റേഷന്‍ പച്ചരി കഴുകിയപ്പോള്‍ നീലനിറം

മുണ്ടക്കയം: കൂട്ടിക്കല്‍ ഏന്തയാറ്റില്‍ റേഷന്‍ കടയില്‍ നിന്നും വാങ്ങിയ പച്ചരി കഴുകിയപ്പോള്‍ അരിയും വെള്ളവും നീല നിറത്തിലായതായി പരാതി. കൂട്ടിക്കല്‍ ഏന്തയാര്‍ സ്വദേശി നിരപ്പേല്‍ ബിജു തോമസിനാണ്‌ ഈ അനുഭവം നേരിട്ടത്‌. ഏന്തയാര്‍ അക്ഷയ സെന്ററിന്‌ സമീപം ഉള്ള റേഷന്‍ കടയില്‍ നിന്ന്‌ ഇന്നലെ രാവിലെയാണ്‌ അരി വാങ്ങിയത്‌.പൊടിക്കുന്നതിനായി കുറച്ച്‌ അരിയെടുത്ത്‌ കഴുകിയപ്പോഴാണ്‌ വെള്ളം നീല നിറമായത്‌. വൈകുന്നേരം ആയപ്പോഴേക്കും അരിക്കും നീലനിറം വന്നു. എന്താണ്‌ സംഭവിച്ചതെന്ന്‌ മനസ്സിലാവാതെ ഞെട്ടിയിരിക്കുകയാണ്‌ ബിജുവും കുടുംബവും. സംഭവത്തില്‍ സപ്ലൈക്കോ അധികൃതര്‍ക്ക്‌ ബിജു തോമസ്‌ പരാതി നല്‍കിയിട്ടുണ്ട്‌.