തിരക്കിനിടയില്‍ മൊബൈല്‍ മോഷണം പോയി ; സോഫ്റ്റ്‌വേര്‍ എഞ്ചിനീയര്‍ ട്രാക്ക് ചെയ്ത് കണ്ടെത്തി ; പോലീസിന് സസ്‌പെന്‍ഷന്‍

ന്യൂഡല്‍ഹി: തിരക്കിനിടയില്‍ മോഷണം പോയ മൊബൈല്‍ഫോണ്‍ സോഫ്റ്റ്‌വേര്‍ എഞ്ചിനീയര്‍ സ്വന്തം നിലയില്‍ കണ്ടെത്തിയതിനെ തുടര്‍ന്ന് ഡ്യൂട്ടിയില്‍ വീഴ്ച വരുത്തിയ പോലീസുകാര്‍ക്ക് സസ്‌പെന്‍ഷന്‍. വാരണാസിയിലെ അസി ഘട്ടില്‍ വെച്ചായിരുന്നു മൊബൈല്‍ ഫോണ്‍ മോഷണം പോയത്. പോലീസ് കൃത്യമായി ഇടപെടുന്നതില്‍ വീഴ്ച വരുത്തിയെന്നാണ് കണ്ടെത്തല്‍.

സംഭവത്തില്‍ ഡ്യൂട്ടിയില്‍ വീഴ്ച വരുത്തിയതിന് പ്രാദേശിക പോലീസ് ഔട്ട്പോസ്റ്റ് ഇന്‍-ചാര്‍ജിനെ അന്വേഷണവിധേയമായി സസ്പെന്‍ഡ് ചെയ്തതായി അധികൃതര്‍ അറിയിച്ചു. കഴിഞ്ഞ ആഴ്ച മുംബൈയിലെ ഘാട്കോപ്പര്‍ സ്വദേശിയായ അങ്കിത ഗുപ്ത കുടുംബത്തോടൊപ്പം വാരണാസി സന്ദര്‍ശിക്കുമ്പോഴായിരുന്നു സംഭവം. അസി ഘട്ടിലെ കനത്ത തിരക്കിനിടയില്‍ ഒരു അജ്ഞാതന്‍ അങ്കിതയുടെ ഫോണ്‍ തട്ടിയെടുത്ത് ആള്‍ക്കൂട്ടത്തിനിടയിലേക്ക് മറയുകയായിരുന്നു.

അങ്കിത ഉടന്‍ തന്നെ പോലീസില്‍ പരാതി നല്‍കുകയും ഔദ്യോഗിക അന്വേഷണം ആരംഭിക്കുകയും ചെയ്തു. സുഹൃത്തുക്കളുടെ സഹായത്തോടെ അങ്കിത തന്നെ ഫോണിന്റെ ലൊക്കേഷന്‍ പിന്തുടരുകയും മണ്ഡുവാഡി പ്രദേശത്തെ ഒരു വീട് കണ്ടെത്തുകയും ചെയ്തു. തുടര്‍ന്ന് ഈ വിവരങ്ങള്‍ അവര്‍ പോലീസിനെ അറിയിച്ചു. അങ്കിത നല്‍കിയ വിവരത്തിന്റെ അടിസ്ഥാനത്തില്‍ പോലീസ് സംഘം ആ വീട്ടില്‍ റെയ്ഡ് നടത്തുകയും ഫോണ്‍ വീണ്ടെടുക്കുകയും ചെയ്തു. കൂടാതെ അവിടെ നിന്ന് മോഷ്ടിക്കപ്പെട്ട മറ്റ് 12 മൊബൈല്‍ ഫോണുകള്‍ കൂടി പോലീസ് പിടിച്ചെടുത്തു.

ഫോണ്‍ കണ്ടെടുത്തതിന് പിന്നാലെ ഡെപ്യൂട്ടി പോലീസ് കമ്മീഷണര്‍ ഗൗരവ് കുമാര്‍ ആഭ്യന്തര അന്വേഷണത്തിന് ഉത്തരവിട്ടു. അസി പോലീസ് ഔട്ട്പോസ്റ്റ് ഇന്‍-ചാര്‍ജിന്റെ ഭാഗത്ത് നിന്ന് ഗുരുതരമായ വീഴ്ചയുണ്ടായതായി അന്വേഷണത്തില്‍ കണ്ടെത്തി. ഇതിനെത്തുടര്‍ന്ന് ജനുവരി 4-ന് ഇയാളെ സസ്പെന്‍ഡ് ചെയ്തതായി ഉദ്യോഗസ്ഥര്‍ വ്യക്തമാക്കി.