പ്രശസ്ത പാസ്റ്ററും ബൈബിള് അദ്ധ്യാപകനുമായ ജോണ് മക്ആര്തര് അന്തരിച്ചു
സണ് വാലി, കാലിഫോര്ണിയ: കാലിഫോര്ണിയയിലെ സണ് വാലിയിലുള്ള ഗ്രേസ് കമ്മ്യൂണിറ്റി ചര്ച്ചിന്റെ ദീര്ഘകാല പാസ്റ്ററും പ്രശസ്ത ബൈബിള് അദ്ധ്യാപകനുമായ ജോണ് മക്ആര്തര് 86-ആം വയസ്സില് അന്തരിച്ചു. ന്യുമോണിയ ബാധിതനായി തിങ്കളാഴ്ചയാണ് അദ്ദേഹം ഈ ലോകത്തോട് വിട പറഞ്ഞത്.
'ഞങ്ങളുടെ പ്രിയപ്പെട്ട പാസ്റ്ററും അദ്ധ്യാപകനുമായ ജോണ് മക്ആര്തര് രക്ഷകന്റെ സന്നിധിയില് പ്രവേശിച്ചു എന്ന വാര്ത്ത പങ്കുവെക്കുമ്പോള് ഞങ്ങളുടെ ഹൃദയം ദുഃഖിതമാണെങ്കിലും സന്തോഷിക്കുന്നു,' എന്ന് ഗ്രേസ് ടു യു മിനിസ്ട്രി തിങ്കളാഴ്ച X-ല് കുറിച്ചു.
അഞ്ച് പതിറ്റാണ്ടിലേറെയായി സണ് വാലിയിലെ ഗ്രേസ് കമ്മ്യൂണിറ്റി ചര്ച്ചില് പ്രസംഗിച്ച മക്ആര്തര്, ഈ വര്ഷം ആരോഗ്യപരമായ വെല്ലുവിളികള് കാരണം അധികം പ്രസംഗിച്ചിരുന്നില്ല.
1969-ല് ഒരു പാസ്റ്റര്-അദ്ധ്യാപകനായി ശുശ്രൂഷ ആരംഭിച്ച മക്ആര്തര്, 3,000-ലധികം പ്രസംഗങ്ങള് നടത്തിയിട്ടുണ്ട്. റേഡിയോ, ഡിജിറ്റല് മാധ്യമങ്ങള് വഴി അന്താരാഷ്ട്രതലത്തില് ആയിരക്കണക്കിന് ആളുകളിലേക്ക് എത്തുന്ന ഗ്രേസ് ടു യു പ്രക്ഷേപണ ശുശ്രൂഷയുടെ പിന്നിലെ ശബ്ദമാണ് അദ്ദേഹം. ഡസന് കണക്കിന് ദൈവശാസ്ത്ര പുസ്തകങ്ങളും ബൈബിള് വ്യാഖ്യാനങ്ങളും അദ്ദേഹം രചിച്ചിട്ടുണ്ട്.
പി.പി. ചെറിയാന്
