ഹൈദരാബാദിലെ ഫർണിച്ചർ ഷോപ്പിലെ തീപിടിത്തം; 5 മൃതദേഹങ്ങൾ കണ്ടെടുത്തു

ഹൈദരാബാദ് നാംപള്ളിയിലെ നാല് നില ഫർണിച്ചർ ഷോപ്പ് കെട്ടിടത്തിലുണ്ടായ തീപിടുത്തത്തിൽ രണ്ട് കുട്ടികളും ഒരു വൃദ്ധയും ഉൾപ്പെടെ അഞ്ച് പേർ മരിച്ചതായി അധികൃതർ അറിയിച്ചു. ശനിയാഴ്ച കെട്ടിടത്തിൽ വലിയൊരു തീപിടുത്തമുണ്ടായി. തുടർന്ന് ബേസ്മെന്റിൽ കുടുങ്ങിയ അഞ്ച് പേരെ രക്ഷിക്കാൻ രക്ഷാപ്രവർത്തനം ആരംഭിച്ചതായി അധികൃതർ അറിയിച്ചു.

"രണ്ട് ആൺകുട്ടികളുടെയും ഒരു വൃദ്ധയുടെയും മൃതദേഹങ്ങൾ ഉൾപ്പെടെ അഞ്ച് മൃതദേഹങ്ങൾ ഞായറാഴ്ച കെട്ടിടത്തിന്റെ നിലവറയിൽ നിന്ന് കണ്ടെടുത്തു," ഒരു മുതിർന്ന പോലീസ് ഉദ്യോഗസ്ഥൻ പിടിഐയോട് പറഞ്ഞു. ശ്വാസംമുട്ടിയാണ് ഇവർ മരിച്ചതെന്ന് സംശയിക്കുന്നു. എന്നിരുന്നാലും, മരണകാരണം പോസ്റ്റ്‌മോർട്ടത്തിന് ശേഷമേ വ്യക്തമാകൂ എന്ന് അവർ പറഞ്ഞു.

തീപിടിത്തത്തിന്റെ കാരണത്തെക്കുറിച്ച് ചോദിച്ചപ്പോൾ, അന്വേഷണം നടക്കുകയാണെന്ന് ഉദ്യോഗസ്ഥർ പറഞ്ഞു. കടയുടെ ഉടമയ്‌ക്കെതിരെ കേസെടുത്തിട്ടുണ്ടെന്നും ഉദ്യോഗസ്ഥർ കൂട്ടിച്ചേർത്തു.