അസമീസ് ഗായകന്‍ സുബീന്‍ ഗാര്‍ഗിന്റെ മരണം ; ഡ്രമ്മറും ബാന്റ്‌മേറ്റുമായി ശേഖര്‍ജ്യോതി ഗോസ്വാമിയെ അറസ്റ്റ് ചെയ്തു

ന്യൂഡല്‍ഹി: പ്രശസ്ത അസമീസ് ഗായകന്‍ സുബീന്‍ ഗാര്‍ഗിന്റെ മരണവുമായി ബന്ധപ്പെട്ട് അസം പോലീസിന്റെ പ്രത്യേക അന്വേഷണ സംഘം (എസ്ഐടി) വ്യാഴാഴ്ച സംഗീതജ്ഞന്‍ ശേഖര്‍ ജ്യോതി ഗോസ്വാമിയെ അറസ്റ്റ് ചെയ്തു. ദാരുണമായ സംഭവം നടന്ന സിംഗപ്പൂരില്‍ സുബീനോടൊപ്പം പോയ സംഘത്തില്‍ ഗോസ്വാമിയും ഉള്‍പ്പെട്ടിരുന്നു. ഇന്ന് രാവിലെ ചോദ്യം ചെയ്യലിനായി കസ്റ്റഡിയിലെടുത്ത ശേഷമാണ് ഗോസ്വാമിയെ അറസ്റ്റ് ചെയ്തതെന്ന് ഉദ്യോഗസ്ഥര്‍ പറഞ്ഞു.

സുബീന്‍ഗാര്‍ഗിന്റെ ബാന്റ്‌മേറ്റും ടീമിലെ ഡ്രമ്മറുമാണ് ശേഖര്‍ ജ്യോതി ഗോസ്വാമി. സെപ്റ്റംബര്‍ 19 ന് സിംഗപ്പൂരില്‍ നടന്ന നോര്‍ത്ത് ഈസ്റ്റ് ഇന്ത്യ ഫെസ്റ്റിവലില്‍ പങ്കെടുക്കാനും പരിപാടി അവതരിപ്പിക്കാനും സുബീന്‍ പോയിരുന്ന സ്ഥലത്താണ് ഗായകന്റെ അകാല മരണത്തെക്കുറിച്ച് എസ്ഐടി അന്വേഷണം തുടരുന്നതിനിടെയാണ് അറസ്റ്റ്. കടലില്‍ നീന്തുന്നതിനിടെയാണ് അദ്ദേഹം മുങ്ങിമരിച്ചത്. വൈദ്യസഹായം നല്‍കിയിട്ടും അദ്ദേഹത്തെ പുനരുജ്ജീവിപ്പിക്കാന്‍ കഴിഞ്ഞില്ല. ഇന്ന് രാവിലെ, കേസുമായി ബന്ധപ്പെട്ട മറ്റ് രണ്ട് പ്രധാന വ്യക്തികളുടെ വസതികളില്‍ എസ്ഐടി സംഘങ്ങള്‍ വെവ്വേറെ തിരച്ചില്‍ നടത്തിയിരുന്നു.

ഫെസ്റ്റിവലിന്റെ സംഘാടകനായ ശ്യാംകാനു മഹന്ത, സുബീന്റെ മാനേജര്‍ സിദ്ധാര്‍ത്ഥ് ശര്‍മ്മ എന്നിവരുടെ വസതികളിലും എസ്ഐടി സംഘങ്ങള്‍ വെവ്വേറെ തിരച്ചില്‍ നടത്തി. ഗീതാനഗറിലെ മഹന്തയുടെ വീട് ഒരു സംഘം സന്ദര്‍ശിച്ചു, അവിടെ രണ്ട് ജോലിക്കാരെ മാത്രമേ വീട്ടില്‍ കണ്ടെത്തിയിരുന്നുള്ളൂ. അതേസമയം, മറ്റൊരു സംഘം ശര്‍മ്മയുടെ പൂട്ടിയിട്ടിരുന്ന ധീരന്‍പാറയിലെ അപ്പാര്‍ട്ട്‌മെന്റിലെത്തി. മജിസ്‌ട്രേറ്റിന്റെ സാന്നിധ്യത്തില്‍ പൂട്ട് പൊളിച്ച് പരിസരം പരിശോധിച്ചു.

സുബീന്റെ മരണശേഷം ശര്‍മ്മയുടെ കുടുംബാംഗങ്ങളെ - അമ്മ, സഹോദരന്‍, സഹോദരി എന്നിവരെ - കാണാനില്ലെന്ന് താമസക്കാര്‍ അവകാശപ്പെട്ടു. ഗായകന്റെ മരണം അന്വേഷിക്കാന്‍ അസം സര്‍ക്കാര്‍ സ്‌പെഷ്യല്‍ ഡിജിപി എം.പി. ഗുപ്തയുടെ നേതൃത്വത്തില്‍ 10 അംഗ എസ്.ഐ.ടി രൂപീകരിച്ചു. നീതി ആവശ്യപ്പെട്ടാണ് അസം സര്‍ക്കാര്‍ 10 അംഗ എസ്.ഐ.ടി രൂപീകരിച്ചത്.