ശാരീരികമായി ഉപദ്രവിച്ചതിനു തെളിവില്ല; വ്‌ളോഗര്‍ മുകേഷ്. എം നായര്‍ക്കെതിരെയുളള പോക്‌സോ കേസില്‍ പോലീസ് റിപ്പോര്‍ട്ട്

തിരുവനന്തപുരം: വ്‌ളോഗര്‍ മുകേഷ് എം.നായര്‍ പ്രായപൂര്‍ത്തിയാകാത്ത പെണ്‍കുട്ടിയെ ശാരീരികമായി ഉപദ്രവിച്ചതിനു തെളിവില്ലെന്ന് പോലീസ് റിപ്പോര്‍ട്ട്. പ്രായപൂര്‍ത്തിയാകാത്ത കുട്ടിയുടെ ദൃശ്യങ്ങള്‍ സമൂഹമാധ്യമങ്ങളില്‍ പങ്കുവെച്ച കുറ്റംമാത്രം നിലനിര്‍ത്തിയാണ് അന്വേഷണ റിപ്പോര്‍ട്ട് കോടതിയില്‍ സമര്‍പ്പിച്ചത്.

പെണ്‍കുട്ടിയുടെ പരാതിയില്‍ പറയാത്ത കാര്യം പിന്നീട് മൊഴിയില്‍ പറഞ്ഞത് സംശയകരമാണെന്നും ചിത്രീകരണ ദൃശ്യങ്ങള്‍ പരിശോധിച്ചപ്പോള്‍ അസ്വാഭാവികതയൊന്നും കണ്ടെത്താനായില്ലെന്നുമാണ് അന്വേഷണസംഘം കോടതിയില്‍ നല്‍കിയ റിപ്പോര്‍ട്ടില്‍ പറയുന്നത്.

റീല്‍സിന്റെ ഫോട്ടോഷൂട്ടിനിടെ പ്രായപൂര്‍ത്തിയാകാത്ത പെണ്‍കുട്ടിയെ നിര്‍ബന്ധിച്ച് അര്‍ധനഗ്നയാക്കി അഭിനയിപ്പിച്ചുവെന്നും സ്വകാര്യഭാഗത്ത് സ്പര്‍ശിച്ചെന്നുമുളള പരാതിയിലാണ്, ഇക്കഴിഞ്ഞ ഏപ്രിലില്‍ മുകേഷ് എം. നായര്‍ക്കെതിരെ പോക്‌സോ കേസ് റജിസ്റ്റര്‍ ചെയ്തത്. കടയ്ക്കല്‍ സ്വദേശിയായ പതിനഞ്ചുകാരിയുടെ മാതാപിതാക്കളുടെ പരാതിയില്‍ കോവളം പോലീസാണ് കേസെടുത്തത്.