രണ്ട് രാജ്യങ്ങളുടെ അംബാസഡറായി മലയാളി ഐഎഫ്എസ് ഉദ്യോ​ഗസ്ഥ ന​ഗ്മ മുഹമ്മദ് മല്ലിക്

റിപ്പബ്ലിക് ഓഫ് മാർഷൽ ഐലൻഡിലെ ഇന്ത്യൻ അംബാസഡറായി ജപ്പാനിലെ ഇന്ത്യൻ അംബാസഡറായ നഗ്മ മുഹമ്മദ് മല്ലിക്കിനെ അംഗീകാരം നൽകിയതായി വിദേശകാര്യ മന്ത്രാലയം തിങ്കളാഴ്ച അറിയിച്ചു. നഗ്മ മുഹമ്മദ് മല്ലിക് ഉടൻ തന്നെ നിയമനം ഏറ്റെടുക്കുമെന്ന് മന്ത്രാലയം പ്രസ്താവനയിൽ പറഞ്ഞു.

മാർഷൽ ദ്വീപുകൾ മധ്യ പസഫിക് സമുദ്രത്തിൽ സ്ഥിതി ചെയ്യുന്ന ദ്വീപ് രാഷ്ട്രമാണ്. ഹവായിക്കും ഓസ്ട്രേലിയയ്ക്കും ഇടയിൽ ഏകദേശം പകുതിയോളം മൈക്രോനേഷ്യ മേഖലയിലാണ് ഇത് സ്ഥിതി ചെയ്യുന്നത്. 1991 ബാച്ച് ഇന്ത്യൻ വിദേശകാര്യ സർവീസ് ഉദ്യോ​ഗസ്ഥയാണ് ന​ഗ്മ. ഇംഗ്ലീഷ് സാഹിത്യത്തിൽ ബിരുദവും സോഷ്യോളജിയിൽ ബിരുദാനന്തര ബിരുദവുംനേടി.

ഇംഗ്ലീഷ്, ഫ്രഞ്ച്, ഹിന്ദി, ഉറുദു, മലയാളം എന്നീ ഭാഷകൾ സംസാരിക്കും. പാരീസിൽ നിന്നാണ് നഗ്മ മുഹമ്മദ് മല്ലിക് തന്റെ നയതന്ത്ര ജീവിതം ആരംഭിച്ചത്. അവിടെ ഇന്ത്യൻ എംബസിയിലും യുനെസ്കോയിലേക്കുള്ള ഇന്ത്യൻ മിഷനിലും സേവനമനുഷ്ഠിച്ചു.

വിദേശകാര്യ മന്ത്രാലയത്തിന്റെ വെസ്റ്റ് യൂറോപ്പ് ഡിവിഷനിൽ ഡെസ്ക് ഓഫീസറായും തുടർന്ന് പ്രധാനമന്ത്രിയുടെ ഓഫീസിൽ (പിഎംഒ) പ്രധാനമന്ത്രി ഐ കെ ഗുജ്‌റാലിന്റെ പേഴ്‌സണൽ സ്റ്റാഫായും നഗ്മ മുഹമ്മദ് മല്ലിക് ഇന്ത്യാ ഗവൺമെന്റിന്റെ വിവിധ പദവികളിൽ സേവനമനുഷ്ഠിച്ചു. ആദ്യത്തെ വനിതാ ഡെപ്യൂട്ടി ചീഫ് ഓഫ് പ്രോട്ടോക്കോൾ (സെറിമോണിയൽ) ആയും സേവനമനുഷ്ഠിച്ചു. നേപ്പാളിലെയും ശ്രീലങ്കയിലെയും ഇന്ത്യയുടെ നയതന്ത്ര ദൗത്യങ്ങളിൽ ഫസ്റ്റ് സെക്രട്ടറിയും കൗൺസിലറുമായി സേവനമനുഷ്ഠിച്ചു. വിദേശകാര്യ മന്ത്രാലയത്തിന്റെ ഡെപ്യൂട്ടി വക്താവായും പ്രവർത്തിച്ചു.