മന്ത്രി കെ. രാജന് മൂന്നാമൂഴം
തൃശൂര്: ശക്തികേന്ദ്രമായ തൃശൂര് ജില്ലയില് സി.പി.ഐ. മത്സരിക്കുന്ന അഞ്ചു നിയമസഭാ മണ്ഡലങ്ങളിലെ സ്ഥാനാര്ഥികളുടെ സാധ്യതാപട്ടികയായി. ജില്ലാ എക്സിക്യൂട്ടീവ് അംഗീകരിച്ച പട്ടിക സംസ്ഥാന നേതൃത്വത്തിനു കൈമാറും. അന്തിമ തീരുമാനം സംസ്ഥാന നേതൃത്വത്തിന്റേതാണെങ്കിലും ജില്ലാ എക്സിക്യൂട്ടീവ് അംഗീകരിച്ച പട്ടികയില് മാറ്റത്തിനു സാധ്യത കുറവാണ്.
ടേം വ്യവസ്ഥയില് ഇളവ് അനുവദിച്ച് റവന്യൂ മന്ത്രി കെ. രാജനെ വീണ്ടും മത്സരരംഗത്തിറക്കും. സിറ്റിങ് എം.എല്.എമാരില് രാജനു പുറമെ സി.സി. മുകുന്ദനും മത്സരിക്കും. രാജന് ഒല്ലൂരിലും മുകുന്ദന് നാട്ടികയിലുമാണ് മത്സരിക്കുക. ഓരോ മണ്ഡലം കമ്മിറ്റിയും ഒന്നിലേറെ പേരുകള് ഉള്പ്പെടുന്ന പട്ടികയാണ് ജില്ലാ എക്സിക്യൂട്ടീവിനു നല്കിയത്. ഇതില്നിന്നാണ് അന്തിമ പട്ടികയ്ക്ക് അംഗീകാരം നല്കിയത്.
ഒല്ലൂര് കെ. രാജന്, കൊടുങ്ങല്ലൂര് കെ.ജി. ശിവാനന്ദന്, നാട്ടിക സി.സി. മുകുന്ദന്, കൈപ്പമംഗലം കെ.കെ. വത്സരാജ്, തൃശൂര് ഷീല വിജയകുമാര് എന്നിവരുടെ പേരാണ് സംസ്ഥാന നേതൃത്വത്തിനു കൈമാറുക. ജില്ലയില് ഒരു സീറ്റില് വനിതയെ മത്സരിപ്പിക്കാന് പാര്ട്ടി തീരുമാനിച്ചിരുന്നു. ഗീത ഗോപിയുടെയും ഷീല വിജയകുമാറിന്റെയും പേരുകളാണ് ഉയര്ന്നു കേട്ടിരുന്നത്. ഇതില് ഗീത ഗോപി എം.എല്.എ. ആയിട്ടുണ്ട്. ഇതുകൂടി പരിഗണിച്ചാണ് മുന് ജില്ലാ പഞ്ചായത്ത് പ്രസിഡന്റായ ഷീലയെ മത്സരിപ്പിക്കാന് തീരുമാനിച്ചത്. കെ.ജി. ശിവാനന്ദന് പാര്ട്ടി ജില്ലാ സെക്രട്ടറിയാണ്. കൈപ്പമംഗലത്തു പരിഗണിക്കുന്ന വത്സരാജ് മുന് ജില്ലാ സെക്രട്ടറിയാണ്. പി. ബാലചന്ദ്രനു പുറമെ വി.ആര്. സുനില് കുമാറും ഇ.ടി. ടൈസണുമാണ് മത്സരരംഗത്തുനിന്ന് ഒഴിവാകുന്ന എം.എല്.എമാര്.
LATEST NEWS
- സുധാകരന്മാര് ഇടംവലം തലവേദന; സ്വയം സ്ഥാനാര്ഥിത്വം പ്രഖ്യാപിച്ച് ജി. സുധാകരന്, ഹൈക്കമാന്ഡിനെ വെല്ലുവിളിച്ച്, മത്സരിക്കുമെന്നു കെ. സുധാകരന്
- കൊച്ചി വാട്ടര് മെട്രോ ആലപ്പുഴയിലേക്കും കൊല്ലത്തേക്കും; 11 സംസ്ഥാനങ്ങളിലും വാട്ടര് മെട്രോയ്ക്ക് സാധ്യതാപഠനം, ആലപ്പുഴയില് 8 പ്രധാന പാതകള് പഠനവിധേയമാക്കി
- ഇടതു ചേര്ന്ന് വലത്തു മാറി, വീണ്ടും ഇടതമര്ന്ന് വര്ക്കല
- തൃണമൂല് നേതാക്കള് ജി. സുധാകരനെ സന്ദര്ശിച്ചു
- കേന്ദ്രസര്ക്കാര് സത്യാവസ്ഥ വ്യക്തമാക്കണം: ജോസ് കെ. മാണി
