ബിഷപ്പ്-ഡെസിഗ്നേറ്റ് റവ. ഡോ. വിന്സെന്റ് വിനോദ് കുമാറിന്റെ സ്ഥാനാരോഹണ ശുശ്രൂഷ 2025 ഓഗസ്റ്റ് 4 നു
ചര്ച്ച് ഓഫ് സൗത്ത് ഇന്ത്യയുടെ കര്ണാടക സെന്ട്രല് മഹായിടവക ബിഷപ്പ്-ഡെസിഗ്നേറ്റായി റവ. ഡോ. വിന്സെന്റ് വിനോദ് കുമാര് തിരഞ്ഞെടുക്കപ്പെട്ടു.
*റവ. ഡോ. വിന്സെന്റ് വിനോദ് കുമാറിന്റെ ബിഷപ്പ് സ്ഥാനാരോഹണ ശുശ്രൂഷ 2025 ഓഗസ്റ്റ് 4-ാം തീയതി രാവിലെ 8:00 മണിക്ക് ബെംഗളൂരു സെന്റ് മാര്ക്സ് കത്തീഡ്രലില് വെച്ച് നടത്തപ്പെടും.* ചര്ച്ച് ഓഫ് സൗത്ത് ഇന്ത്യയുടെ മോഡറേറ്റര് മുഖ്യ കാര്മികനായിരിക്കും. സഭയുടെ ജനറല് സെക്രട്ടറി, ട്രഷറര്, മറ്റു ബിഷപ്പുമാര്, മഹായിടവക ഭാരവാഹികള്, പ്രസ്ബിറ്റര്മാര്, സുവിശേഷകര്, സിനഡ് ഡയറക്ടര്മാര്, വിശ്വാസ സമൂഹം എന്നിവര് ചടങ്ങില് പങ്കെടുക്കും.
മഹായിടവകയിലെ മുതിര്ന്ന പ്രസ്ബിറ്ററായ റവ. വിന്സെന്റ് ഇപ്പോള് കര്ണാടക സെന്ട്രല് മഹായിടവക സെക്രട്ടറി ആയി സേവനം അനുഷ്ഠിക്കുന്നു. 125 സഭകള്, 22 വിദ്യാഭ്യാസ സ്ഥാപനങ്ങള്, രണ്ട് മെഡിക്കല് സ്ഥാപനങ്ങള്, ഒരു തൊഴില് പരിശീലന കേന്ദ്രം, 12 ഹോസ്റ്റലുകളും ബോര്ഡിംഗ് ഹോമുകളും എന്നിവയിലേക്കുള്ള നേതൃത്വമാണ് അദ്ദേഹത്തിന് നല്കപ്പെട്ടിരിക്കുന്നത്. ഈ സ്ഥാപനങ്ങള് ബാംഗ്ലൂര് നോര്ത്ത്, ബാംഗ്ലൂര് സൗത്ത്, തുമ്കൂര്, കെ.ജി.എഫ് ജില്ലകളിലായി വ്യാപിച്ചിരിക്കുന്നു.
1965 ഏപ്രില് 7ന് ബെംഗളൂരുവിലാണ് അദ്ദേഹം ജനിച്ചു വളര്ന്നത്. ജയനഗറില് സ്ഥിതിചെയ്യുന്ന സുധര്ശന് വിദ്യാമന്ദിറില് തുടക്ക വിദ്യാഭ്യാസം, സൗത്ത് എന്റ് സര്കിളിലെ വിജയ ഹൈസ്കൂളിലും വിജയ കോളേജിലുമായാണ് പ്രീ-യൂണിവേഴ്സിറ്റി കോഴ്സ് പഠിച്ചത്. 1986-ല് ബംഗാര്പെട്ട് സൗത്ത് ഇന്ത്യ ബിബ്ലിക്കല് സെമിനറിയില് നിന്ന് തിയോളജിയില് ബിരുദം നേടി. തുടര്ന്ന് ബാംഗ്ലൂരിലെ യുണൈറ്റഡ് തിയോളജിക്കല് കോളേജില് നിന്ന് 1991-ല് ഡിവിനിറ്റി ബിരുദവും, മധുരയിലെ തമിഴ്നാട് തിയോളജിക്കല് സെമിനറിയില് നിന്ന് 1997-ല് തിയോളജിയില് മാസ്റ്റേഴ്സ് ബിരുദവും നേടി. പിന്നീട് 2013-ല് ദക്ഷിണ കൊറിയയിലെ സിയോള് നഗരത്തിലെ പ്രസ്ബിറ്റീരിയന് യൂണിവേഴ്സിറ്റി ആന്ഡ് തിയോളജിക്കല് സെമിനറിയില് നിന്ന് ഡോക്ടറേറ്റ് നേടി. 1991-ല് ഡീക്കനായി, 1992-ല് പ്രസ്ബിറ്ററായി അദ്ദേഹം അഭിഷിക്തനായി.
