ഫരീദാബാദ് രൂപതക്ക് കീഴിലെ പള്ളിയിൽ ഏകീകൃത കുർബാന സംഘടിപ്പിച്ചില്ല; വിശ്വാസികൾ പങ്കെടുത്തത് ഓൺലൈനായി

ദില്ലി ഫരീദാബാദ് രൂപതക്ക് കീഴിലെ നിർമൽ ഹൃദയ പള്ളിയിൽ ഏകീകൃത കുർബാന സംഘടിപ്പിക്കാത്തതിനാൽ ഓൺലൈൻ കുർബാനയില്‍ പങ്കെടുത്ത് വിശ്വാസികൾ . വെസ്റ്റ് ദില്ലിയിലെ ടാ​ഗോർ ​ഗാർഡനിലെ പള്ളിയിലാണ് നിരവധി വിശ്വാസികൾ ഓൺലൈൻ കുർബാനയിൽ പങ്കെടുത്തത്.വിശ്വാസികള്‍ പള്ളിയില്‍ ബിഗ് സ്ക്രീനിലാണ് ഓണ്‍ലൈന്‍ കുര്‍ബാന കണ്ടത്.

കഴിഞ്ഞയാഴ്ച ഏകീകൃത കുർബാനയല്ല പള്ളിയിൽ സം​ഘടിപ്പിക്കുന്നതെന്ന് ആരോപിച്ച് വിശ്വാസികൾ പ്രതിഷേധിച്ചതിനെ തുടർന്ന് കുർബാന മുടങ്ങിയിരുന്നു. സിറോ മലബാര്‍ അൽമായ കൂട്ടായ്മ ഇന്ന് വൈകീട്ട് വാര്‍ത്താ സമ്മേളനം വിളിച്ചിട്ടുണ്ട്.

അതേസമയം കുര്‍ബാന തടസ്സപ്പെടുത്തുകയും വൈദികരെ കുര്‍ബാന ചൊല്ലാന്‍ അനുവദിക്കാതിരിക്കുകയും ചെയ്യുന്നവര്‍ക്കെതിരെ നടപടിയെടുക്കുമെന്നാണ് ഫരീദാബാദ് അതിരൂപത അറിയിച്ചിരിക്കുന്നത്. സിനഡ് നിര്‍ദേശിച്ച ഏകീകൃത കുര്‍ബാനയാണ് ഫരീദാബാദ് അതിരൂപതയില്‍ നടത്തുന്നത്.