കടം കൊടുത്ത പണം ചോദിച്ചതിന് 72 കാരനെ കൊല്ലപ്പെടുത്തി; മൂന്നുപേർ പിടിയിൽ

മൈസൂരില്‍ വായ്പ കൊടുത്ത പണം തിരിച്ചു ചോദിച്ച വയോധികനെ മൂന്നുപേർ ചേർന്ന് ശ്വാസം മുട്ടിച്ച് കൊന്നു. സംഭവത്തിൽ മൂന്നുപേരെ പൊലീസ് അറസ്റ്റ് ചെയ്തു. ഓട്ടോറിക്ഷാ ഡ്രൈവർമാരായ മൂന്നുപേരാണ് പിടിയിലായത്.

പ്രതികൾ കൊലപാതകത്തിന് ശേഷം കവർന്ന സ്വർണം പൊലീസ് കണ്ടെത്തി. ഇന്നലെയാണ് ഗുണ്ടൽപേട്ടിന് സമീപം കാമരള്ളിയിൽ എഴുപത്തിരണ്ടുകാരനെ വഴിയോരത്ത് കൊല്ലപ്പെട്ട നിലയിൽ കണ്ടെത്തിയത്. പൊലീസ് നടത്തിയ അന്വേഷണത്തിൽ സ്വാമി എന്നയാളാണ് മരിച്ചത് എന്ന് തിരിച്ചറിഞ്ഞു. തുടർന്ന് ചിലരെ ചോദ്യം ചെയ്തതോടെയാണ് സ്വാമി കൊല്ലപ്പെട്ടതാണെന്നും പ്രദേശത്തെ ഓട്ടോറിക്ഷാ ഡ്രൈവർമാരായ മൂന്നുപേർ ചേർന്നാണ് ഈ കൊല നടത്തിയത് എന്നും സ്ഥിരീകരിച്ചത്.

പരാശിവമൂർത്തി, സിദ്ധരാജു, മഹേഷ് എന്നിവർ പിടിയിലായിട്ടുണ്ട്. ഇതിൽ പരാശിവ മൂർത്തി കൊല്ലപ്പെട്ട സ്വാമിയിൽ നിന്ന് പണം കടം വാങ്ങിയിരുന്നു. ഇതിൽ ബാക്കിയുള്ള കുറച്ചു പണം ആവശ്യപ്പെട്ട് സ്വാമി സമ്മ‍‍‍ർദം ശക്തമാക്കിയതോടെയാണ് പ്രതികൾ ഇയാളെ വിളിച്ചുവരുത്തി കൊലപ്പെടുത്തിയത്. ബാക്കിയുള്ള പണം നൽകാം എന്ന് വാഗ്ദാനം ചെയ്താണ് പ്രതികൾ സ്വാമിയെ സ്ഥലത്തെത്തിച്ചത്.സ്വാമിയുടെ പക്കൽ ഉണ്ടായിരുന്ന 105 ഗ്രാമോളം സ്വർണം പ്രതികൾ തട്ടിയെടുത്ത് വീതം വച്ചു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.