റഷ്യക്ക് സമീപം ആണവ അന്തര്വാഹിനികള് വിന്യസിക്കാന് ട്രംപിന്റെ ഉത്തരവ്
വാഷിംഗ്ടണ് ഡി സി : മുന് റഷ്യന് പ്രസിഡന്റ് ദിമിത്രി മെദ്വദേവിന്റെ ഭീഷണികള്ക്ക് മറുപടിയായി റഷ്യയ്ക്ക് സമീപം രണ്ട് ആണവ അന്തര്വാഹിനികള് സ്ഥാപിക്കാന് ഉത്തരവിട്ടതായി യുഎസ് പ്രസിഡന്റ് ഡൊണാള്ഡ് ട്രംപ് വെള്ളിയാഴ്ച അറിയിച്ചു. മെദ്വദേവിന്റെ പ്രസ്താവനകള് ''മണ്ടത്തരവും പ്രകോപനപരവുമാണ്'' എന്ന് ട്രംപ് ഒരു സോഷ്യല് മീഡിയ പോസ്റ്റില് കുറിച്ചു.
''ഈ മണ്ടത്തരവും പ്രകോപനപരവുമായ പ്രസ്താവനകള് അതിര് കടന്നാല്, ഉചിതമായ പ്രദേശങ്ങളില് രണ്ട് ആണവ അന്തര്വാഹിനികള് സ്ഥാപിക്കാന് ഞാന് ഉത്തരവിട്ടിട്ടുണ്ട്,'' ട്രംപ് വ്യക്തമാക്കി. വാക്കുകള്ക്ക് വലിയ പ്രാധാന്യമുണ്ടെന്നും അപ്രതീക്ഷിത പ്രത്യാഘാതങ്ങള് ഉണ്ടാക്കാമെന്നും അദ്ദേഹം കൂട്ടിച്ചേര്ത്തു.
റഷ്യ യുക്രെയ്നില് വെടിനിര്ത്തല് പ്രഖ്യാപിക്കാന് 10 ദിവസത്തെ സമയപരിധി ട്രംപ് ചൊവ്വാഴ്ച നല്കിയതിന് പിന്നാലെയാണ് ഇരു നേതാക്കളും തമ്മിലുള്ള വാക്പോര് രൂക്ഷമായത്. ട്രംപിന്റെ സമയപരിധി പാലിക്കുന്നതില് റഷ്യ ഇതുവരെ യാതൊരു സൂചനയും നല്കിയിട്ടില്ല. ''അന്തിമ നിര്ദ്ദേശങ്ങളുടെ കളി''യിലാണ് ട്രംപ് ഏര്പ്പെട്ടിരിക്കുന്നതെന്ന് മെദ്വദേവ് തിങ്കളാഴ്ച ആരോപിച്ചിരുന്നു. ഇതിന് മറുപടിയായി ''തന്റെ വാക്കുകള് ശ്രദ്ധിക്കുക'' എന്ന് ട്രംപ് മെദ്വദേവിനോട് ആവശ്യപ്പെടുകയും, അവസാന ആശ്രയമായി റഷ്യക്ക് സോവിയറ്റ് കാലഘട്ടത്തിലെ ആണവാക്രമണ ശേഷിയുണ്ടെന്ന് ഓര്മ്മിപ്പിക്കുകയും ചെയ്തു.
2022-ല് റഷ്യ യുക്രെയ്നിലേക്ക് സൈന്യത്തെ അയച്ചതിന് ശേഷം പാശ്ചാത്യ വിരുദ്ധ നിലപാടുകള് ശക്തമാക്കിയ നേതാവാണ് മെദ്വദേവ്.
പി.പി. ചെറിയാന്
