‘വൈമാനിക കുടുംബത്തിൽ നിന്ന് വന്നതില്‍ അഭിമാനം; ഇന്ത്യൻ സായുധസേന കിഡ് എന്ന എന്റെ ഐഡന്റിറ്റി വേർപെടുത്താൻ ഒന്നിനുമാവില്ല...’ ലാറ ദത്ത

Lara Dutta shares her illustrious legacy with airforce (Image Source: Instagram)

മോഡലിംഗിലൂടെ സിനിമയിലെത്തി മികച്ച കഥാപാത്രങ്ങള്‍ അവതരിപ്പിച്ച് പ്രേക്ഷകപ്രീതി നേടിയ മുന്‍ മിസ് യൂണിവേഴ്സാണ് ലാറ ദത്ത. ബിഗ് സ്ക്രീനില്‍ വൈവിധ്യമാര്‍ന്ന കഥാപാത്രങ്ങള്‍ ചെയ്താണ് ലാറ പ്രേക്ഷകമനസ്സിലിടം നേടിയത്. അഭിനേത്രി, നിര്‍മ്മാതാവ്, അംഗീകൃത യോഗ പരിശീലക, സൗന്ദര്യ ബ്രാന്റ് സ്ഥാപക എന്നീ നിലകളിലും തിളങ്ങി നില്‍ക്കുന്ന താരമാണ് ലാറ.
വ്യോമസേനയുമായി വലിയ അടുപ്പമുള്ള കുടുംബമാണ് ലാറയുടേത്. വെള്ളിത്തിരയിലും വേദിയിലും തിളങ്ങുമ്പോഴും വ്യോമസേനയിൽ വേരുകളുള്ള കുടുംബമാണ് തന്റേതെന്ന് ലാറ അഭിമാനത്തോടെ പലയിടത്തും പറഞ്ഞിട്ടുണ്ട്. അച്ഛനും മുത്തച്ഛനും സഹോദരിയുമൊക്കെ വ്യോമസേനയില്‍ പ്രവര്‍ത്തിച്ചാണ് ലാറയ്ക്ക് അഭിമാനമായി മാറിയത്.
ഇപ്പോഴിതാ വ്യോമസേനാ ദിനത്തിൽ, ലാറ തന്റെ പിതാവിനെക്കുറിച്ചും, താൻ വളർന്ന പരിസ്ഥിതിയെക്കുറിച്ചും, സഹോദരി അച്ഛന്റെ പാരമ്പര്യം എങ്ങനെ മുന്നോട്ട് കൊണ്ടുപോകുന്നുവെന്നതിനെക്കുറിച്ചുമുള്ള പോസ്റ്റ് പങ്കിടുകയാണ്. 93-ാമത് ഇന്ത്യൻ വ്യോമസേന ദിനത്തെ അനുസ്മരിച്ചു കൊണ്ടുള്ള പോസ്റ്റില്‍ ബ്രിട്ടീഷ് ഓവർസീസ് എയർവേസ് കോർപ്പറേഷന്റെ പൈലറ്റായിരുന്ന തന്റെ മുത്തച്ഛൻ ചന്ദ്ര കിഷോർ ദത്തയിൽ നിന്ന് ആരംഭിച്ച തന്റെ ആഘോഷിക്കപ്പെട്ട പാരമ്പര്യത്തെക്കുറിച്ചാണ് ലാറ കുറിച്ചിരിക്കുന്നത്.
