പശ്ചിമേഷ്യൻ സംഘർഷത്തിനിടെ വ്യാജപ്രചാരണം; യുഎഇയിൽ അറസ്റ്റിലായ 35 പേരിൽ‌ 19 ഇന്ത്യക്കാരും; 23 ലക്ഷം പിഴ

ഇസ്രായേൽ, അമേരിക്ക, ഇറാൻ എന്നിവർ ഉൾപ്പെട്ട യുദ്ധവുമായി ബന്ധപ്പെട്ട് സോഷ്യൽ മീഡിയയിൽ തെറ്റായതും കെട്ടിച്ചമച്ചതുമായ വീഡിയോ ക്ലിപ്പുകൾ പ്രചരിപ്പിച്ചതിന് 19 ഇന്ത്യക്കാരടക്കം 35 പേരെ അറസ്റ്റ് ചെയ്യാൻ യുണൈറ്റഡ് അറബ് എമിറേറ്റ്സ് (UAE) ഉത്തരവിട്ടു.
യുഎഇയുടെ ഔദ്യോഗിക വാർത്താ ഏജൻസിയായ വാം (WAM) റിപ്പോർട്ട് ചെയ്തതനുസരിച്ച്, കസ്റ്റഡിയിലെടുത്തവരെ വേഗത്തിലുള്ള വിചാരണയ്ക്കായി കൈമാറിയിട്ടുണ്ട്. പിടിയിലായവരിൽ വിവിധ രാജ്യക്കാരായ 25 പേരുടെ പുതിയ പട്ടികയിൽ 17 ഇന്ത്യക്കാരുണ്ട്. ഇതിനുപുറമെ, ശനിയാഴ്ച അറസ്റ്റ് ചെയ്ത രണ്ട് ഇന്ത്യക്കാരടക്കം പത്ത് പേർ വേറെയുമുണ്ട്.

പൊതു ക്രമസമാധാനം തകർക്കാനും അസ്ഥിരതയുണ്ടാക്കാനും ലക്ഷ്യമിട്ടുള്ള വ്യാജ വിവരങ്ങളും ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് നിർമ്മിച്ച ഉള്ളടക്കങ്ങളും തടയുന്നതിനായി നടത്തിയ നിരീക്ഷണത്തിന് പിന്നാലെയാണ് ഈ നടപടിയെന്ന് അറ്റോർണി ജനറൽ ഡോ. ഹമദ് സെയ്ഫ് അൽ ഷംസി പ്രസ്താവനയിൽ പറഞ്ഞു.