ശമ്പളം കുത്തനെ ഉയരും; പക്ഷേ ബജറ്റിൽ ശമ്പള വർധനവ് പ്രഖ്യാപനമില്ല

കേന്ദ്ര ബജറ്റിൽ എട്ടാം ശമ്പള കമ്മീഷനെക്കുറിച്ച് അനുകൂലമായ പ്രഖ്യാപനങ്ങളുണ്ടാകുമെന്ന് ദശലക്ഷക്കണക്കിന് കേന്ദ്ര സർക്കാർ ജീവനക്കാരും പെൻഷൻകാരും പ്രതീക്ഷിച്ചിരുന്നു. എന്നാൽ ഫെബ്രുവരി ഒന്നിന് ധനമന്ത്രി നിർമ്മല സീതാരാമൻ അവതരിപ്പിച്ച ബജറ്റിൽ ശമ്പള വർദ്ധനവിനെക്കുറിച്ചോ പുതിയ കമ്മീഷൻ നടപ്പിലാക്കുന്നതിനെക്കുറിച്ചോ യാതൊരു പരാമർശവും ഉണ്ടായില്ല.

ബജറ്റിൽ സാമ്പത്തിക വളർച്ച, അടിസ്ഥാന സൗകര്യ വികസനം, മൂലധനച്ചെലവ് എന്നിവയ്ക്കാണ് പ്രധാനമായും ഊന്നൽ നൽകിയത്. ശമ്പള പരിഷ്കരണം സംബന്ധിച്ച ശുപാർശകൾ ഇതുവരെ അന്തിമഘട്ടത്തിൽ എത്താത്തതാണ് ഇതിന് പ്രധാന കാരണമായി ചൂണ്ടിക്കാട്ടുന്നത്. പുതിയ കമ്മീഷന്‍റെ ശുപാർശകൾ ലഭിച്ച ശേഷം മാത്രമേ ബജറ്റിൽ അതിനായുള്ള തുക വകയിരുത്തുകയുള്ളൂ.

ഇതിനകം എട്ടാം ശമ്പള കമ്മീഷന്‍റെ രൂപീകരണം സംബന്ധിച്ച പ്രവർത്തനങ്ങൾ ആരംഭിച്ചിട്ടുണ്ട്. കമ്മീഷന്‍റെ പ്രവർത്തന മാനദണ്ഡങ്ങൾക്ക് സർക്കാർ അംഗീകാരം നൽകുകയും ചെയ്തിട്ടുണ്ട്. എന്നിരുന്നാലും, നിലവിലെ ശമ്പള ഘടന, രാജ്യത്തെ സാമ്പത്തിക സ്ഥിതി, ജീവനക്കാരുടെ ആവശ്യങ്ങൾ എന്നിവ വിശദമായി പഠിച്ച് റിപ്പോർട്ട് സമർപ്പിക്കാൻ കമ്മീഷന് ഏകദേശം 18 മാസത്തെ സമയമാണ് അനുവദിച്ചിരിക്കുന്നത്. ഇതനുസരിച്ച് കമ്മീഷന്‍റെ റിപ്പോർട്ട് 2027 അവസാനമോ അല്ലെങ്കിൽ 2028 ആദ്യമോ മാത്രമേ സർക്കാരിന് മുന്നിൽ എത്തുകയുള്ളൂ.