‘‘വൈമാനികരുടെ ഒരു കുടുംബത്തിലാണ് ഞാൻ വളർന്നത്...
എന്റെ മുത്തച്ഛൻ ചന്ദ്ര കിഷോർ ദത്ത ബ്രിട്ടീഷ് എയർവേയ്‌സായി മാറിയ ബ്രിട്ടീഷ് ഓവർസീസ് എയർവേയ്‌സ് കോർപ്പറേഷന്റെ പൈലറ്റായിരുന്നു. എന്റെ പിതാവ് വി.ജി. കമാൻഡർ എൽ. കെ. ദത്ത (റിട്ട.), വായുസേന (ബാർ) ധീരതാ അവാർഡ് ജേതാവായിരുന്നു, 1965-ലെയും 1971-ലെയും യുദ്ധങ്ങളിൽ ധീരമായ പരിശ്രമങ്ങൾക്ക് അദ്ദേഹം മെഡലുകൾ നേടി. അദ്ദേഹത്തിന്റെ പാത പിന്തുടർന്ന്, എന്റെ സഹോദരി, സ്ക്വാഡ്രൺ എൽ.ഡി. ചെറിൽ ദത്ത ഇന്ത്യൻ വ്യോമസേനയിൽ കമ്മീഷൻ ചെയ്ത വനിതാ ഹെലികോപ്റ്റർ പൈലറ്റുമാരുടെ ആദ്യ ബാച്ചിന്റെ ഭാഗമായി...
പറക്കൽ രക്തത്തിൽ അലിഞ്ഞു ചേര്‍ന്നിട്ടുണ്ടെന്നാണ് അവര്‍ പറയുന്നത്. ഒരു ഇന്ത്യൻ സായുധ സേനാ കുട്ടി എന്ന നിലയിൽ നിന്ന് എന്റെ വ്യക്തിത്വത്തെ വേർപെടുത്താൻ യാതൊന്നിനും കഴിയില്ല.
2025 ലെ 93-ാമത് ഇന്ത്യൻ വ്യോമസേനാ ദിനത്തിൽ, നമ്മുടെ ആകാശത്തെ സംരക്ഷിക്കുകയും അഭിമാനത്തോടെയും മഹത്വത്തോടെയും രാഷ്ട്രത്തെ സേവിക്കുകയും ചെയ്യുന്ന ധീരരായ വ്യോമസേനാ യോദ്ധാക്കളെ ഞാൻ അഭിവാദ്യം ചെയ്യുന്നു...’’ എന്ന ക്യാപ്ഷന്‍ നല്‍കി അച്ഛന്റെയും മുത്തച്ഛന്റെയും തന്റെ സഹോദരിയുടെയും ചിത്രങ്ങള്‍ പങ്കിട്ടാണ് ലാറ ദത്തയുടെ പോസ്റ്റ്. ഒപ്പം എയര്‍ ഫോഴ്സ് ഡേ, ഇന്ത്യന്‍ എയര്‍ഫോഴ്സ് എന്ന ടാഗുകളും നല്‍കിയിട്ടുണ്ട് താരം.

