ഫാൾ ഇൻ മലായലവ് (FIM) മൂന്നാമത് വാർഷിക സ്പീഡ് ഡേറ്റിംഗ് ഇവന്റ് വിജയകരമായി

ഷിക്കാഗോ: 2025 സെപ്റ്റംബർ 20 ശനിയാഴ്ച, ഫാൾ ഇൻ മലയാലവ് (FIM) തങ്ങളുടെ മൂന്നാമത് വാർഷിക സ്പീഡ് ഡേറ്റിംഗ് പരിപാടി ഷിക്കാഗോയിൽ (ഇലിനോയിസ്) വിജയകരമായി സംഘടിപ്പിച്ചു. മാറ്റ് ജോർജ്, ജൂലി ജോർജ് എന്നിവർ സ്ഥാപിച്ച ഈ സംഘടന, 2023-ൽ ഡാലസിലും 2024-ൽ ബ്രൂക്ക്ലിനിലും മലയാളി യുവജനങ്ങൾക്കായി സംഘടിപ്പിച്ച സ്പീഡ് ഡേറ്റിംഗ് ഇവന്റുകളിലൂടെ ശ്രദ്ധ നേടിയിരുന്നു

ഈ വർഷം, അമേരിക്കയിലുടനീളം നിന്ന് ഏകദേശം 800 അപേക്ഷകളാണ് ലഭിച്ചത്. അതിൽ നിന്ന് 150 പേരെയാണ് പരിപാടിയിലേക്ക് തിരഞ്ഞെടുത്തത്. തിരഞ്ഞെടുക്കപ്പെട്ടവരിൽ പകുതിയോളം പേർ മറ്റു സംസ്ഥാനങ്ങളിൽ നിന്ന് യാത്ര ചെയ്താണ് ഷിക്കാഗോയിൽ എത്തിയത്.

സ്പീഡ് ഡേറ്റിംഗ് റൗണ്ടുകൾ, ഗെയിംസ്, വിനോദ പരിപാടികൾ, ഡിന്നർ ബാങ്ക്വറ്റ് എന്നിവ കൂടാതെ, പ്രശസ്ത മലയാളി ഡിജെ ജയിൻ ജെയിംസ് (DJ Cub3d) അവതരിപ്പിച്ച ആഫ്റ്റർ പാർട്ടിയും പങ്കെടുത്തവർക്ക് മികച്ച അനുഭവം നൽകി.

പങ്കെടുക്കുന്നവർക്ക് ഓരോ സ്പീഡ് ഡേറ്റിംഗിനും 4 മിനിറ്റ് 30 സെക്കൻഡ് സമയം ലഭിച്ചു. പ്രായം, വിശ്വാസം (Denomination), ജീവിതശൈലി എന്നിവയിലെ പരസ്പര ഇഷ്ടങ്ങൾ പരിഗണിച്ച്, FIM വികസിപ്പിച്ചെടുത്ത കമ്പ്യൂട്ടർ അൽഗോരിതം ഉപയോഗിച്ചാണ് ഓരോ ജോഡിയെയും മുൻകൂട്ടി ക്രമീകരിച്ചത്. ശരാശരി, ഓരോരുത്തർക്കും 10 മുതൽ 15 വരെ പേരുമായി സ്പീഡ് ഡേറ്റിംഗിൽ പങ്കെടുക്കാൻ അവസരം ലഭിച്ചു.

FIM സ്വന്തമായി നിർമ്മിച്ച വെബ് ആപ്ലിക്കേഷൻ ഉപയോഗിച്ചാണ് ഡേറ്റിംഗിന് ശേഷമുള്ള അഭിപ്രായങ്ങൾ ഉടൻ രേഖപ്പെടുത്താൻ പങ്കെടുത്തവർക്ക് സാധിച്ചത്. പരസ്പര ഇഷ്ടം പ്രകടിപ്പിച്ചവർക്കുള്ള “മ്യൂച്വൽ മാച്ചുകളും” അവരുടെ കോൺടാക്റ്റ് വിവരങ്ങളും ഉടൻ തന്നെ ലഭ്യമായി. ഇവന്റിൽ പങ്കെടുത്തവരിൽ മൂന്നിൽ രണ്ടുപേർക്കെങ്കിലും കുറഞ്ഞത് ഒരു മ്യൂച്വൽ മാച്ച് ലഭിച്ചതായി സംഘടന സ്ഥിരീകരിച്ചു.

വേദിയിലെ സ്റ്റേജിൽ നടന്ന 'ലൈവ് ബ്ലൈൻഡ് ഡേറ്റ്' എന്ന പരിപാടിയും, ഗായികയും ഗാനരചയിതാവുമായ റേച്ചൽ ജോർജ് “മലയാളി ക്യൂപിഡ്” എന്ന കഥാപാത്രമായി അവതരിപ്പിച്ച ഷോയും പരിപാടിക്ക് കൂടുതൽ ആവേശം പകർന്നു. പങ്കെടുത്തവർക്ക് സന്ദേശങ്ങളും റോസാപ്പൂക്കളും വ്യക്തിപരമായി എത്തിച്ചുകൊടുക്കുന്നതിനായി രൂപകൽപ്പന ചെയ്ത ഈ പ്രത്യേക കഥാപാത്രം ഇവന്റിനെ രസകരമാക്കി.

FIM-ൻ്റെ വിജയത്തിന് പിന്നിൽ പ്രവർത്തിച്ച എക്സിക്യൂട്ടീവ് ടീമിൽ ടെക്നോളജി ഡയറക്ടർ സെബി പൊയ്‌കാട്ടിൽ, സ്പോൺസർഷിപ്പ് ഡയറക്ടർ ഷാരോൺ സാം, ഓപ്പറേഷൻസ് കോർഡിനേറ്റർ സൗമ്യ അബ്രഹാം എന്നിവർ നേതൃത്വം നൽകി.

FIM-ൻ്റെ വരാനിരിക്കുന്ന ഇവന്റുകളെക്കുറിച്ച് അറിയാൻ fallinmalayalove.com അഥവാ malayaleechrisians.com സന്ദർശിക്കുക. കൂടാതെ, ഇൻസ്റ്റാഗ്രാം @fallinmalayalove എന്ന പേജിലും പുതിയ വിവരങ്ങൾ ലഭിക്കും.

----------------------
മാർട്ടിൻ വിലങ്ങോലിൽ