ജ്യോതിഷാലയത്തിലെ മുറിയിലെ ചുവരില് ചോരപ്പാടുകള് ,വൈറല് ജോത്സ്യന്റെ പീഡന ശ്രമം
കൊല്ലം: മാതാവിനൊപ്പം പൂജയ്ക്ക് എത്തിയ പതിനാറുകാരിയെ പീഡിപ്പിക്കാന് ശ്രമിച്ച് പിടിയിലായ വ്യാജ ജോത്സ്യന് വി.എസ്. മുരാരി തന്ത്രി എന്നറിയപ്പെടുന്ന രാജന്ബാബുവിന്റെ വെണ്ടാറിലെ ജ്യോതിഷാലയത്തിലെ മുറിയിലെ ചുവരില് ചോരപ്പാടുകള് കണ്ടെത്തി. ഫോറന്സിക് സംഘം സാമ്പിള് ശേഖരിച്ചു.
രാജന്ബാബു പെണ്കുട്ടിയെ മര്ദിച്ചിരുന്നതായി പോലീസ് സംശയിക്കുന്നു. ഇത് സംബന്ധിച്ച് വിശദമായ അന്വേഷണം ആരംഭിച്ചു. ഞായറാഴ്ച വൈകിട്ട് ബാധയൊഴിപ്പിക്കലിനായി മാതാവിനൊപ്പം എത്തിയ പതിനാറുകാരിയെ ജോത്സ്യന് ലൈംഗികമായി പീഡിപ്പിക്കാന് ശ്രമിച്ചെന്നാണ് കേസ്. സംഭവശേഷം മൊബൈല് ഫോണ് സ്വിച്ച് ഓഫ് ചെയ്ത് പ്രതി ഒളിവില് പോയി. രാത്രി മുഴുവന് തെരഞ്ഞെങ്കിലും പ്രതിയെ കണ്ടെത്താനായില്ല. തിങ്കളാഴ്ചയാണ് ഭരണിക്കാവിലെ ഒരു ലോഡ്ജില്നിന്ന് പുത്തൂര് പോലീസ് ഇയാളെ പിടികൂടിയത്.
സാമൂഹിക മാധ്യമങ്ങളില് റീല്സുകള് പോസ്റ്റ് ചെയ്ത് സജീവമായിരുന്ന രാജന്ബാബു, മുരാരി തന്ത്രിയെന്ന പേരിലാണ് അറിയപ്പെട്ടിരുന്നത്. പാട്ടും ഡാന്സുമാണ് പ്രിയം.
വെണ്ടാറിലെ മുരാരി ജ്യോതിഷാലയത്തില് ജില്ലയ്ക്കു പുറത്തു നിന്നടക്കം നിരധിയാളുകള് ദിവസേന വന്നുപോയിരുന്നു. ആഢംബര ജീവിതമാണു നയിച്ചിരുന്നത്. ഓട്ടോ തൊഴിലാളിയായിരുന്ന രാജന് ബാബു, മുരാരി തന്ത്രിയെന്ന സമ്പന്നനായ ജ്യോത്സ്യനായി വളര്ന്നതില് ദുരൂഹതയുണ്ടെന്നു നാട്ടുകാര് പറയുന്നു.