View this post on Instagram

A post shared by Lara Dutta Bhupathi (@larabhupathi)

മൂന്ന് തലമുറകൾ നീണ്ടുനിൽക്കുന്ന അഭിമാനകരമായ ഒരു പറക്കൽ പാരമ്പര്യത്തിന്റെ തുടക്കമായത് മുത്തച്ഛൻ ചന്ദ്ര കിഷോർ ദത്താണ്. പിന്നീട് അച്ഛന്‍ എൽ കെ ദത്ത് ഇന്ത്യന്‍ ​വ്യോമസേനയിലെ വിംഗ് കമാൻഡറായി. ലാറയുടെ സഹോദരി സ്ക്വാഡ്രൺ ലീഡർ ചെറിൽ ദത്ത് ഇന്ത്യൻ വ്യോമസേനയിലെ ആദ്യത്തെ വനിതാ ഹെലികോപ്റ്റർ പൈലറ്റുമാരിൽ ഒരാളായി, ശക്തിയുടെയും ദൃഢനിശ്ചയത്തിന്റെയും പ്രതീകമായി മാറിയതാണ്.
ഈ വര്‍ഷമാദ്യമാണ് തന്റെ അച്ഛനും റിട്ട. വിങ് കമാൻഡറുമായ എൽ.കെ. ദത്തയെ ലാറയ്ക്ക് നഷ്ടപ്പെട്ടത്. തന്റെ പരേതനായ പിതാവിനെ അനുസ്മരിച്ചുകൊണ്ട്, തന്റെ പിതാവ് രോഗത്തെ യഥാർത്ഥ സൈനികനെപ്പോലെ എങ്ങനെ നേരിട്ടുവെന്ന് വെളിപ്പെടുത്തിക്കൊണ്ട് ലാറ സോഷ്യൽ മീഡിയയിൽ ഒരു ഹൃദയംഗമമായ കുറിപ്പ് പങ്കുവെച്ചിരുന്നു. “എന്റെ അത്ഭുതകരമായ, ധീരനായ, ഒരു പോരാളിയ പിതാവ്, മെയ് 31 ന് ശാന്തമായി ശുഭനിദ്രയിലേക്ക് കടന്നു... കഴിഞ്ഞ കുറച്ച് മാസങ്ങളായി തന്നെ തളർത്തിയ ഒരു രോഗത്തിനെതിരെ അദ്ദേഹം ദീർഘകാലം പോരാടി... യുദ്ധത്തിൽ തളർന്നുപോയ ഒരു പട്ടാളക്കാരനിലെ മടിയനെപ്പോലെ അദ്ദേഹം വേദന സഹിച്ചു, ചിലപ്പോഴൊക്കെ എല്ലാ യുക്തികളെയും ധിക്കരിക്കുന്ന ധൈര്യവും പ്രതിബന്ധങ്ങളെയും മറികടക്കാനുള്ള സന്നദ്ധതയും പ്രകടിപ്പിച്ചു... ശരീരം തകരുകയോ അനിവാര്യമായ അന്ത്യത്തിന് കീഴടങ്ങുകയോ ചെയ്യുന്നതിനെക്കുറിച്ചുള്ള എന്റെ ഏതൊരു ആശയവും അദ്ദേഹം മാറ്റിയെഴുതി...’’ എന്നാണ് ലാറ ആ നഷ്ടത്തെക്കുറിച്ച് സോഷ്യല്‍ മീഡിയയില്‍ കുറിച്ചത്.
വ്യോമസേനയിലേക്ക് എത്തിയില്ലെങ്കിലും മോഡലിംഗില്‍ തുടങ്ങിയ കരിയറില്‍ നിന്ന് ലാറയും ഏറെ വളര്‍ന്നു. മിസ് യൂണിവേഴ്സില്‍ നിന്ന് മികച്ച കഥാപാത്രങ്ങള്‍ അവതരിപ്പിക്കുന്ന അഭിനേത്രിയായി. വൈവിധ്യ കഥാപാത്രങ്ങള്‍ അവതരിപ്പിച്ച് പ്രേക്ഷകഹൃദയം നേടിയ താരം പിന്നീട് നിര്‍മ്മാണ കമ്പനിയായ ഭീഗി ബസന്തി സ്ഥാപിച്ചു. ചലോ ദില്ലി എന്ന ഹിന്ദി ചിത്രം നിര്‍മ്മിക്കുകയും ചെയ്തു.
സർട്ടിഫൈഡ് യോഗ പരിശീലക കൂടിയായ ലാറ തന്റെ സോഷ്യൽ മീഡിയയിലൂടെ ആരോഗ്യം പ്രോത്സാഹിപ്പിക്കുന്നു. ഗർഭിണികളെ സഹായിക്കുന്നതിനായി അവർ ഒരു പ്രീനെറ്റൽ യോഗ ഡിവിഡിയും റിലീസ് ചെയ്തിട്ടുണ്ട് താരം. ഇതിനൊപ്പം തന്നെ ഇന്ത്യൻ ചർമ്മത്തിന് വേണ്ടി പ്രത്യേകം നിർമ്മിച്ച ഏരിയാസ് എന്ന സ്കിൻകെയർ ബ്രാൻഡും ആരംഭിച്ചു. അങ്ങനെ എല്ലാ മേഖലകളിലും തിളങ്ങി നില്‍ക്കുന്ന താരം കൂടിയാണ് ലാറ ദത്ത. ഇന്ത്യൻ ടെന്നീസ് ഇതിഹാസമായ മഹേഷ് ഭൂപതി പ്രണയത്തിലൂ​ടെ വിവാഹം ചെയ്ത താരം കുടുംബിനിയെന്ന നിലയിലും ഹൃദയം കീഴടക്കാറുണ്ട്. 14 ന്റെ തിളക്കത്തില്‍ നില്‍ക്കുന്ന ഇവരുടെ ദാമ്പത്യത്തില്‍ സൈറ എന്നൊരു മകള്‍ കൂടിയുണ്ട് ലാറയ്ക്ക്.