എല്ലാ ഉയര്‍ച്ചയിലൂടെയും താഴ്ചയിലൂടെയും കടന്ന് പോകുമ്പോഴും നീയാണ് എന്റെ ലോകം; കുറിപ്പുമായി ഷംന കാസിം

photo-www.instagram.com/shamnakasim/

ഇരുപത് വർഷമായി തെന്നിന്ത്യൻ സിനിമയിൽ സജീവമാണ് ഷംന കാസിം. നർത്തകിയും അഭിനേത്രിയുമെല്ലാമായ ഷംന ജീവിതത്തിലെ ഏറ്റവും വലിയ നിധിയായി കാണുന്നത് ഭർത്താവ് ഷാനിദിനെയാണ്. ജെബിഎസ് ഗ്രൂപ്പ് ഓഫ് കമ്പനീസിന്റെ സ്ഥാപകനും സിഇഒയുമായ ഷാനിദ് ആസിഫ് അലി ഇരുപത് വർഷത്തിൽ ഏറെയായി ദുബായിയിൽ സ്ഥിര താമസക്കാരനാണ്. 2022ൽ ആയിരുന്നു ഇരുവരുടേയും വിവാഹം.

വിവാഹശേഷം ഷംനയും ദുബായിൽ സെറ്റിൽഡാണ്. നടിയുടെ വിവാഹവും പിന്നീടുള്ള പ്രസവവും എല്ലാം വൈറലായിരുന്നു. ഷംനയുടേയും ഷാനിദിന്റേയും പ്രണയ വിവാഹമായിരുന്നു. ദുബായിലെ സ്വകാര്യ ചടങ്ങിൽ വെച്ചാണ് ഷംന ആദ്യമായി ഷാനിദിനെ പരിചയപ്പെടുന്നത്. അത് പിന്നീട് സൗഹൃദത്തിലേക്കും പ്രണയത്തിലേക്കും വഴി മാറുകയായിരുന്നു.

രണ്ടുപേരുടെയും കുടുംബംഗങ്ങൾക്കും ബന്ധത്തിനോട് യോജിപ്പ് വന്നതോടെ വിവാഹം തീരുമാനിക്കുകയായിരുന്നു. ഇപ്പോഴിതാ ദാമ്പത്യം മൂന്ന് വർഷം പിന്നിട്ട സന്തോഷത്തിലാണ് ഷംന. പ്രണയം നിറഞ്ഞ മനോഹരമായ കുറിപ്പാണ് നിക്കാഹ് ആനിവേഴ്സറി ദിനത്തിൽ ഷംന ഇൻസ്റ്റഗ്രാമിൽ പങ്കുവെച്ചത്. ഹാപ്പി നിക്കാഹ് ആനിവേഴ്സറി ഇക്കാ... എന്ന് ആശംസിച്ചുകൊണ്ടാണ് ഷംനയുടെ കുറിപ്പ് ആരംഭിക്കുന്നത്.

ഓരോ പുഞ്ചിരിയിലും എല്ലാ കൊടുങ്കാറ്റിലും നിങ്ങളുടേതായി... ഒരുമിച്ച് വളർന്നതിന്റെ മൂന്ന് വർഷങ്ങൾ. ഞങ്ങൾ തമ്മിൽ വഴക്കുകൾ ഉണ്ടായിട്ടുണ്ട്. പക്ഷെ നിരാശയുടെ ഓരോ നിമിഷത്തിനും പിന്നിൽ നിങ്ങളെ അനന്തമായി സ്നേഹിക്കുന്ന ഒരു ഹൃദയമുണ്ട്. പങ്കാളി, സമാധാനം തുടങ്ങി എല്ലാം എനിക്ക് എന്റെ ഇക്കയാണ്. എല്ലാ ഉയർച്ചയിലൂടെയും താഴ്ചയിലൂടെയും കടന്ന് പോകുമ്പോഴും നീയാണ് എന്റെ ലോകം.

നിങ്ങളുടെ ക്ഷമയ്ക്കും നിങ്ങളുടെ സ്നേഹത്തിനും ഞമ്മളെ ഒരിക്കലും ഉപേക്ഷിക്കാത്തതിനും നന്ദി. സ്നേഹത്തിന്റെയും ചിരിയുടെയും പഠനത്തിന്റെയും ഇനിയും നിരവധി വർഷങ്ങൾ... ഒരുമിച്ച്. എന്ത് വന്നാലും ഞാൻ എപ്പോഴും നിങ്ങളെ മാത്രമെ തിരഞ്ഞെടുക്കൂ. ഞാൻ നിങ്ങളെ സ്നേഹിക്കുന്നു ഇക്കാ... എന്നായിരുന്നു ഷംനയുടെ കുറിപ്പ്. കുറിപ്പിനൊപ്പം ഷാനിദിനൊപ്പമുള്ള പ്രണയ സുരഭിലമായ നിമിഷങ്ങളുടെ വീഡിയോയും ഷംന പങ്കുവെച്ചു.