‘‘ഈ സിനിമയില്‍ അമ്മ ഒരു ഫെയറി രാജകുമാരിയെപ്പോലെ; മുഴുവന്‍ ടീമും ഒരുമിച്ച് സൃഷ്ടിച്ച മാജിക്...’’ശ്രീദേവിയുടെ സിനിമ കണ്ട് ജാന്‍വി കപൂര്‍, പോസ്റ്റര്‍ പ്രിന്റ് ചെയ്ത ജാക്കറ്റില്‍ താരം

അമ്മയായ ശ്രീദേവിയെ എന്നും ആരാധനയോടെ അഭിമാനത്തോടെ ഓര്‍ക്കുന്ന മകളാണ് ജാന്‍വി കപൂര്‍. ഇപ്പോഴിതാ അമ്മയുടെ പഴയ തെലുങ്ക് ചിത്രം കണ്ട നൊസ്റ്റാള്‍ജിയ പങ്കിടുകയാണ് താരം.

Sreedevi, Janhvi Kapoor , jacket inspired by Jagadeka Veerudu Athiloka Sundari

Janhvi Kapoor wearing jacket printed Jagadeka Veerudu Athiloka Sundari movie (Image Source: Instagram)

അന്നുമിന്നും ബോളിവുഡിലെ നിത്യഹരിതനായികയാണ് ശ്രീദേവി. കൗമാരത്തില്‍ മാത്രമല്ല പിന്നീട് യൗവ്വനത്തിലും അമ്മവേഷങ്ങളിലുമടക്കം ജനഹൃദയങ്ങളില്‍ കുടിയേറിയ ഒട്ടേറെ കഥാപാത്രങ്ങളെ അനശ്വരമാക്കിയിട്ടുണ്ട് ശ്രീദേവി. ലൈംലൈറ്റില്‍ തിളങ്ങി നില്‍ക്കുന്ന സമയത്താണ് തന്റെ 54-ാം വയസില്‍ ശ്രീദേവി ഈ ലോകത്തോട് വിടപറഞ്ഞത്. ശ്രീദേവിയുടെ മകളെന്ന ലേബലിലാണ് ജാന്‍വി കപൂറിനെ ആരാധകര്‍ അറിഞ്ഞു തുടങ്ങിയത്. പക്ഷേ പിന്നീട് ബോളിവുഡില്‍ തന്റേതായ ഒരിടം നേടാന്‍ ജാന്‍വിക്ക് കഴിഞ്ഞു.
ഒരുപാട് ആരാധകരുള്ള ജാന്‍വി എന്നും അമ്മയെക്കുറിച്ച് പറയുമ്പോള്‍ കണ്ണുകള്‍ ഈറനണിയാറുണ്ട്. അമ്മയുടെ സിനിമകളെക്കുറിച്ച് അഭിമാനത്തോടെയാണ് ജാന്‍വി സംസാരിക്കാറുള്ളത്. അമ്മയെന്ന ലേഡി സൂപ്പര്‍സ്റ്റാറിന്റെ ഏറ്റവും വലിയ ആരാധികയാണ് ജാന്‍വിയെന്ന് താരത്തിന്റെ വാക്കുകളിലൂടെ എപ്പോഴും തിരിച്ചറിയാന്‍ കഴിയാറുണ്ട്.
ഇപ്പോഴിതാ അമ്മയുടെ തെലുങ്ക് ഫാന്റസി ചിത്രമായ ജഗദേക വീരുഡു അതിലോക സുന്ദരി കണ്ട സന്തോഷം പങ്കിടുകയാണ് ജാന്‍വി. തന്റെ അമ്മയും പ്രശസ്തയുമായ ശ്രീദേവിയെ ആദരിക്കുകയും ആ സിനിമയുടെ ഗൃഹാതുരത്വം നുകരുകയും ചെയ്യുകയുമാണ് താരം. അതില്‍ അഭിനയിച്ച, അണിയറയിലുണ്ടായിരുന്ന എല്ലാവരും നന്ദി കുറിച്ചാണ് താരത്തിന്റെ പോസ്റ്റ്. തെലുങ്ക് ചിത്രം ആലേഖനം ചെയ്ത ഡെനിം ജാക്കറ്റ് ധരിച്ച ഒരു കൂട്ടം ഫോട്ടോകൾ പങ്കിട്ടു, ഒപ്പം ചിത്രത്തോടും അതിന്റെ മാന്ത്രികതയോടും ഉള്ള തന്റെ ആഴമായ ആരാധന പ്രകടിപ്പിക്കുന്ന ഒരു ഹൃദയംഗമമായ ക്യാപ്ഷനും നല്‍കിയിട്ടുണ്ട് താരം.
‘‘ഈ ജാക്കറ്റിനോട് ഒരു ഭ്രമം... ഈ സിനിമയോട് ഒരു ഭ്രമം... രണ്ടു ദിവസം മുൻപ് റീ റിലീസ് ചെയ്ത് പുറത്തിറങ്ങിയ പ്രിന്റ് വീണ്ടും കാണാൻ കഴിഞ്ഞപ്പോൾ, മുഴുവൻ ടീമും ഒരുമിച്ച് സൃഷ്ടിച്ച മാജിക് ഓർമ്മ വന്നു... അമ്മ ഒരു മാലാഖ ഫെയറി രാജകുമാരിയെപ്പോലെയാണ്, വളരെ രസകരവും ക്യൂട്ട്...ചിരഞ്ജീവി കൊനിഡെല സര്‍, അദ്ദേഹത്തിന്റെ അനുകരണീയമായ നർമ്മം, ധൈര്യം, പൊങ്ങച്ചം രണ്ടും ഒരുമിച്ച്... രാഘവേന്ദ്ര സാറിന്റെ ദർശനം ... അമരീഷ് പുരി സര്‍... സംഗീതം, സെറ്റുകള്‍, വസ്ത്രാലങ്കാരങ്ങൾ, കഥ... എല്ലാ അഭിനേതാക്കളും... ഈ പുതിയ പ്രിന്റ് പുനരുജ്ജീവിപ്പിച്ചത് കൂടുതൽ കഴിവുള്ള കൈകൾക്ക് ചെയ്യാൻ കഴിയില്ല, ഇന്നത്തെ സിനിമാ പ്രേമികൾക്ക് ഒരു സമ്മാനമാണ്, പണത്തിനു വേണ്ടി ഓടുന്ന നമ്മുടെ സമകാലിക സിനിമകൾക്ക് നല്‍കുന്ന ഒരു ദൃശ്യാവിഷ്കാരമായി ഇത് അനുഭവപ്പെട്ടു. ഇതിന് നന്ദി ഈ സ്വപ്‌ന ദത്ത് ചലസാനി, വൈജയന്തി സിനിമകൾ, നാഗ് അശ്വിൻ, സിനിമ അതിന്റെ ഉന്നതിയിൽ എത്തിയതിന് നന്ദി JVAS...’’ എന്ന ക്യാപ്ഷനും നല്‍കി ശ്രീദേവിയുടെ സിനിമയായ ജഗദീക വീരുഡു അതിലോക സുന്ദരിയെ ടാഗ് ചെയ്ത് ജാന്‍വി കുറിച്ചിരിക്കുന്നത്.