34 വര്ഷത്തിലധികം ശുശ്രൂഷാനുഭവമുള്ള അദ്ദേഹം ഹഡ്സണ് മെമോറിയല് ചര്ച്ച്, ഷാഫര് മെമോറിയല് ചര്ച്ച്, സി.എസ്.ഐ. ടോംലിന്സണ് ചര്ച്ച്, സ്റ്റീന് മെമോറിയല് ചര്ച്ച്, സോഡേ മെമോറിയല് ചര്ച്ച്, വില്യം ആര്ത്തര് മെമോറിയല് ചര്ച്ച്, കുനിഗലിലെ സി.എസ്.ഐ. ചര്ച്ച്, തുമ്കൂരിലെ വെസ്ലി ചര്ച്ച് എന്നിവയിലും നിലവില് ബെംഗളൂരിലെ സെന്റ് മാര്ക്സ് കത്തീഡ്രലിലും ശുശ്രൂഷ നിര്വഹിച്ചു.
മഹായിടവക പ്രവര്ത്തനങ്ങളിലും അദ്ദേഹം സജീവമായി പങ്കെടുത്തു. 2005-2009 കാലഘട്ടത്തില് തുമ്കൂര് ഏരിയ കൗണ്സിലിന്റെ ചെയര്മാനായി, 2013-2015, 2018-2021 കാലങ്ങളില് മന്ത്രിമാരുടെ കമ്മിറ്റി കോണ്വീനറായും, 2015-2018 കാലയളവില് ഭദ്രാസനത്തിലെ അസിസ്റ്റന്റ് സെക്രട്ടറി ആയും സേവനം അനുഷ്ഠിച്ചു. 2021-2024, 2024-2027 എന്നീ കാലയളവുകളില് രണ്ടു തവണയും ഭദ്രാസന സെക്രട്ടറി ആയി തിരഞ്ഞെടുക്കപ്പെട്ടിട്ടുണ്ട്. മിഷന്, വിദ്യാഭ്യാസം, ആരോഗ്യ പരിപാലനം എന്നിവയുമായി ബന്ധപ്പെട്ട പ്രവര്ത്തനങ്ങളില് പ്രധാന പങ്ക് വഹിച്ചു.
തിയോളജിക്കല് പരിശീലന കാലത്ത് നിരവധി പുരസ്കാരങ്ങള് അദ്ദേഹം നേടി: യു.ടി.സി ഫിനാന്ഷ്യല് കാമ്പെയ്ന് തൃതീയ സമ്മാനം (1989, 1990), ലെക്റ്റര്സ് പ്രൈസ് ഫോര് സ്ക്രിപ്ചര് റീഡിംഗ് (1990), ഡോ. എം. ജെ. ഡിര്ക്സ് മെമോറിയല് പ്രൈസ് ഫോര് കമ്മ്യൂണിക്കേഷന് (1991), ചാപ്പല് പ്രൈസ് ഫോര് ഓര്ഡര് ഓഫ് വര്ഷിപ്പ് (1991), ബിഷപ്പ് സുമിത്ര മെമോറിയല് പ്രൈസ് ഫോര് ചര്ച്ച് ഹിസ്റ്ററി (1991) എന്നിവയാണ് പ്രധാനതകള്. 1999-2004 കാലഘട്ടത്തില് ബൈബിള് സൊസൈറ്റി ഓഫ് ഇന്ത്യയുടെ കര്ണാടക ഓക്സിലറിയില് നിന്നുള്ള സര്ട്ടിഫിക്കറ്റും, കൊറിയയിലെ പ്രസ്ബിറ്റേറിയന് ചര്ച്ചില് നിന്ന് സുവിശേഷപ്രസംഗത്തിനുള്ള പുരസ്കാരവും ലഭിച്ചിട്ടുണ്ട്.
