വയനാട്ടിൽ വിവാഹം നിശ്ചയിച്ചിരുന്ന യുവതിയ്ക്കും യുവാവിനും വാഹനാപകടത്തിൽ ദാരുണന്ത്യം

വയനാട്: സുൽത്താൻ ബത്തേരി ദേശീയപാത 766-ൽ മുത്തങ്ങയ്ക്ക് സമീപം ഉണ്ടായ വാഹനാപകടത്തിൽ സ്കൂട്ടർ യാത്രക്കാരായ യുവതിയും യുവാവും മരിച്ചു. മലപ്പുറം കാലടി കാടഞ്ചേരി സ്വദേശി മുഹമ്മദ് ഫായിസ് (25), കോഴിക്കോട് കുളങ്ങരപ്പാടം സ്വദേശി അംനത്ത് (25) എന്നിവരാണ് മരിച്ചത്.

ബുധനാഴ്ച ഉച്ചയ്ക്ക് പന്ത്രണ്ടോടെ മുത്തങ്ങ കല്ലൂർ പാലത്തിന് സമീപമായിരുന്നു അപകടം. കർണാടക ഭാഗത്തേക്ക് പോവുകയായിരുന്ന ലോറിയും ബത്തേരി ഭാഗത്തേക്ക് വരികയായിരുന്ന സ്കൂട്ടറുമാണ് കൂട്ടിയിടിച്ചത്. മറ്റൊരു വാഹനത്തെ മറികടക്കുന്നതിനിടെ നിയന്ത്രണം വിട്ട സ്കൂട്ടർ ലോറിയുടെ മുൻവശത്ത് ഇടിക്കുകയായിരുന്നുവെന്നാണ് പ്രാഥമിക വിവരം. ഇരുവരും അപകടസ്ഥലത്ത് വെച്ചുതന്നെ മരണപ്പെട്ടു.

മരിച്ച ഫായിസും അംനത്തും തമ്മിലുള്ള വിവാഹം നിശ്ചയിച്ചിരുന്നതാണെന്ന് ബന്ധുക്കൾ അറിയിച്ചു. ദുബായിലായിരുന്ന ഫായിസ് വിവാഹ കാര്യങ്ങൾക്കായി അടുത്തിടെയാണ് നാട്ടിലെത്തിയത്. അംനത്തിന്റെ രണ്ടാം വിവാഹമായിരുന്നു നിശ്ചയിച്ചിരുന്നത്. ബത്തേരി പൊലീസും നാട്ടുകാരും ചേർന്നാണ് മൃതദേഹങ്ങൾ താലൂക്ക് ആശുപത്രിയിലേക്ക് മാറ്റിയത്. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹങ്ങൾ ബന്ധുക്കൾക്ക് വിട്ടുനൽകും.