പെരിനാടിന് ആശ്വാസം; മധുരൈ എക്സ്പ്രസിന് പുതിയ സ്റ്റോപ്പ്, സമയക്രമം ഇങ്ങനെ

photo; representative image

തിരുവനന്തപുരം: മധുരൈ എക്സ്പ്രസിന് (ട്രെയിൻ നമ്പർ 16328/16327) കൊല്ലം ജില്ലയിലെ പെരിനാട് സ്റ്റോപ്പ് അനുവദിച്ച് കേന്ദ്ര റെയിൽവേ മന്ത്രാലയം. പെരിനാട് സ്റ്റേഷനിൽ നിന്നുള്ള ഗുരുവായൂർ - മധുര എക്സ്പ്രസ് ട്രെയിനിൻ്റെ ഫ്ലാഗ് ഓഫ് നാളെ രാവിലെ 10:30ന് കേന്ദ്ര ന്യൂനപക്ഷകാര്യ, മൃഗസംരക്ഷണ, ക്ഷീരവികസന, ഫിഷറീസ് സഹമന്ത്രി ജോർജ്ജ് കുര്യൻ നിർവ്വഹിക്കും.

എൻ. കെ. പ്രേമചന്ദ്രൻ എംപി, എം. മുകേഷ് എംഎൽഎ എന്നിവർ ചടങ്ങിൽ പങ്കെടുക്കും. മധുരൈ - ഗുരുവായൂർ എക്സ്പ്രസ് (ട്രെയിൻ നമ്പർ 16328) രാവിലെ 11.18 ന് പെരിനാട് എത്തും. തുടർന്ന് 11.19 ന് പുറപ്പെടും. ഗുരുവായൂർ - മധുര എക്സ്പ്രസ് (ട്രെയിൻ നമ്പർ 16327) രാത്രി 07.53 ന് പെരിനാട് എത്തും. തുടർന്ന് 07.54 ന് പുറപ്പെടും.

അടുത്തിടെ ജനശതാബ്ദി എക്സ്പ്രസിന് ചങ്ങനാശ്ശേരിയിൽ സ്റ്റോപ്പ് അനുവദിച്ചിരുന്നു. 12082 നമ്പർ തിരുവനന്തപുരം സെൻട്രൽ - കണ്ണൂർ ജനശതാബ്ദി എക്സ്പ്രസിനാണ് ഒക്ടോബർ 10-ാം തീയതി മുതൽ ചങ്ങനാശ്ശേരിയിലും സ്റ്റോപ്പ് അനുവദിച്ചത്. തിരിച്ചുള്ള 12081 നമ്പർ കണ്ണൂർ - തിരുവനന്തപുരം സെൻട്രൽ ജനശതാബ്ദി എക്സ്പ്രസിനും ചങ്ങനാശ്ശേരിയിൽ സ്റ്റോപ്പ് ഉണ്ട്. വികസിപ്പിക്കപ്പെടുന്ന ശബരി പാത, പുനലൂർ റെയിൽപ്പാത എന്നിവയുമായി ചങ്ങനാശ്ശേരിയെ ബന്ധിപ്പിക്കുമെന്ന് മന്ത്രി ജോർജ്ജ് കുര്യൻ ഉദ്ഘാടന വേളയിൽ പറഞ്ഞിരുന്നു.