ജസ്ലിയ ജോണ്‍സന്റെ അവയവങ്ങള്‍ ദാനം ചെയ്യും ; കാര്‍ ആലപ്പുഴയില്‍ നിന്നും കണ്ടെത്തി

കൊച്ചി: അങ്കമാലിയില്‍ അപകടത്തിനിരയായി മസ്തിഷ്‌ക്ക മരണം സംഭവിച്ച ജസ്ലിയ ജോണ്‍സന്റെ അവയവങ്ങള്‍ ദാനം ചെയ്യും. ഫെബ്രുവരി 28ന് വൈകിട്ട് ഏഴരയോടെയാണ് അങ്കമാലി ഹോം സയന്‍സ് കോളജിന് സമീപത്തുവെച്ച് ജസ്ലിയയെ വാഹനമിടിച്ചത്.

കാര്‍ ഇടിച്ച് തലയ്ക്ക് ഗുരുതര പരിക്കേല്‍ക്കുകയായിരുന്നു. അപകടത്തിന് പിന്നാലെ മസ്തിഷ്‌ക മരണം സംഭവിച്ചതോടെ ജസ്ലിയയുടെ കാര്യത്തില്‍ കുടുംബം അവയവദാനത്തിന് തീരുമാനം എടുക്കുകയായിരുന്നു. കരള്‍, വൃക്ക, നേത്രപടലം എന്നീ അവയവങ്ങളാണ് ദാനം ചെയ്തത്.

വൃക്കകള്‍ കോട്ടയം മെഡിക്കല്‍ കോളേജിലേക്കും കൊച്ചി അമൃത ആശുപത്രിയിലേക്കും നേത്രപടലം ലിറ്റില്‍ ഫ്‌ലവര്‍ ആശുപത്രിയിലെ രോഗിക്കും നല്‍കും. കരള്‍ രാജഗിരി ആശുപത്രിയിലേക്കാണ് നല്‍കുന്നത്. ഇടിച്ച വാഹനം പോലീസ് ആലപ്പുഴയില്‍ നിന്നും കണ്ടെത്തി.

അതേസമയം വാഹനം ഓടിച്ചയാളെ ഇതുവരെ പിടികൂടാനായില്ല. എന്നാല്‍ ആളെ തിരിച്ചറിയുകയും ചെയ്തു. അതിരമ്പുഴ സ്വദേശി ജോര്‍ജ് തോമസിന്റേതാണ് വാഹനം. ജോര്‍ജ് തോമസിന്റെ മകന്‍ ഡോ. സിറിയക്ക് ആണ് വാഹനം ഓടിച്ചിരുന്നത്.

അപകടമുണ്ടാക്കിയ വാഹനം അന്വേഷണത്തിനൊടുവില്‍ ആലപ്പുഴ തുറവൂരില്‍ നിന്നാണ് പൊലീസ് കണ്ടെത്തിയത്. മഹീന്ദ്ര എക്‌സ്് യു വി 700 വാഹനമായിരുന്നു ജസ്ലിയയെ ഇടിച്ചത്. പഠനത്തിന് പുറമേ യൂണിവേഴ്‌സിറ്റി കായിക താരം കൂടിയായിരുന്നു ജസ്ലിയ.