ലക്ഷ്യം സാമുദായിക ധ്രുവീകരണം', കോളജുകളില്‍ വിഭജനഭീതി ദിനം ആചരിക്കില്ല; ഗവര്‍ണറുടെ നിര്‍ദേശം തള്ളി സര്‍ക്കാര്‍

തിരുവനന്തപുരം: സര്‍വകലാശാലകള്‍ ഓഗസ്റ്റ് 14 'വിഭജനഭീതി ദിനം' ആയി ആചരിക്കണമെന്ന ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കറുടെ ആഹ്വാനം തളളി സര്‍ക്കാര്‍. വിഭജനഭീതി ദിനം ആചരിക്കേണ്ടതില്ലെന്ന് സര്‍ക്കാര്‍ സംസ്ഥാനത്തെ കോളജുകള്‍ക്ക് നിര്‍ദേശം നല്‍കി. ഉന്നത വിദ്യാഭ്യാസ മന്ത്രി ഡോ. ആര്‍ ബിന്ദുവിന്റേതാണ് നിര്‍ദേശം.

ഗവര്‍ണറുടെ നിര്‍ദേശത്തെ രൂക്ഷമായ ഭാഷയില്‍ വിമര്‍ശിച്ച മന്ത്രി ഇത്തരം ഒരു ദിനാചരണത്തിലൂടെ സാമുദായിക ധ്രുവീകരണമാണ് ലക്ഷ്യമെന്നും കുറ്റപ്പെടുത്തി. വര്‍ഗീയതയും വിദ്വേഷവും ലക്ഷ്യവച്ചുള്ള ആര്‍എസ്എസ് തന്ത്രങ്ങളുടെ ഭാഗമാണ് ദിനാചരണം എന്ന് ഉന്നത വിദ്യാഭ്യാസ മന്ത്രി നേരത്തെ തന്നെ വിമര്‍ശനം ഉന്നയിച്ചികുന്നു. കേരളത്തിലെ സര്‍വകലാശാലകളില്‍ 'വിഭജനഭീതി ദിനം' ആചരിക്കണമെന്ന ഗവര്‍ണറുടെ നിര്‍ദേശം കലാലയ സമൂഹം തള്ളിക്കളയണമെന്ന് മന്ത്രി ആര്‍ ബിന്ദു കഴിഞ്ഞ ദിവസം വാര്‍ത്താ സമ്മേളനത്തില്‍ ആഹ്വാനം ചെയ്തിരുന്നു. പിന്നാലെയാണ് കോളജുകള്‍ക്കുള്ള സര്‍ക്കാര്‍ നിര്‍ദേശം.