യുഎസ് ആക്രമണങ്ങള്‍ ഇറാനിലെ ആണവപദ്ധതിയെ തകര്‍ത്തില്ലെന്ന് ഇന്റലിജന്റ്‌സ് ; റിപ്പോര്‍ട്ട് തള്ളി ട്രംപ്

വാഷിംഗ്ടണ്‍: ഇസ്രായേലും ഇറാനും വെടിനിര്‍ത്തലിന് സമ്മതിച്ചതിന് പിന്നാലെ പശ്ചിമേഷ്യ ശാന്തതയിലേക്ക്. 12 ദിവസം നീണ്ട ആക്രമണം ഇസ്രായേലും ഇറാനും അവസാനിപ്പിച്ചു. എന്നിരുന്നാലും, ഇറാനിലെ യുഎസ് ആക്രമണങ്ങള്‍ ടെഹ്റാന്റെ ആണവ പദ്ധതിയെ തകര്‍ത്തില്ലെന്നാണ് പുതിയ ഇന്റല്‍ റിപ്പോര്‍ട്ട് അവകാശപ്പെടുന്നത്. യുഎസ് പ്രസിഡന്റ് ഡൊണാള്‍ഡ് ട്രംപ് ഇത് തള്ളി. ഇറാനിലെ ഫൊര്‍ദോ, നതാന്‍സ്, ഇസ്ഫഹാന്‍ എന്നിവിടങ്ങളിലെ ആണവകേന്ദ്രങ്ങളില്‍ അമേരിക്ക നടത്തിയ ആക്രമണം പരാജയമായിരുന്നുവെന്ന ഇന്റലിജന്‍സ് വിലയിരുത്തല്‍.

എന്നാല്‍ റിപ്പോര്‍ട്ട് പുറത്തുവന്നതിന് പിന്നാലെ യുഎസ് പ്രസിഡന്റ് ഡൊണാള്‍ഡ് ട്രംപ് ബുധനാഴ്ച മാധ്യമങ്ങളെ വിമര്‍ശിച്ചു, ഇത് ടെഹ്റാന്റെ ആണവ പരിപാടി 'തുടച്ചുമാറ്റി' എന്ന തന്റെ ഭരണകൂടത്തിന്റെ അവകാശവാദങ്ങളെ സംശയത്തിന്റെ മുനയില്‍ നിര്‍ത്തുന്നതാണെന്ന് അഭിപ്രായപ്പെട്ടു. ചരിത്രത്തിലെ ഏറ്റവും വിജയകരമായ സൈനിക ആക്രമണങ്ങളില്‍ ഒന്നിനെ തരംതാഴ്ത്താനുള്ള ശ്രമമാണ് റിപ്പോര്‍ട്ടുകളെന്ന് അദ്ദേഹം പറഞ്ഞു. ടെഹ്റാന്റെ ആണവ പദ്ധതി 'പൂര്‍ണ്ണമായി നശിപ്പിക്കപ്പെട്ടു' എന്ന് അദ്ദേഹം തറപ്പിച്ചു പറഞ്ഞു.

യുഎസ് നേതാവ് തന്റെ ട്രൂത്ത് സോഷ്യല്‍ പ്ലാറ്റ്ഫോമിലെ ഒരു പോസ്റ്റില്‍ മാധ്യമങ്ങളെ രൂക്ഷമായിട്ടാണ് വിമര്‍ശിച്ചിരിക്കുന്നത്. ഇറാന്റെ മൂന്ന് ആണവകേന്ദ്രങ്ങള്‍ -- ഫോര്‍ഡോ, നതാന്‍സ്, ഇസ്ഫഹാന്‍ -- 18 മീറ്റര്‍ (60 അടി) കോണ്‍ക്രീറ്റ് അല്ലെങ്കില്‍ 61 മീറ്റര്‍ (200 അടി) ഭൂമിയില്‍ പൊട്ടിത്തെറിക്കാന്‍ ശേഷിയുള്ള 'ബങ്കര്‍ ബസ്റ്റര്‍' ബോംബുകള്‍ ഉപയോഗിച്ച് തകര്‍ത്തെന്നാണ് അവകാശവാദം. എന്നാല്‍ ഇറാനെതിരായ യുഎസ് ആക്രമണങ്ങള്‍ ട്രംപ് അവകാശപ്പെടുന്നതുപോലെ ടെഹ്റാന്‍ ആണവ പദ്ധതിയെ നശിപ്പിക്കുന്നതിനുപകരം ഏതാനും മാസങ്ങള്‍ മാത്രം പിന്നോട്ട് വലിക്കാനേ കഴിഞ്ഞുള്ളൂ എന്ന പ്രാഥമിക റിപ്പോര്‍ട്ടില്‍ യുഎസ് ഇന്റലിജന്‍സ് പറയുന്നു.

