കഴക്കൂട്ടം എലിവേറ്റഡ് ഹൈവേയില്‍ വാഹനാപകടം; യുവാവ് മരിച്ചു, 2 പേരുടെ നില ഗുരുതരം

തിരുവനന്തപുരം ദേശീയപാതയില്‍ കഴക്കൂട്ടത്ത് വാഹനാപകടത്തില്‍ യുവാവ് മരിച്ചു. ബാലരാമപുരം സ്വദേശി ഷിബിനാണ് മരിച്ചത്. കഴക്കൂട്ടം എലിവേറ്റഡ് ഹൈവേയിലാണ് അപകടമുണ്ടായത്. നിയന്ത്രണം വിട്ട ഥാർ ജീപ്പ് ഹൈവേയിലെ തൂണില്‍ ഇടിച്ചാണ് അപകടമുണ്ടായത്. സംഭവത്തിൽ കഴക്കൂട്ടം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

കാറിലുണ്ടായിരുന്ന യുവതിയടക്കം രണ്ട് പേരുടെ നില ഗുരുതരമാണ്. കാറോടിച്ചിരുന്നയാളാണ് മരിച്ചത്. ഥാർ അമിത വേഗതയിലായിരുന്നുവെന്നാണ് വിവരം. റേസിംഗിനിടെയാണോ അപകടമുണ്ടായതെന്നും പോലീസ് സംശയിക്കുന്നു. അപകടത്തിൽപ്പെട്ട ഥാറിന്റെ മുൻഭാഗം പൂർണമായും തകർന്നു. ഇന്നലെ രാത്രി 12 മണിയോടെയാണ് അപകടം.

മാരായമുട്ടം സ്വദേശി രജനീഷ് (27), ബാലരാമപുരം സ്വദേശി ഷിബിൻ (28), പോങ്ങുംമൂട് സ്വദേശി കിരൺ (29), സി.വി.ആർ പുരം സ്വദേശിനി അഖില (28), കൈമനം സ്വദേശിനി ശ്രീലക്ഷ്മി (23) എന്നിവരാണ് വാഹനത്തിൽ ഉണ്ടായിരുന്നത്. സംഭവം നടന്ന് ഉടൻ തന്നെ നാട്ടുകാരും പോലീസും ചേർന്ന് ഇവരെ മെഡിക്കൽ കോളേജ് ആശുപത്രിയിലെത്തിച്ചു.