ഡല്‍ഹി മലിനീകരണം: ജോലിക്ക് വരാന്‍ കഴിയില്ല, വൈറലായി ജെന്‍ സി ജീവനക്കാരന്റെ കുറിപ്പ്

ഡല്‍ഹിയിലെ അന്തരീക്ഷ മലിനീകരണം രൂക്ഷമായി തുടരുന്നതിനിടെ, ഒരു ജെന്‍ സി ജീവനക്കാരന്‍ തന്റെ സ്ഥാപകന് അയച്ച ഒറ്റവരി അവധി സന്ദേശമാണ് ഇപ്പോള്‍ സോഷ്യല്‍ മീഡിയയില്‍ വലിയ ചര്‍ച്ചയാകുന്നത്. വളച്ചുകെട്ടില്ലാത്ത, നേര്‍ക്കുനേര്‍ സംസാരിക്കുന്ന ജെന്‍ സി ജീവനക്കാര്‍ കോര്‍പ്പറേറ്റ് ലോകത്തെ സമീപിക്കുന്ന രീതിയെയാണ് ഈ സംഭവം വീണ്ടും ശ്രദ്ധയില്‍ കൊണ്ടുവരുന്നത്.

പ്ലാന്റ് അധിഷ്ഠിത കിഡ്‌സ്‌വെയര്‍ ബ്രാന്‍ഡായ കിഡ്ബിയയുടെ സ്ഥാപകനായ സ്വപ്‌നില്‍ ശ്രീവാസ്തവയാണ് തനിക്ക് ലഭിച്ച വാട്ട്‌സ്ആപ്പ് സന്ദേശത്തിന്റെ സ്‌ക്രീന്‍ഷോട്ട് എക്‌സില്‍ പങ്കുവെച്ചത്. ഡല്‍ഹിയിലെ കടുത്ത വായു മലിനീകരണത്തിന്റെ പശ്ചാത്തലത്തിലായിരുന്നു ജീവനക്കാരന്റെ ഈ 'കമാന്‍ഡ്' രൂപത്തിലുള്ള അവധി അപേക്ഷ. കണ്ണിന് അസ്വസ്ഥത അനുഭവപ്പെട്ടതിനെ തുടര്‍ന്ന് ജോലിക്ക് വരാന്‍ കഴിയില്ലെന്ന് അറിയിച്ചുകൊണ്ടുള്ളതായിരുന്നു ആ സന്ദേശം. സാധാരണയായി കാണുന്ന 'അഭ്യര്‍ത്ഥിക്കുന്നു' എന്ന രീതിക്ക് പകരം, ജീവനക്കാരന്‍ അയച്ച സന്ദേശം വളരെ ലളിതമായിരുന്നു.

സന്ദേശത്തില്‍ 'എനിക്ക് ഇന്ന് ജോലി ചെയ്യാന്‍ കഴിയില്ല, എന്റെ കണ്ണുകള്‍ എരിയുന്നു' എന്നാണ് കുറിച്ചിരുന്നത്. അവധിക്കായി 'അഭ്യര്‍ത്ഥിക്കുന്നതിന്' പകരം വിവരം അറിയിക്കുക മാത്രം ചെയ്യുന്ന ഈ സന്ദേശം, പുതിയ തലമുറയുടെ തൊഴില്‍ സമീപനത്തെ വ്യക്തമാക്കുന്നുവെന്ന് സ്ഥാപകന്‍ ചൂണ്ടിക്കാട്ടി. സ്‌ക്രീന്‍ഷോട്ട് പങ്കുവെച്ചുകൊണ്ട് സ്ഥാപകനായ സ്വപ്‌നില്‍ ശ്രീവാസ്തവ കുറിച്ചത് ഇങ്ങനെയാണ്: 'ഡല്‍ഹിയിലെ കടുത്ത വായു മലിനീകരണത്തിനിടയില്‍, ഇന്ന് എന്റെ ജീവനക്കാരില്‍ നിന്ന് എനിക്കൊരു 'ഉത്തരവ്' ലഭിച്ചു. ജെന്‍ സികള്‍ ശരിക്കും നേരിട്ടുള്ള സമീപനക്കാരാണ്' എന്നായിരുന്നു പ്രതികരണം.

ഈ പോസ്റ്റ് നിമിഷങ്ങള്‍ക്കകം വൈറലായി. പോസ്റ്റിന് താഴെ വന്ന പ്രതികരണങ്ങള്‍ സമ്മിശ്രമായിരുന്നെങ്കിലും, ഭൂരിഭാഗം ആളുകളും ഈ നേര്‍ക്കുനേര്‍ സമീപനത്തെ പ്രശംസിച്ചു. ജെന്‍ സി ജീവനക്കാര്‍ നാടകങ്ങളോ കെട്ടിച്ചമച്ച ഒഴികഴിവുകളോ ഇല്ലാതെ കാര്യങ്ങള്‍ തുറന്നുപറയുന്നതിനെയാണ് സോഷ്യല്‍ മീഡിയ അഭിനന്ദിച്ചത്.

Amid severe Delhi pollution, I received an order from my employee today. GenZ is really straightforward! pic.twitter.com/eb1R7Msd89— Swapnil Srivastav (@theswapnilsri) November 24, 2025