എന്.സി.സി.ഐ. സംഘടിപ്പിച്ച ദേശീയ യുവജന അസംബ്ലി (1991), ബി.റ്റി.ഇ.എസ്.എസ്.സി. കമ്മ്യൂണിക്കേഷന് വര്ക്ക്ഷോപ്പ് (1992), ന്യൂഡെല്ഹിയിലെ ട്രാസി വര്ക്ക്ഷോപ്പ് (1993), ഗുരുകുള് കണ്സള്ട്ടേഷന് (1994) തുടങ്ങിയവയിലും അദ്ദേഹം പങ്കെടുത്തു.
മിഷനറി പ്രവര്ത്തനത്തിലും വൈദിക വിദ്യാഭ്യാസത്തിലും അദ്ദേഹത്തിന് സമഗ്രമായ പങ്കാളിത്തം ഉണ്ടായിരുന്നു. 1986-1987 കാലഘട്ടത്തില് ഇന്ത്യന് ഇവാഞ്ചലിക്കല് മിഷനില് ചുരുങ്ങിയ കാലം മിഷണറിയായി സേവനം അനുഷ്ഠിച്ചു. മംഗളൂരിലെ KACES ഹോസ്റ്റലിന്റെ വാര്ഡന് (1987-1988), കര്ണാടക ക്രിസ്ത്യന് കമ്മ്യൂണിക്കേഷന് സെന്ററിന്റെ ഡയറക്ടര് (1993-1995, 1997-1998), കര്ണാടക തിയോളജിക്കല് കോളേജിലും യു.ടി.സി-യിലും ഗസ്റ്റ് ലക്ചറര് (1993-2007, 2013-2016), ബൈബിള് സൊസൈറ്റി ഓഫ് ഇന്ത്യയുടെ സെക്രട്ടറി (1999-2004), വിഷ്രാന്തി നിലയത്തിന്റെ അഡൈ്വസറി ബോര്ഡ് ചെയര്മാന് (2018-2025), ബിഷപ്പ് കോട്ടണ് സ്കൂളുകളും കോളേജുകളും ഉള്പ്പെടുന്ന വിവിധ വിദ്യാഭ്യാസ സ്ഥാപനങ്ങളുടെ വൈസ് ചെയര്മാനും ബോര്ഡ് അംഗവുമായും സേവനം അനുഷ്ഠിക്കുന്നു.
അന്താരാഷ്ട്ര തലത്തില്, ആസിയന് ഫണ്ട്രെയ്സിങ് വര്ക്ക്ഷോപ്പ് (മണില, 2002), മാര്ക്കറ്റിങ് വര്ക്ക്ഷോപ്പ് (ബാങ്കോക്ക്, 2002), നോര്ത്ത് തെയിംസ് സിനഡിലും ഗ്ലോസ്റ്റെര് ഭദ്രാസനത്തിലുമുള്ള ചര്ച്ചുകളിലും (യു.കെ., 2005), ഈജിപ്ത്, ഇസ്രായേല്, ജോര്ദ്ദാന്, പാലസ്തീന് എന്നിവിടങ്ങളിലായുള്ള പഠനയാത്ര (2007), കൊറിയയിലെ ഡോക്ടറല് പഠനം (2010-2013) എന്നീ തലത്തില് ഇടപെട്ടിട്ടുണ്ട്.
റവ. ഡോ. വിന്സെന്റ് വിനോദ് കുമാര്, സജീവ ക്രിസ്ത്യന് പ്രവര്ത്തകയും, അധ്യാപികയുമായ ശ്രീമതി കരോലിന് അനീറ്റയെയാണ് വിവാഹം കഴിച്ചിരിക്കുന്നത്. സ്ത്രീജനസഖ്യം, ക്രിസ്തീയ വിദ്യാഭ്യാസരംഗം, ബൈബിള് പഠനം എന്നിവയില് അവര് സജീവമായ സാന്നിധ്യമാണ്. മകന് നിതിന് കാലെബ് ANZ ബാങ്കില് ജോലിചെയ്യുന്നു. മരുമകള് എവര്ല് ഹൈസ്കൂള് അദ്ധ്യാപികയാണ്.
പി.പി. ചെറിയാന്
