്തി, ചെറിയ യുദ്ധങ്ങളിൽ പരസ്പരം തോറ്റുകൊടുത്ത് മാതൃകയാകുന്ന നല്ലൊരു അച്ഛനും അമ്മയും കൂടിയാണ് ഞങ്ങൾ.

ഇന്ന് ഞാൻ അല്പം ദൂരെയാണെങ്കിലും, നല്ലൊരു കൂടുകൂട്ടാൻ കൂടെ നിന്നതിന്റെ സന്തോഷം രാവിലെ തന്നെ ഞാൻ വിളിച്ചു പറഞ്ഞു. നന്ദി ചിത്ര... ഒരുപാട് നന്ദി.. സ്നേഹത്തിന്, സഹനത്തിന്, കരുതലിന്…