പേവിഷബാധ പ്രതിരോധം; വാക്‌സിന്‍ ലഭ്യതയും ചികിത്സയും ഉറപ്പാക്കണം, മെഡിക്കല്‍ കോളേജുകള്‍ക്ക് മാര്‍ഗനിര്‍ദേശവുമായി കേന്ദ്രം

ന്യൂഡല്‍ഹി: പേ വിഷബാധ പ്രതിരോധത്തിന് സജ്ജമായിരിക്കാന്‍ രാജ്യത്തെ മെഡിക്കല്‍ കോളജുകള്‍ക്ക് കേന്ദ്ര നിര്‍ദേശം. സമയബന്ധിതമായ പരിചരണം, നിരീക്ഷണം, പരിശീലനം, ബോധവത്കരണം എന്നിവ ഉറപ്പാക്കാന്‍ ഇടപെടണം എന്നാണ് നിര്‍ദേശം. രാജ്യത്തെ 780 മെഡിക്കല്‍ കോളജുകളും ഈ വിഷയങ്ങളില്‍ കാര്യക്ഷമായി ഇടപെടണം എന്നും ദേശീയ മെഡിക്കല്‍ കമ്മീഷന്‍ സര്‍ക്കുലറില്‍ വ്യക്തമക്കുന്നു.

പേവിഷബാധ 100 ശതമാനം മാരകമായ രോഗ സാഹചര്യമാണ്. എന്നാല്‍ മൃഗങ്ങളുടെ കടിയേറ്റ ഉടന്‍ നല്‍കുന്ന പരിചരണമായ പോസ്റ്റ്-എക്സ്പോഷര്‍ പ്രോഫിലാക്‌സിസ് സമയ ബന്ധിതമായി നല്‍കാന്‍ കഴിഞ്ഞാല്‍ രോഗ ബാധയെ പൂര്‍ണമായി തടയാന്‍ കഴിയും. പ്രാഥമിക ചികിത്സ സമയ ബന്ധിതമായി നല്‍കാന്‍ മെഡിക്കല്‍ കോളേജുകളില്‍ ആന്റി-റാബിസ് വാക്സിന്‍ , ആന്റി-റാബിസ് സെറം എന്നിവയുടെ ലഭ്യത ഉറപ്പാക്കാനും മെഡിക്കല്‍ കമ്മീഷന്‍ നിര്‍ദേശത്തില്‍ പറയുന്നു.