രാഹുൽ മാങ്കൂട്ടത്തിൽ വിവാദം; കോൺഗ്രസ് മറുപടി പറയണമെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ

രാഹുല്‍ മാങ്കൂട്ടത്തിലിനെതിരായ വിഷയത്തിൽ കോൺഗ്രസ് മറുപടി പറയണമെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍. യൂത്ത് കോണ്‍ഗ്രസ് സംസ്ഥാന അധ്യക്ഷസ്ഥാനം ഒഴിഞ്ഞാല്‍ മതിയോ എന്ന് തീരുമാനിക്കേണ്ടത് കോണ്‍ഗ്രസ് ആണെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍. ഗൗരവപൂര്‍ണമായ പരിശോധന കോണ്‍ഗ്രസ് നടത്തണമെന്നും അദ്ദേഹം ആവശ്യപ്പെട്ടു. രാഹുലിനെതിരായ വളരെ ഗൗരവമുള്ള ഈ പ്രശ്‌നത്തില്‍നിന്ന് ഒഴിഞ്ഞുനില്‍ക്കാന്‍ കെപിസിസി പ്രസിഡന്റിനും കോണ്‍ഗ്രസിനും സാധിക്കില്ലെന്നും എം.വി. ഗോവിന്ദന്‍ തിരുവനന്തപുരത്ത് വാര്‍ത്താസമ്മേളനത്തില്‍ പറഞ്ഞു. രാഹുല്‍ രാജിവെക്കണമെന്ന മുദ്രാവാക്യം ഉയര്‍ന്നിട്ടുണ്ടെന്നും അദ്ദേഹം കൂട്ടിച്ചേര്‍ത്തു. രാഹുല്‍ ഗര്‍ഭച്ഛിദ്രത്തിന് നിര്‍ബന്ധിക്കുന്നതിന്റെ ക്ലിപ്പ് ഉള്‍പ്പെടെ പുറത്തുവന്നിട്ടുണ്ട്. ഇവയൊക്കെ തെളിവായി നില്‍ക്കുകയാണ്. കേവലം ആരോപണമല്ല. തെളിവ് പുറത്തുവന്നിരിക്കുകയാണ്. അങ്ങനെവന്നാല്‍ അത്തരത്തിലൊരു എംഎല്‍എയെ എന്താണ് ചെയ്യുക. കോണ്‍ഗ്രസുകാര്‍ പറയട്ടേയെന്നും ഗോവിന്ദന്‍ കൂട്ടിച്ചേര്‍ത്തു.