' ജമ്മുവിലെ കുടുംബത്തിന്റെ സുരക്ഷയെ ഓര്‍ത്ത് ഉറക്കമില്ലാത്ത രാത്രികള്‍, ഇന്ത്യന്‍ സൈന്യത്തിന് നന്ദി' ; കുറിപ്പുമായി നടന്‍ ഷഹീര്‍ ഷെയ്ഖ്

ഇന്ത്യ- പാക്കിസ്ഥാന്‍ സംഘര്‍ഷം തുടരുന്ന സാഹചര്യത്തില്‍ ഇന്ത്യന്‍ സൈന്യത്തോട് നന്ദി പറഞ്ഞ് നടന്‍ ഷഹീര്‍ ഷെയ്ഖ്. ജമ്മുവിലെ ഭാദേര്‍വായില്‍ നിന്നുള്ള ഷഹീര്‍, സംഘര്‍ഷം തന്റെ കുടുംബത്തിന്, പ്രത്യേകിച്ച് ജമ്മുവിലുള്ള തന്റെ അമ്മയ്ക്കും സഹോദരിക്കും വരുത്തിയ വൈകാരിക ആഘാതം പങ്കുവെച്ചു. ജമ്മു, പത്താന്‍കോട്ട്, ഉദംപൂര്‍ എന്നിവിടങ്ങളിലെ സൈനിക മേഖലകളെ ലക്ഷ്യമിട്ട് പാകിസ്ഥാന്‍ നടത്തിയ ഡ്രോണ്‍, മിസൈല്‍ ആക്രമണങ്ങള്‍ അവരെ ബാധിച്ചതായും ഇന്‍സ്റ്റഗ്രാമില്‍ പങ്കുവെച്ച കുറിപ്പില്‍ നടന്‍ കുറിച്ചു.

'നമ്മുടെ സായുധ സേനയോട് എന്നും കടപ്പെട്ടിരിക്കുന്നു! എന്റെ അമ്മയും സഹോദരിയും ജമ്മുവിലാണ്... ആക്രമണങ്ങള്‍ നമുക്കെല്ലാവര്‍ക്കും ഉറക്കമില്ലാത്ത രാത്രികളാണ് സമ്മാനിച്ചത്. പക്ഷേ, നമ്മുടെ സൈന്യം പ്രതികരിച്ച കൃത്യത, വേഗത, ധൈര്യം എന്നിവ കാണുന്നത് ശ്രദ്ധേയമാണ്. ഒരു സൈനികന്‍ യുദ്ധമുഖത്തായിരിക്കുമ്പോള്‍ അവരുടെ കുടുംബങ്ങള്‍ അനുഭവിക്കുന്ന ബുദ്ധിമുട്ടുകള്‍ എനിക്ക് ഊഹിക്കാവുന്നതേയുള്ളൂ' ,ഷഹീര്‍ കുറിച്ചു.

സൈനികരുടെയും അവരുടെ കുടുംബങ്ങളുടെയും സഹിഷ്ണുതയെ അദ്ദേഹം അഭിവാദ്യം ചെയ്തു, 'സൈനികര്‍ക്ക് ആശംസകള്‍, അവരുടെ കുടുംബങ്ങള്‍ക്ക് ആശംസകള്‍. യുദ്ധക്കളത്തിലും പുറത്തുമുള്ള ഈ ധൈര്യമാണ് നമ്മുടെ രാജ്യത്തെയും അതിന്റെ നാട്ടുകാരെയും സുരക്ഷിതമായി നിലനിര്‍ത്തുന്നത്. ഈ ദുഷ്‌കരമായ സമയങ്ങളില്‍ പ്രിയപ്പെട്ടവരെ നഷ്ടപ്പെട്ട ആളുകള്‍ക്ക് എന്റെ ആത്മാര്‍ത്ഥ അനുശോചനം. ജയ് ഹിന്ദ്.