വീണ്ടും മുഹൂര്‍ത്ത സാരി ധരിച്ച് നടി മേഘ്‌ന രാജ്, ഈ ദിവസം ചീരു കൂടെ അവിടെയുണ്ടാകും; കുറിപ്പുമായി താരം

photo-www.instagram.com/megsraj/

യക്ഷിയും ഞാനും എന്ന സിനിമയിലൂടെ മലയാളത്തിലേക്ക് എത്തിയ കന്നട നടിയാണ് മേഘ്ന രാജ് സർജ .പിന്നീട് മലയാളത്തിലെ നല്ല ഒരുപിടി സിനിമകളുടെ ഭാഗമായി. ചിരജ്ജീവി സർജ്ജയെ വിവാഹം ചെയ്ത് ലൈഫ് സെറ്റിലായി നിൽക്കുമ്പോഴാണ് അത് സംഭവിച്ചത്. അവസാനം വരെ കൂടെ ഉണ്ടാവും എന്ന് പ്രതീക്ഷിച്ച ഭർത്താവ് ചിരജ്ജീവി സർജ മേഘ്ന കുഞ്ഞിനെ നാല് മാസം ഗർഭിണിയായിരിക്കുമ്പോൾ ഹൃദയാഘാതം വന്ന് മരണപ്പെട്ടത്. അവിടെ നിന്നുള്ള മേഘ്നയുടെ അതിജീവനം മകന് വേണ്ടിയായിരുന്നു.

പതിയെ സിനിമകളിലും ആക്ടീവായ നടി തന്റെ സന്തോഷങ്ങള്‍ സോഷ്യല്‍ മീഡിയയില്‍ പങ്കുവയ്ക്കാറുണ്ട്. ഇപ്പോഴിതാ കല്യാണത്തിന്റെ മുഹൂര്‍ത്ത സാരി ധരിച്ചു നില്‍ക്കുന്ന ഏതാനും ഫോട്ടോകള്‍ക്കൊപ്പം ഒരു ഇമോഷണല്‍ പോസ്റ്റുമായി എത്തിയിരിക്കുകയാണ് മേഘ്‌ന. ഇന്നത്തെ ദിവസം ഈ സാരി ധരിക്കുന്നത് ആവശ്യമാണ് എന്നതല്ല, അത്യാവശ്യമാണ് എന്ന് നടി പറയുന്നു

2008 ലെ കന്നട സ്‌റ്റേറ്റ് ചലച്ചിത്ര പുരസ്‌കാരങ്ങള്‍ വിതരണം ചെയ്തത് കഴിഞ്ഞ ദിവസമാണ്. ആ ചടങ്ങിന് പങ്കെടുക്കാനാണ് മികച്ച നടിയായി തിരഞ്ഞെടുക്കപ്പെട്ട മേഘ്‌നരാജ് തന്റെ മുഹൂര്‍ത്ത സാരി ധരിച്ചെത്തിയത്. എന്തുകൊണ്ട് അത് ധരിച്ചു എന്നതിനുള്ള വ്യക്തമായ മറുപടിയാണ് മേഘ്‌നയുടെ ഇന്‍സ്റ്റഗ്രാം പോസ്റ്റ്.

2017 ല്‍ ഞാന്‍ മൂന്ന് കന്നട ചിത്രങ്ങള്‍ കരാറ് ചെയ്തു. അതിലൊന്ന് നമ്മുടെ ഇന്റസ്ട്രിയിലെ മെഗാ ബിഗ് ബഡ്ജറ്റ് ചിത്രമായിരുന്നു. അതുകൊണ്ട് തന്നെ ഇരുവുള്ളവ ബിട്ടു എന്ന ചിത്രം ചെയ്യണമോ വേണ്ടയോ എന്ന രണ്ട് മനസ്സായിരുന്നു എനിക്ക്. പുതിയ സംവിധായകന്റെ സിനിമയാണ്, മാത്രവുമല്ല- ഞാനൊരു കുട്ടിയുടെ അമ്മയായിട്ടാണ് അഭിനയിക്കേണ്ടതും. ടൈപ് കാസ്റ്റ് ചെയ്യപ്പെട്ടുപോകുമോ എന്ന പേടിയും ഉണ്ടായിരുന്നു. മുന്‍നിര നായികമാര്‍ക്കെല്ലാം ഉണ്ടാവുന്ന സ്വാഭാവികമായ പേടി.

