ഡൊണാള്‍ഡ് ട്രംപിന്റെ കടുത്ത അനുയായി ചാര്‍ളി കിക്ക് വെടിയേറ്റ് മരിച്ചു ; പരിപാടിയില്‍ പ്രസംഗിക്കുമ്പോള്‍

വാഷിംഗ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ അടുത്ത സുഹൃത്തുമായ ചാര്‍ളി കിര്‍ക്ക് വെടിയേറ്റ് കൊല്ലപ്പെട്ടു. ബുധനാഴ്ച യൂട്ടാ കോളേജിലെ ഒരു പരിപാടിയില്‍ പങ്കെടുക്കുമ്പോഴായിരുന്നു മരണം. ടേണിംഗ് പോയിന്റ് യുഎസ്എ എന്ന യുവജന സംഘടനയുടെ സഹസ്ഥാപകനും സിഇഒയുമായ 31 കാരനായ കിര്‍ക്കിന്റെ മരണം ട്രംപ് തന്റെ സോഷ്യല്‍ മീഡിയ വഴി പ്രഖ്യാപിച്ചു.

യൂട്ടാ വാലി യൂണിവേഴ്‌സിറ്റിയില്‍ നിന്ന് സോഷ്യല്‍ മീഡിയയില്‍ പോസ്റ്റ് ചെയ്ത വീഡിയോകളില്‍ 'അമേരിക്കന്‍ തിരിച്ചുവരവ്', 'എന്നെ തെറ്റാണെന്ന് തെളിയിക്കുക' എന്നീ മുദ്രാവാക്യങ്ങള്‍ ആലേഖനം ചെയ്ത ഒരു വെളുത്ത കൂടാരത്തിനടിയില്‍ ഇരുന്നുകൊണ്ട് കിര്‍ക്ക് ഒരു ഹാന്‍ഡ്ഹെല്‍ഡ് മൈക്രോഫോണില്‍ സംസാരിക്കുന്നത് കാണിക്കുന്നു. ഒരു വെടിയൊച്ചയ്ക്ക് പിന്നാലെ കിര്‍ക്കിന്റെ കഴുത്തിന്റെ ഇടതുവശത്ത് നിന്ന് വലിയ അളവില്‍ രക്തം ഒഴുകുന്നതും ആള്‍ക്കാര്‍ പരിഭ്രാന്തരായി ഓടുകയും നിലവിളിക്കുന്നതും കാണാം. യൂട്ടാ വാലി യൂണിവേഴ്‌സിറ്റി കാമ്പസിലെ സോറന്‍സെന്‍ സെന്റര്‍ അങ്കണത്തില്‍ എടുത്ത വീഡിയോകളാണ് ഇവയെന്ന് എപി സ്ഥിരീകരിച്ചു. ഇതിന് പിന്നാലെ ഒരാളെ അറസ്റ്റ ചെയ്യുകയുമുണ്ടായി.

തന്റെ ലാഭേച്ഛയില്ലാത്ത രാഷ്ട്രീയ സംഘടന സംഘടിപ്പിച്ച ഒരു സംവാദത്തില്‍ സംസാരിക്കുകയായിരുന്നു കിര്‍ക്ക്. വെടിവയ്പ്പിന് തൊട്ടുമുമ്പ്, കൂട്ട വെടിവയ്പ്പുകളെയും തോക്ക് അക്രമങ്ങളെയും കുറിച്ച് കിര്‍ക്ക് സംസാരിച്ചിരുന്നു. 2012 ല്‍ അന്ന് 18 വയസ്സുള്ള കിര്‍ക്കും വില്യം മോണ്ട്‌ഗോമറിയും ചേര്‍ന്ന് സ്ഥാപിച്ച ടേണിംഗ് പോയിന്റ് ട്രംപിന്റെ വിജയത്തിനായി പ്രവര്‍ത്തിച്ചിരുന്നു. 2016 ല്‍ ട്രംപ് റിപ്പബ്ലിക്കന്‍ സ്ഥാനാര്‍ത്ഥിത്വം നേടിയതിനുശേഷം ടേണിംഗ് പോയിന്റ് ആവേശത്തോടെ അദ്ദേഹത്തെ പിന്തുണച്ചിരുന്നു.

അതേസമയം കിര്‍ക്ക് പങ്കെടുക്കുന്ന പരിപാടിയെക്കുറിച്ച് കാമ്പസില്‍ ഭിന്നാഭിപ്രായങ്ങള്‍ ഉണ്ടായിരുന്നു. കിര്‍ക്കിനെ പങ്കെടുക്കുന്നതില്‍ നിന്ന് വിലക്കണമെന്ന് സര്‍വകലാശാല അഡ്മിനിസ്‌ട്രേറ്റര്‍മാരോട് ആവശ്യപ്പെടുന്ന ഒരു ഓണ്‍ലൈന്‍ ഹര്‍ജിയില്‍ ഏകദേശം 1,000 ഒപ്പുകള്‍ ലഭിച്ചു.

അമേരിക്കയില്‍ തുടര്‍ച്ചയായി രാഷ്ട്രീയ അക്രമം വര്‍ദ്ധിച്ചുവരുന്ന സാഹചര്യത്തിലാണ് കിര്‍ക്കിന്റെയും ദുരന്തം. ജൂണില്‍ മിനസോട്ട സംസ്ഥാന നിയമസഭാംഗത്തെയും ഭര്‍ത്താവിനെയും അവരുടെ വീട്ടില്‍ വെച്ച് കൊലപ്പെടുത്തിയതും, ഹമാസ് ബന്ദികളെ മോചിപ്പിക്കണമെന്ന് ആവശ്യപ്പെട്ട് കൊളറാഡോയില്‍ നടന്ന പരേഡില്‍ ബോംബാക്രമണം നടത്തിയതും, ഏപ്രിലില്‍ പെന്‍സില്‍വാനിയ ഗവര്‍ണറായ ജൂതന്റെ വീടിന് തീയിട്ടതും ആക്രമണങ്ങളില്‍ ഉള്‍പ്പെടുന്നു. കഴിഞ്ഞ വര്‍ഷം ഒരു പ്രചാരണ റാലിക്കിടെ ട്രംപിന് നേരെയും ആക്രമണം ഉണ്ടായിരുന്നു.