'കേന്ദ്രം വിലക്കിയ ആറ് ചിത്രങ്ങള്‍ പ്രദര്‍ശിപ്പിക്കില്ല, രാജ്യതാത്പര്യം കണക്കിലെടുത്ത് തീരുമാനം' ; റസൂല്‍ പൂക്കുട്ടി

കേന്ദ്രം വിലക്കിയ ആറ് ചിത്രങ്ങള്‍ പ്രദര്‍ശിപ്പിക്കില്ല എന്ന് റസൂല്‍ പൂക്കുട്ടി. രാജ്യത്തിന്റെ നയതന്ത്രബന്ധങ്ങളില്‍ വിളളലുണ്ടാവുമെന്ന് കേന്ദ്രം അറിയിച്ചതിനാലാണ് ആറ് ചിത്രങ്ങളുടെ പ്രദര്‍ശനം ചലച്ചിത്ര അക്കാദമി തന്നെ ഉപേക്ഷിച്ചത് എന്നും ചലച്ചിത്ര അക്കാദമി ചെയര്‍മാന്‍ റസൂല്‍ പൂക്കുട്ടി മാധ്യമപ്രവര്‍ത്തകരോടു പറഞ്ഞു.

കേന്ദ്രസര്‍ക്കാര്‍ ഇക്കാര്യം ആവശ്യപ്പെട്ടിട്ടുണ്ടെന്ന് ചീഫ് സെക്രട്ടറി അറിയിച്ചപ്പോള്‍ രാജ്യതാത്പര്യം കണക്കിലെടുത്താണ് അക്കാദമി തീരുമാനമെടുത്തതെന്നും അദ്ദേഹം അറിയിച്ചു. വിലക്കിയ ചിത്രങ്ങള്‍ പ്രദര്‍ശിപ്പിക്കുമെന്ന് സംസ്ഥാന സര്‍ക്കാര്‍ പ്രഖ്യാപിച്ച ശേഷമാണ് തടഞ്ഞുവെച്ച 19 ചിത്രങ്ങളില്‍ ഈ ആറെണ്ണം ഒഴികെയുളള ചിത്രങ്ങള്‍ക്ക് ഒറ്റ രാത്രികൊണ്ട് കേന്ദ്രം പ്രദര്‍ശനാനുമതി നല്‍കിയതെന്നും റസൂല്‍ പൂക്കുട്ടി പറഞ്ഞു.

ചലച്ചിത്രമേള അവസാനിക്കുന്നതിന്റെ തലേദിവസം ഐഎഫ്എഫ്‌കെയിലെത്തിയ റസൂല്‍ പൂക്കുട്ടി വ്യാഴാഴ്ച രാത്രി മാധ്യമപ്രവര്‍ത്തകരോട് ഇക്കാര്യങ്ങള്‍ വെളിപ്പെടുത്തുകയായിരുന്നു. ചലച്ചിത്രമേളയില്‍ തന്റെ ഭൗതികസാന്നിധ്യം മാത്രമാണ് ഇല്ലാതിരുന്നതെന്നും മേളയുടെ നടത്തിപ്പില്‍ തന്റെ സജീവമായ ഇടപെടല്‍ ഉണ്ടായിട്ടുണ്ടെന്നും അദ്ദേഹം പറഞ്ഞു.