കുഞ്ഞുങ്ങളുണ്ടാവാത്തത് ദുർമന്ത്രവാദം കാരണം; അയൽവാസികളെ കോടാലി കൊണ്ട് യുവാവ് വെട്ടിക്കൊന്നു

മധ്യപ്രദേശിലെ സിം​ഗ്രൗളി ജില്ലയിൽ യുവാവ് രണ്ട് അയൽവാസികളെ വെട്ടിക്കൊന്നു. അയൽക്കാർ ദു‍‍ർമന്ത്രവാദം ചെയ്തതിനാലാണെന്ന് കുഞ്ഞുങ്ങൾ ഉണ്ടാകാത്തതെന്ന് ആരോപിച്ചായിരുന്നു കൊലപാതകം. സംഭവത്തിൽ പൊലീസ് പ്രതിയായ ചത്രപതി സിം​ഗിനെ അറസ്റ്റ് ചെയ്തു. . ചത്രപതിക്ക് കുട്ടികൾ ഇല്ലാത്തതിൽ വലിയ മനോവിഷമം ഉണ്ടായിരുന്നെന്നും അതാണ് കൊലപാതകത്തിലേക്ക് നയിച്ചതെന്നുമാണ് വിവരം.

കൂടാതെ ചത്രപതിയുടെ ഒരു കുഞ്ഞിന് ​ഗ‍ർഭാവസ്ഥയിലിരിക്കെ തന്നെ ജീവൻ നഷ്ടമായിരുന്നു. ഇതിന് പിന്നിലും അയൽക്കാരുടെ ദുർമന്ത്രവാദമാണെന്നാണ് ചത്രപതി പറയുന്നത്. ഇന്നലെ അയൽക്കാരായ കേവൽ സിം​ഗിനേയും അദ്ദേഹത്തിന്റെ ഭാര്യ ഫൂൽമതിയേയും വീട്ടിൽ വിളിച്ചുവരുത്തി കൊലപ്പെടുത്തുകയായിരുന്നു.

ഇരുവരേയും പൂജ നടക്കുന്നുണ്ടെന്ന വ്യാജേനയാണ് വീട്ടിലെത്തിച്ചത്. ശേഷം കോടാലി ഉപയോ​ഗിച്ച് വെട്ടി കൊലപ്പെടുത്തുകയായിരുന്നു. സ്ഥലത്തുണ്ടായിരുന്ന നാട്ടുകാർ ഇടപെടാൻ ശ്രമിച്ചപ്പോൾ ചത്രപതി അവരേയും അക്രമിക്കാൻ ശ്രമിച്ചു.
കേവൽ സിം​ഗും ഭാര്യയും സംഭവസ്ഥലത്ത് വെച്ച് തന്നെ മരിച്ചു എന്നാണ് റിപ്പോർട്ട്. സംഭവത്തിൽ അന്വേഷണം തുടരുകയാണ്.