ബെല്ലുഡി ഗ്രാമത്തില്‍ 9 ലക്ഷം രൂപ ചെലവിൽ ആടിന് സ്മാരകം പണിതു

കർണാടകയിലെ ഹരിഹർ താലൂക്കിലെ ബെല്ലുഡി ഗ്രാമത്തില്‍ 9 ലക്ഷം രൂപ ചെലവിൽ ആടിന് വേണ്ടി ഒരു ശില്പമുയർന്നു. ബെല്ലുഡി കാളി എന്നറിയപ്പെടുന്ന ഒരു ആടിന് വേണ്ടിയാണ് ഒരു ശിലാ സ്മാരകം ഉയര്‍ന്നത്.

ശിവമോഗ റോഡരികിലാണ് ഈ ശിലാ സ്മാരകം ഒരുക്കിയിരിക്കുന്നത്. ആടുകൾ തമ്മിലുള്ള പോരാട്ടങ്ങളിൽ ശ്രദ്ധേയമായ വിജയങ്ങൾ കൈവരിച്ച ബെല്ലുഡി കാളി (ബെല്ലുഡി റാം / റാം കാളി) , കർണാടകയിൽ മാത്രമല്ല, അയൽ സംസ്ഥാനങ്ങളിൽ പോലും ഏറെ പ്രശസ്തനാണ്. കനക ഗുരു പീഠത്തിന്‍റെ തലവൻ ശ്രീ നിരഞ്ജനാനന്ദപുരി സ്വാമി ജനുവരി 25 ന് സ്മാരകം ഉദ്ഘാടനം ചെയ്യും. ഈ അവസരത്തിൽ സൗജന്യ രക്തദാന ക്യാമ്പും സംഘടിപ്പിക്കുമെന്ന് ഭാരവാഹികൾ അറിയിച്ചു.

ആടിന്‍റെ ഉടമകളും സഹോദരന്മാരുമായ രാഘവേന്ദ്ര ഡി.കെ, മോഹൻ ഡി.കെ എന്നിവരും നാട്ടുകാരും ചേർന്നാണ് ബെല്ലുഡി കാളിക്ക് സ്മാരകം നിർമ്മിച്ചത്. ഇവിടെ എല്ലാ ദിവസവും പ്രാർത്ഥനകൾ നടത്തുമെന്നും സംഘാടകർ അറിയിച്ചു.