ജനാധിപത്യത്തിന്റെ വിശ്വാസ്യത നശിപ്പിക്കാന്‍ അനുവദിക്കാനാകില്ല ; വോട്ടര്‍തട്ടിപ്പില്‍ രാഹുലിന് പിന്തുണയുമായി തരൂര്‍

ന്യൂഡല്‍ഹി: ഓപ്പറേഷന്‍ സിന്ദൂറുമായി ബന്ധപ്പെട്ട് കോണ്‍ഗ്രസിനും ഹൈക്കമാന്റിനും വലിയ തലവേദനയുണ്ടാക്കിയ തിരുവനന്തപുരം എം.പി. ശശിതരൂര്‍ വോട്ട് വിവാദത്തില്‍ രാഹുല്‍ഗാന്ധിയെ പിന്തുണച്ച് രംഗത്ത്. കഴിഞ്ഞദിവസം രാഹുല്‍ഗാന്ധി നടത്തിയ വോട്ടര്‍ തട്ടിപ്പ് വിവാദവുമായി ബന്ധപ്പെട്ട ആരോപണത്തില്‍ പ്രതിപക്ഷ നേതാവിന് പിന്തുണയുമായി ശശി തരൂര്‍ രംഗത്തെത്തി.

2024ലെ ലോക്സഭാ തെരഞ്ഞെടുപ്പില്‍ കര്‍ണാടകയില്‍ വോട്ടര്‍ തട്ടിപ്പ് നടത്തിയെന്ന സ്ഫോടനാത്മകമായ അവകാശവാദം ഗാന്ധി ഇന്നലെ നടത്തിയിരുന്നു, തിരഞ്ഞെടുപ്പ് കമ്മീഷന്‍ ബിജെപിയുമായി ഒത്തുകളിച്ച് തിരഞ്ഞെടുപ്പ് മോഷ്ടിച്ചെന്നായിരുന്നു രാഹുല്‍ നടത്തിയ ആരോപണം. എന്നാല്‍ ആരോപണങ്ങള്‍ അടിസ്ഥാനരഹിതമാണെന്ന് ബിജെപി നിഷേധിച്ചിട്ടുണ്ട്.

ഓപ്പറേഷന്‍ സിന്ദൂരത്തെക്കുറിച്ചുള്ള കോണ്‍ഗ്രസിന്റെ വീക്ഷണത്തെ ശക്തമായി എതിര്‍ക്കുകയും ഓപ്പറേഷന്‍ സിന്ദൂരത്തെക്കുറിച്ചുള്ള ലോക്സഭയിലെ ചര്‍ച്ചയില്‍ നിന്ന് വിട്ടുനില്‍ക്കുകയും ചെയ്ത തരൂര്‍ കോണ്‍ഗ്രസിന് പല തവണ നെറ്റി ചുളിക്കാനുള്ള അവസരം സൃഷ്ടിച്ചിരുന്നു. എന്നാല്‍ വോട്ടര്‍തട്ടിപ്പുമായി ബന്ധപ്പെട്ട വിഷയത്തില്‍ ചൂടേറിയതും ഗൗരവവുമായ ചര്‍ച്ചയ്ക്കും ആഹ്വാനം ചെയ്തു.

''എല്ലാ പാര്‍ട്ടികളുടെയും എല്ലാ വോട്ടര്‍മാരുടെയും താല്‍പ്പര്യങ്ങള്‍ക്കനുസൃതമായി ഗൗരവമായി അഭിസംബോധന ചെയ്യേണ്ട ഗുരുതരമായ ചോദ്യങ്ങളാണിവ. കഴിവില്ലായ്മ, അശ്രദ്ധ, അല്ലെങ്കില്‍ മോശമായ, ബോധപൂര്‍വമായ കൈകടത്തല്‍ എന്നിവയിലൂടെ അതിന്റെ വിശ്വാസ്യത നശിപ്പിക്കാന്‍ അനുവദിക്കാത്തത്ര വിലപ്പെട്ടതാണ് നമ്മുടെ ജനാധിപത്യം.'' തരൂര്‍ ഇന്ന് രാവിലെ ഒരു ഓണ്‍ലൈന്‍ പോസ്റ്റില്‍ പറഞ്ഞു.

ഇസിയോട് അടിയന്തരമായി ഇടപെടണമെന്നും അതിന്റെ വക്താവ് രാജ്യത്തെ അറിയിക്കണമെന്നും തിരുവനന്തപുരം എംപി ആവശ്യപ്പെട്ടു.
കഴിഞ്ഞ മാസം പാര്‍ലമെന്റില്‍ ഓപ്പറേഷന്‍ സിന്ദൂര്‍ ചര്‍ച്ചയ്ക്കിടെ കോണ്‍ഗ്രസ് സര്‍ക്കാരിനെ മൂലക്കിരുത്താന്‍ ശ്രമിച്ചപ്പോള്‍, സൈനിക നടപടി വിജയിച്ചുവെന്ന തന്റെ മുന്‍ നിലപാടില്‍ നിന്നും മാറ്റമില്ലെന്ന് വാദിച്ച് തരൂര്‍ പാര്‍ലമെന്റില്‍ നിശബ്ദത പാലിച്ചത് ചര്‍ച്ചയായിരുന്നു.