ആശുപത്രിയില്‍ ചികിത്സയിലിരുന്ന കുടുംബത്തിന്റെ 26 പവന്‍ മോഷ്ടിച്ചു ; ആശുപത്രി മുറിയില്‍ എത്തിയത് രോഗിയെ കാണാനെന്ന മട്ടില്‍

തൃപ്പൂണിത്തുറ/കട്ടപ്പന: ആശുപത്രിയില്‍ ചികിത്സയിലിരുന്ന കുടുംബത്തിന്റെ 26 പവന്‍ മോഷ്ടിച്ച കേസിലെ പ്രതിയെ അറസ്റ്റ് ചെയ്തു. കട്ടപ്പന ശാന്തിഗ്രാം പയ്യപ്പിള്ളി വീട്ടില്‍ ജെനീഷിനെയാണ് (38) അറസ്റ്റ് ചെയ്തത്.

തൃപ്പൂണിത്തുറ വടക്കേക്കോട്ട വിജയകുമാരമേനോന്‍ ആശുപത്രിയില്‍ കഴിഞ്ഞ 22 നായിരുന്നു മോഷണം നടന്നത്. ചികിത്സയിലിരുന്നതിനാല്‍ വീട്ടില്‍ സ്വര്‍ണം സൂക്ഷിക്കുന്നത് സുരക്ഷിതമല്ലെന്നു കരുതിയാണ് കുടുംബം 22 പവന്റെ സ്വര്‍ണ കൊയിനുകളും മൂന്ന് മാലയും കൈയില്‍ കരുതിയത്. രോഗിയെ കാണാനെന്ന മട്ടില്‍ ആശുപത്രിയില്‍ എത്തിയ പ്രതി മുറിയില്‍നിന്നു സ്വര്‍ണം മോഷ്ടിക്കുകയായിരുന്നു.

പ്രതിയെ ഏറ്റുമാനൂരില്‍നിന്നു പിടികൂടി. ഇയാള്‍ മുന്‍പും മോഷണ കേസുകളിലെ പ്രതിയാണെന്നു പോലീസ് പറഞ്ഞു. എറണാകുളത്തുള്ള ജ്വല്ലറിയില്‍നിന്നു സ്വര്‍ണം മാറ്റി വാങ്ങിയശേഷം മൂവാറ്റുപുഴയിലെ ജ്വല്ലറിയില്‍ പണയം വച്ചു.

ഈ പണം ഉപയോഗിച്ചു കാറും പ്രതി വാങ്ങിയെന്നു പോലീസ് പറഞ്ഞു. എ.സി.പി. പി.എസ്. ഷിജു, എസ്.ഐമാരായ കെ. അനില, ബാലചന്ദ്രന്‍, വിഷ്ണു. അനസ്, ജയകുമാര്‍, എം.ആര്‍. സന്തോഷ്, സീനിയര്‍ സിവില്‍ പോലീസ് ഓഫിസര്‍മാരായ ബൈജു, പോള്‍ എന്നിവര്‍ ചേര്‍ന്നാണു പ്രതിയെ അറസ്റ്റ് ചെയ്തത്.