ഡിഫന്‍സ് ഇന്റലിജന്‍സ് ഏജന്‍സിയുടെ കണ്ടെത്തലുകള്‍ പരിചിതരായ ആളുകളെ ഉദ്ധരിച്ച് യുഎസ് മാധ്യമങ്ങള്‍ ചൊവ്വാഴ്ച റിപ്പോര്‍ട്ട് ചെയ്തിരുന്നു. വാരാന്ത്യ ആക്രമണങ്ങള്‍ ഇറാന്റെ സെന്‍ട്രിഫ്യൂജുകളോ സമ്പുഷ്ടമായ യുറേനിയത്തിന്റെ ശേഖരമോ പൂര്‍ണ്ണമായും ഇല്ലാതാക്കിയില്ലെന്നും ഭൂഗര്‍ഭ കെട്ടിടങ്ങള്‍ നശിപ്പിക്കാതെ ചില സൗകര്യങ്ങളിലേക്കുള്ള പ്രവേശന കവാടങ്ങള്‍ അടച്ചുപൂട്ടിയെന്നുമാണ് പറയുന്നത്.

ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു ഇറാനെതിരായ തന്റെ രാജ്യം 12 ദിവസത്തെ യുദ്ധത്തില്‍ 'ചരിത്രപരമായ വിജയത്തെ' പ്രശംസിക്കുകയും ടെഹ്റാന്‍ ആണവ കേന്ദ്രങ്ങള്‍ പുനര്‍നിര്‍മിക്കുന്നതില്‍ നിന്ന് തടയുമെന്ന് പ്രതിജ്ഞയെടുക്കുകയും ചെയ്തു. 'ഞങ്ങള്‍ ഒരു ചരിത്ര വിജയം നേടി...ഇറാന്‍ ഒരിക്കലും ആണവായുധം ഉണ്ടാകില്ല. ഇറാന്റെ ആണവ പദ്ധതി ഞങ്ങള്‍ തകര്‍ത്തു. ഇറാനില്‍ ആരെങ്കിലും അത് പുനര്‍നിര്‍മ്മിക്കാന്‍ ശ്രമിച്ചാല്‍, അതേ ദൃഢതയോടെ, അതേ തീവ്രതയോടെ, ഏത് ശ്രമവും പരാജയപ്പെടുത്താന്‍ ഞങ്ങള്‍ പ്രവര്‍ത്തിക്കും,' നെതന്യാഹു പറഞ്ഞു.

അതേസമയം, വെടിനിര്‍ത്തല്‍ കരാര്‍ നിലവില്‍ വന്നതോടെ അമേരിക്കയുമായുള്ള ആണവ ചര്‍ച്ചകളിലേക്ക് മടങ്ങാന്‍ തയ്യാറാണെന്ന് ഇറാന്‍ അറിയിച്ചു. എന്നാല്‍ ആണവോര്‍ജ്ജത്തിന്റെ സമാധാനപരമായ ഉപയോഗത്തിന് തന്റെ രാജ്യം 'നിയമപരമായ അവകാശങ്ങള്‍' ഉറപ്പിക്കുന്നത് തുടരുമെന്ന് ഇറാന്‍ പ്രസിഡന്റ് മസൂദ് പെസെഷ്‌കിയന്‍ പറഞ്ഞു. പതിറ്റാണ്ടുകളായി ഇറാനും ഇസ്രായേലും നിഴല്‍ യുദ്ധത്തില്‍ അകപ്പെട്ടിരിക്കുമ്പോള്‍, അവരുടെ 12 ദിവസത്തെ പോരാട്ടം അവര്‍ തമ്മിലുള്ള ഏറ്റവും വിനാശകരമായ ഏറ്റുമുട്ടലായിരുന്നു.