വരും ദിവസങ്ങളില്‍ സംസ്ഥാനത്ത് വരണ്ട കാലാവസ്ഥ തുടരും; മലയോര മേഖലയിൽ ശൈത്യം

കേരളത്തിൽ വരും ദിവസങ്ങളിൽ മഴ മാറിനിൽക്കുമെന്നും വരണ്ട കാലാവസ്ഥ തുടരുമെന്നും കേന്ദ്ര കാലാവസ്ഥ വകുപ്പിൻ്റെ മുന്നറിയിപ്പ്. മലയോര മേഖലകളിൽ ശൈത്യം കഠിനമാകുമ്പോൾ സമതലങ്ങളിലും തണുപ്പ് അനുഭവപ്പെട്ടു തുടങ്ങിയിട്ടുണ്ട്.

മൂന്നാറിൽ താപനില 10 ഡിഗ്രി സെൽഷ്യസിനും താഴെയെത്തി. ജനുവരി 8 വരെ കടലിൽ ശക്തമായ കാറ്റിന് സാധ്യതയുള്ളതിനാൽ പ്രത്യേക ജാഗ്രത പാലിക്കണമെന്നും കാലാവസ്ഥാ കേന്ദ്രം അറിയിച്ചു.

സംസ്ഥാനത്ത് ശക്തമായ മഴയ്ക്ക് ശമനമായതായി കേന്ദ്ര കാലാവസ്ഥ വകുപ്പ് അറിയിച്ചു. എന്നാൽ പ്രാദേശികമായ മാറ്റങ്ങൾ കാരണം ഇന്ന് (ജനുവരി 4) ഇടുക്കി, പാലക്കാട് ജില്ലകളിൽ ഒറ്റപ്പെട്ട നേരിയ മഴയ്ക്ക് സാധ്യതയുണ്ട്. വരും ദിവസങ്ങളിൽ സംസ്ഥാനത്തുടനീളം വരണ്ട കാലാവസ്ഥയായിരിക്കും അനുഭവപ്പെടുക.

ഹൈറേഞ്ച് മേഖലകളിൽ ശൈത്യം കഠിനമായി തുടരുകയാണ്. മൂന്നാറിൽ കുറഞ്ഞ താപനില 8.3 ഡിഗ്രി സെൽഷ്യസായി രേഖപ്പെടുത്തി. അയൽ സംസ്ഥാനങ്ങളിലെ വിനോദസഞ്ചാര കേന്ദ്രങ്ങളായ കൊടൈക്കനാലിൽ 6.3 ഡിഗ്രി സെൽഷ്യസും ഊട്ടിയിൽ 7.6 ഡിഗ്രി സെൽഷ്യസുമാണ് ഇന്നത്തെ താപനില. സമതല പ്രദേശങ്ങളിലും രാത്രികാലങ്ങളിൽ തണുപ്പ് വർദ്ധിച്ചുവരുന്നുണ്ട്.

കേരള, കർണാടക, ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസ്സമില്ല. എന്നാൽ ജനുവരി 4 മുതൽ 8 വരെ തെക്കൻ തമിഴ്‌നാട് തീരം, ഗൾഫ് ഓഫ് മന്നാർ, കന്യാകുമാരി പ്രദേശം എന്നിവിടങ്ങളിൽ മണിക്കൂറിൽ 45 മുതൽ 65 കിലോമീറ്റർ വരെ വേഗതയിൽ ശക്തമായ കാറ്റിന് സാധ്യതയുണ്ട്. ബംഗാൾ ഉൾക്കടലിലും മോശം കാലാവസ്ഥ തുടരുന്നതിനാൽ ഈ പ്രദേശങ്ങളിൽ മത്സ്യത്തൊഴിലാളികൾ ജാഗ്രത പാലിക്കണം.

മഴ കുറവാണെങ്കിലും അന്തരീക്ഷ മാറ്റങ്ങൾക്കനുസരിച്ച് ഇടിമിന്നൽ സാധ്യതയുള്ളതിനാൽ സുരക്ഷാ മുൻകരുതലുകൾ സ്വീകരിക്കണം:

ഇടിമിന്നൽ തുടങ്ങുമ്പോൾ തന്നെ സുരക്ഷിതമായ കെട്ടിടത്തിനുള്ളിലേക്ക് മാറുക.
ജനലും വാതിലും അടച്ചിടുക, വൈദ്യുതോപകരണങ്ങളുടെ പ്ലഗുകൾ വിച്ഛേദിക്കുക.
അന്തരീക്ഷം മേഘാവൃതമാണെങ്കിൽ കുട്ടികൾ ടെറസിലോ തുറസായ സ്ഥലത്തോ കളിക്കുന്നത് ഒഴിവാക്കുക.
ഇടിമിന്നലുള്ളപ്പോൾ മരച്ചുവട്ടിൽ നിൽക്കുന്നതും വാഹനങ്ങൾ മരച്ചുവട്ടിൽ പാർക്ക് ചെയ്യുന്നതും ഒഴിവാക്കണം.
സൈക്കിൾ, ബൈക്ക് യാത്രക്കാർ സുരക്ഷിതമായ കെട്ടിടങ്ങളിൽ അഭയം തേടണം.