അതിനൊപ്പം ഞാന്‍ എന്റെ വിവാഹ നിശ്ചയത്തിനായി തയ്യാറെടുക്കുകയാണ്, അടുത്ത വര്‍ഷം വിവാഹമുണ്ടാവും. ഇക്കാര്യങ്ങള്‍ ഞാന്‍ ചിരുവിനോട് (ചിരജ്ജീവി സര്‍ജ) പറഞ്ഞു. ചിരു എന്റെ അടുത്തിരുന്ന് രണ്ട് ചോദ്യങ്ങള്‍ ചോദിച്ചു, ഈ മെഗാ ബിഗ് ബഡ്ജറ്റ് സിനിമയിലെ ലീഡ് റോള്‍ ചെയ്യുന്നത് ആരാണ്, ഞാന്‍ അതിന്റെ ഉത്തരം പറഞ്ഞു. അദ്ദേഹം ചിരിച്ചു, അതിന് ശേഷം വീണ്ടുമൊരു ചോദ്യം ചോദിച്ചു, ഇപ്പോള്‍ വന്നിരിക്കുന്ന നവാഗത സംവിധായകന്റെ ഇരുവുള്ളുവ ബിട്ടു എന്ന ചിത്രത്തിലെ ലീഡ് റോള്‍ ആരാണ് എന്ന്. ഞാന്‍ എന്റെ കോ സ്റ്റാറിന്റെ പേര് പറഞ്ഞു. അദ്ദേഹം ചിരിച്ചു, എന്നിട്ട് പറഞ്ഞു, ഈ സിനിമയിലെ ലീഡ് റോള്‍ നീ ആകൂ. ഇത് നിന്റെ സിനിമയാണ്, പ്രേക്ഷകര്‍ എങ്ങനെ എടുക്കും, സിനിമക്കാര്‍ അതിനെ എങ്ങനെ വിലയിരുത്തും എന്നത് വിട്ടേക്കൂ.

ഒരുമിച്ച അഭിനയിച്ച ആട്ടകാര എന്ന ചിത്രത്തിന് പുറമെ, ചിരു എന്റെ ഒരു സിനിമ ഷൂട്ടിങിന്റെ സെറ്റില്‍ മാത്രമേ വന്നിട്ടുള്ളൂ, അത് ഇരുവുള്ളുവ ബിട്ടു എന്ന ചിത്രത്തിന്റേതാണ്. ഞങ്ങള്‍ ഒരു ക്രൂഷ്യല്‍ സീന്‍ എടുത്തുകൊണ്ടിരിയ്ക്കുമ്പോള്‍ ചിരു മോണിറ്ററിന്റെ മുന്നില്‍ ഇരിക്കുന്നുണ്ടായിരുന്നു. ആ സീന്‍ കഴിഞ്ഞ് ഞാന്‍ തിരിച്ചുവന്നപ്പോള്‍ ചിരു പറഞ്ഞു, ഈ സിനിമയ്ക്ക് നിനക്ക് സ്റ്റേറ്റ് അവാര്‍ഡ് ലഭിക്കും എന്ന്. 2020 ല്‍ പുരസ്‌കാരം പ്രഖ്യാപിച്ചപ്പോള്‍ ഞാന്‍ ആദ്യം വിളിച്ചത് ചിരുവിനെയാണ്. അഭിനന്ദനങ്ങള്‍ കുട്ടിമ്മാ, ഞാന്‍ പറഞ്ഞില്ലേ നിനക്ക് കിട്ടും എന്ന്, നീ വലിയ വിജയം നേടും- ചിരു സന്തോഷത്തോടെ പറഞ്ഞു.

ഇന്ന് ഈ പുരസ്‌കാരം വാങ്ങാന്‍ പോകുമ്പോള്‍ ഞാന്‍ എന്റെ മുഹൂര്‍ത്ത സാരി ധരിച്ചത് ആവശ്യമായിരുന്നു എന്നല്ല, അത്യാവശ്യമായിരുന്നു, അവാര്‍ഡ് സ്വീകരിക്കാന്‍ ഞാന്‍ ചിരുവിനെ കൂടെ കൊണ്ടു പോകേണ്ടതാണ്- മേഘ്‌ന പറഞ്ഞു.