-->
സിനിമാ സെറ്റില് ലഹരി ഉപയോഗിച്ച ഒരു നടനില് നിന്നുണ്ടായ ദുരനുഭവം തുറന്നുപറഞ്ഞ നടി വിന്സി അലോഷ്യസിന് പിന്തുണയുമായി താരസംഘടന അമ്മ. വിൻസിയുടെ തുറന്നു പറച്ചിൽ അഭിനന്ദനാർഹമാണെന്നും പരാതി ലഭിച്ചാൽ ആരോപണവിധേയനെതിരെ നടപടി എടുക്കുമെന്നും താരസംഘടന അറിയിച്ചു. വിഷയം ചർച്ച ചെയ്യാൻ കഴിഞ്ഞ ദിവസം അഡ്ഹോക്ക് കമ്മറ്റി യോഗം ചേർന്നു.
ലഹരി ഉപയോഗിക്കുന്നവര്ക്കൊപ്പം അഭിനയിക്കില്ലെന്ന് നടി വിന്സി അലോഷ്യസ് അടുത്തിടെ പറഞ്ഞ വീഡിയോ വൈറലായിരുന്നു. ഇതിന് പിന്നാലെ നടിക്കെതിരെ സൈബര് ആക്രമണവും നടന്നിരുന്നു. പ്രസ്തുത തീരുമാനം എടുക്കാനുള്ള കാരണം വ്യക്തമാക്കിക്കൊണ്ട് പിന്നാലെ വിന്സി സോഷ്യല് മീഡിയയില് പോസ്റ്റ് ചെയ്ത വീഡിയോ പ്രതികരണം വൈറല് ആയിരുന്നു. ഒരു പ്രധാന നടന് ഒരു ചിത്രത്തിന്റെ സെറ്റില് പരസ്യമായി ലഹരി ഉപയോഗിച്ച് ശല്യമുണ്ടാക്കിയെന്നാണ് വീഡിയോയില് വിന്സി പറഞ്ഞത്.