' ഒഴിവാക്കാനാവാത്ത കാരണങ്ങളാല്‍ ' തലൈവര്‍ 173' ല്‍ നിന്നും പിന്മാറുന്നു' ; കുറിപ്പുമായി സംവിധായകന്‍ സുന്ദര്‍ സി

കമല്‍ഹാസന്‍ നിര്‍മിച്ച് രജനികാന്ത് നായകനാവുന്ന ' തലൈവര്‍ 173' എന്ന പ്രൊജക്റ്റില്‍ നിന്ന് താന്‍ പിന്മാറുന്നതായി സംവിധായകന്‍ സുന്ദര്‍ സി. വ്യാഴാഴ്ച അദ്ദേഹത്തിന്റെ പബ്ലിസിസ്റ്റാണ് ഈ പ്രഖ്യാപനം നടത്തിയത്. ഒഴിവാക്കാനാകാത്തതും അപ്രതീക്ഷിതവുമായ കാരണങ്ങളാണ് പദ്ധതിയില്‍ നിന്ന് പിന്മാറാന്‍ തന്നെ പ്രേരിപ്പിച്ചതെന്ന് ആരാധകര്‍ക്കും അഭ്യുദയകാംക്ഷികള്‍ക്കുമായി എഴുതിയ കുറിപ്പില്‍ സുന്ദര്‍ സി പറഞ്ഞു.

സുന്ദര്‍ സിയുടെ കുറിപ്പില്‍ നിന്ന്

ഭാരിച്ച ഹൃദയത്തോടെ ഒരു പ്രധാന വിവരം നിങ്ങളെ അറിയിക്കുകയാണ്. മുന്‍കൂട്ടി കാണാനും ഒഴിവാക്കാനുമാവാത്ത സാഹചര്യങ്ങളെ തുടര്‍ന്ന് തലൈവര്‍ 173 ല്‍ നിന്നും പിന്മാറുക എന്ന എടുക്കാന്‍ പ്രയാസമുള്ള തീരുമാനം ഞാന്‍ എടുത്തിരിക്കുകയാണ്. കമല്‍ ഹാസന്‍ നിര്‍മ്മിച്ച് രജനികാന്ത് നായകനാവുന്ന ഈ ചിത്രം എന്നെ സംബന്ധിച്ച് സ്വപ്നം യാഥാര്‍ഥ്യമാവുന്ന ഒന്നായിരുന്നു. എന്നാല്‍ ജീവിതത്തില്‍ നമുക്കുവേണ്ടി ഉള്ള പാതകളിലൂടെ നമുക്ക് സഞ്ചരിച്ചേ പറ്റൂ, അത് നമ്മുടെ സ്വപ്നങ്ങളില്‍ നിന്നുള്ള വ്യതിചലനമാണെങ്കിലും. ഞാന്‍ ഏറ്റവും ബഹുമാനിക്കുന്ന രണ്ട് പേരാണ് ഇവര്‍. അവര്‍ക്കൊപ്പം ദീര്‍ഘകാലത്തെ പ്രവര്‍ത്തി പരിചയവുമുണ്ട്. കഴിഞ്ഞ ഏതാനും ദിവസങ്ങളായി അവര്‍ക്കൊപ്പം ചെലവഴിച്ച നിമിഷങ്ങള്‍ ഞാന്‍ എന്നും ഓര്‍മ്മയില്‍ താലോലിക്കും. വിലമതിക്കാനാവാത്ത ചില പാഠങ്ങളാണ് അവര്‍ എനിക്ക് നല്‍കിയത്. മുന്നോട്ടുള്ള യാത്രയിലും അവരില്‍ നിന്നുള്ള പ്രചോദനം ഞാന്‍ സ്വീകരിക്കും. ഈ അവസരത്തില്‍ നിന്നും പിന്മാറുകയാണെങ്കിലും അവരുടെ ശിക്ഷണം ഇനിയും ഞാന്‍ തേടും. ഈ വലിയ ചിത്രത്തിനുവേണ്ടി എന്നെ തെരഞ്ഞെടുത്തതിന് എന്‍റെ ഹൃദയത്തിന്‍റെ അടിത്തട്ടില്‍ നിന്ന് ഞാന്‍ നന്ദി പറയുന്നു. ഈ ചിത്രത്തിനുവേണ്ടി ആവേശത്തോടെ കാത്തിരുന്നവരെ ഈ വാര്‍ത്ത നിരാശപ്പെടുത്തിയെങ്കില്‍ അവരോട് ഞാന്‍ ക്ഷമ ചോദിക്കുന്നു.

ഇത്ര വലിയ ഒരു പ്രോജക്റ്റില്‍ നിന്ന് ഔദ്യോഗിക പ്രഖ്യാപനത്തിന് ശേഷം അതിന്‍റെ സംവിധായകന്‍ പിന്മാറുന്നത് അപൂര്‍വ്വമാണ്. അതേസമയം രാജ്കമല്‍ ഫിലിംസില്‍ നിന്നുമുള്ള പ്രതികരണത്തിനായി കാത്തിരിക്കുകയാണ് സിനിമാപ്രേമികള്‍.