' ഒരുമിച്ച് ചിലവഴിച്ച 5 വര്‍ഷങ്ങള്‍ക്ക് ശേഷം ഞങ്ങള്‍ പിരിയുന്നു' ; കിച്ചുവുമായുളള ബന്ധം അവസാനിപ്പിക്കുന്നതായി നടി റോഷ്‌ന ആന്‍ റോയ്

photo- www.instagram.com/roshna.ann.roy/

നടി റോഷ്‌ന ആന്‍ റോയിയും നടനും തിരക്കഥാകൃത്തുമായ കിച്ചു ടെല്ലാസും വിവാഹ മോചിതരായി. അഞ്ച് വര്‍ഷത്തെ ദാമ്പത്യ ജീവതത്തിനുശേഷമാണ് ഇരുവരും വേര്‍പിരിയാന്‍ തീരുമാനിച്ചത്. സമൂഹമാധ്യമങ്ങളിലൂടെ റോഷ്‌ന തെന്നയാണ് ഈ വിവരം പങ്കുവെച്ചത്.

റോഷ്‌ന ആന്‍ റോയിയുടെ വാക്കുകള്‍:

സമൂഹമാധ്യമങ്ങളില്‍ ആഘോഷിക്കാന്‍ വേണ്ടിയല്ല ഞാനിക്കാര്യം പറയുന്നത്. പക്ഷേ, ഇതു വെളിപ്പെടുത്താന്‍ ശരിയായ സമയം ഇതെന്നു തോന്നി. ഞങ്ങള്‍ രണ്ടു പേരും ജീവനോടെ ഉണ്ട്, രണ്ട് വ്യത്യസ്തമായ വഴികളിലൂടെ സമാധാനത്തോടെ ഞങ്ങള്‍ക്ക് ജീവിതം തുടരേണ്ടതുണ്ട്. ശരിയാണ്, എന്തു പറഞ്ഞാലും രക്തബന്ധമാണല്ലോ എല്ലാത്തിലും വലുത്! അതുകൊണ്ടാണ് ഞാന്‍ വഴി മാറിയത്. നിങ്ങള്‍ ആഗ്രഹിക്കുന്ന ഇടം നല്‍കുകയും ചെയ്തു. ഞാന്‍ സ്വതന്ത്രയാണ്. അദ്ദേഹം സ്വതന്ത്രനാണ്. എല്ലാവര്‍ക്കും ഞാന്‍ സമാധാനം ആശംസിക്കുന്നു. ഇക്കാര്യം പുറത്തു വന്നു പറയുക എന്നത് എളുപ്പമായിരുന്നില്ല. ചിലര്‍ക്ക് സന്തോഷമായേക്കാം. അവരുടെ ആ സന്തോഷം തുടരട്ടെ എന്ന് ഞാന്‍ ആത്മാര്‍ഥമായി പ്രാര്‍ത്ഥിക്കുന്നു.

പല കാര്യങ്ങള്‍ കൊണ്ടും ഞങ്ങള്‍ വളരെ അടുത്ത സുഹൃത്തുക്കളായിരുന്നു. ഇപ്പോഴും അങ്ങനെയാണ്. കിച്ചുവും ഞാനും ഒരു കാലത്ത്ഒരുമിച്ചായിരുന്നു. ഇപ്പോള്‍ വഴിപിരിഞ്ഞു. ജീവിതം ഇനിയും മുന്നോട്ടു പോകേണ്ടതുണ്ട്. ഈ യാത്രയില്‍ ഒപ്പമുണ്ടായിരുന്ന എല്ലാവര്‍ക്കും നന്ദി. ഇക്കാര്യം മറച്ചു വയ്ക്കാന്‍ ഞാന്‍ ആഗ്രഹിക്കുന്നില്ല. എല്ലാവരോടും ഒരു അപക്ഷയുണ്ട്, ഞങ്ങളുടെ സ്വകാര്യതയെ മാനിക്കാനും വേര്‍പിരിഞ്ഞ് സമാധാനമായി ജീവിക്കാനും അനുവദിക്കണം. ...

ഒരു ആമുഖ കുറിപ്പിനൊപ്പമായിരുന്നു റോഷ്‌ന ഔദ്യോഗികമായി വേര്‍പിരിയുന്ന വിവരം പങ്കുവച്ചത്.

കുറിപ്പ്:

ഇത് ഔദ്യോഗികമായിരിക്കുന്നു

ഒരുമിച്ച് ചിലവഴിച്ച 5 മനോഹര വര്‍ഷങ്ങള്‍ക്ക് ശേഷം, ഞങ്ങള്‍ സ്‌നേഹത്തോടും ബഹുമാനത്തോടും കൂടി വഴി പിരിയാന്‍ തീരുമാനിച്ചു. മനോഹരമായ ഓര്‍മകള്‍ക്ക് നന്ദി. ഞങ്ങളുടെ ജീവിതത്തില്‍ പുതിയ അധ്യായങ്ങള്‍ ആരംഭിക്കുമ്പോള്‍, നിങ്ങളുടെ പ്രാര്‍ഥനകളും സ്വകാര്യതയും ഞങ്ങള്‍ അഭ്യര്‍ത്ഥിക്കുന്നു.

അതെ, രക്തബന്ധമാണ് എല്ലാത്തിനെക്കാള്‍ വലുത്. അതുകൊണ്ടാണ് ഞാന്‍ മാറിനിന്ന്, നിങ്ങള്‍ക്കാവശ്യമുള്ള എല്ലാ ഇടവും നല്‍കിയത്. ഞാന്‍ സ്വതന്ത്രയാണ്, അവനും സ്വതന്ത്രനാണ്, എല്ലാവര്‍ക്കും സമാധാനം നേരുന്നു.

ഞങ്ങള്‍ വളരെ അടുത്ത സുഹൃത്തുക്കളായിരുന്നു, പല രീതികളിലും ഞങ്ങള്‍ ഇപ്പോഴും അങ്ങനെയാണ്. സെപ്റ്റംബര്‍ 30 - എന്റെ അച്ഛനെ നഷ്ടപ്പെട്ട ദിവസം, എന്റെ ജീവിതത്തിലെ ആദ്യത്തെ വേദന. ഇന്ന്, ഞാന്‍ മറ്റൊരു അവസാനത്തിന് സാക്ഷ്യം വഹിക്കുന്നു, മുന്നോട്ട് പോകുന്നു...നഷ്ടങ്ങളില്‍ നിന്ന് നഷ്ടങ്ങളിലേക്ക്, ഞാന്‍ ഉയര്‍ത്തെഴുന്നേല്‍ക്കാന്‍ തിരഞ്ഞെടുക്കുന്നു.

ഒമര്‍ ലുലു സംവിധാനം ചെയ്ത അടാര്‍ ലൗവിലൂടെ ശ്രദ്ധേയയായ നടിയാണ് റോഷ്‌ന. ' പാപം ചെയ്യാത്തവര്‍ കല്ലെറിയട്ടെ' , ' സുല്‍', ' ധമാക്ക' എന്നിവയാണ് റോഷ്‌നയുടെ മറ്റ് സിനിമകള്‍.

' അങ്കമാലീസ് ഡയറീസ്' എന്ന ചിത്രത്തിലൂടെ ശ്രദ്ധ നേടിയ താരമാണ് കിച്ചു. ടിനു പാപ്പച്ചന്‍ സംവിധാനം ചെയ്യുന്ന ' അജഗജാന്തരം' സിനിമയുടെ തിരക്കഥാകൃത്ത് കൂടിയാണ് കിച്ചു.