കുട്ടിക്ക് വയറ്റില് വൈറസ് ആണെന്ന് ഡോക്ടര്മാര്, അമ്മയുടെ നിര്ബന്ധത്തിനു വഴങ്ങി എടുത്ത എക്സ്-റേയില് ഞെട്ടിക്കുന്ന കണ്ടെത്തല്
ടെക്സാസ് : ടെക്സസില് 18 മാസം പ്രായമുള്ള കൈ എന്ന കുഞ്ഞ് വേദനകൊണ്ട് നിലവിളിച്ച് ഉണര്ന്നപ്പോള് കുട്ടിയുടെ അമ്മ മഡലൈന് ഡണ് ഉടനെ ആശുപത്രിയില് കൊണ്ടുപോയി. കുഞ്ഞിന് വയറ്റില് വൈറസ് ആണെന്ന് ഡോക്ടര്മാര് പറഞ്ഞെങ്കിലും ഡണ് അത് വിശ്വസിച്ചില്ല. തന്റെ കുഞ്ഞ് എന്തെങ്കിലും വിഴുങ്ങിയതായി അവള്ക്ക് തോന്നിയിരുന്നു. അവളുടെ നിര്ബന്ധപ്രകാരം എടുത്ത എക്സ്-റേയില് കൈ ഒരു ബട്ടണ് ബാറ്ററി വിഴുങ്ങിയതായി കണ്ടെത്തി.
ബട്ടണ് ബാറ്ററികള് ചെറുതും വൃത്താകൃതിയിലുള്ളതുമാണ്. വാച്ചുകള്, റിമോട്ട് കണ്ട്രോളുകള്, കുട്ടികളുടെ കളിപ്പാട്ടങ്ങള് എന്നിവയിലൊക്കെ ഇത് സാധാരണയായി ഉപയോഗിക്കാറുണ്ട്. ഇത് വിഴുങ്ങുമ്പോള് തൊണ്ടയില് കുടുങ്ങാനും ഗുരുതരമായ അപകടങ്ങള് ഉണ്ടാക്കാനും സാധ്യതയുണ്ട്. ഉമിനീരുമായി ചേരുമ്പോള് ഇത് ഒരു രാസപ്രവര്ത്തനത്തിന് കാരണമാവുകയും അന്നനാളത്തെ ഗുരുതരമായി പൊള്ളിക്കുകയും ചെയ്യും.
കൈയ്ക്ക് ഉടന്തന്നെ ജീവന് രക്ഷിക്കാനുള്ള ശസ്ത്രക്രിയ നടത്തി. ഇത്തരം അപകടങ്ങള് ഒഴിവാക്കാന് കുട്ടികളുടെ കളിപ്പാട്ടങ്ങളില് ബാറ്ററികള് സുരക്ഷിതമായി ഉറപ്പിച്ചിട്ടുണ്ടെന്ന് ഉറപ്പാക്കാന് ഡണ് മാതാപിതാക്കളോട് ആവശ്യപ്പെടുന്നു. യുഎസില് പ്രതിവര്ഷം 3,500-ലധികം ബട്ടണ് ബാറ്ററി വിഴുങ്ങല് കേസുകള് റിപ്പോര്ട്ട് ചെയ്യപ്പെടുന്നുണ്ട്, ഈ എണ്ണം വര്ദ്ധിച്ചുകൊണ്ടിരിക്കുകയാണെന്നും ഫിലാഡല്ഫിയയിലെ ചില്ഡ്രന്സ് ഹോസ്പിറ്റല് (CHOP) പറയുന്നു.
ഇത്തരം സാഹചര്യങ്ങളില് രക്ഷിതാക്കള്ക്ക് അവരുടെ അവബോധം എത്രത്തോളം പ്രധാനമാണെന്ന് ഇത് ഓര്മ്മിപ്പിക്കുന്നു,
പി പി ചെറിയാന്
