സുരക്ഷാസേനയുമായുണ്ടായ ഏറ്റുമുട്ടലില്‍ മൂന്ന് ഭീകരര്‍ കൊല്ലപ്പെട്ടു ; മരണമടഞ്ഞത് വിദേശപൗരന്മാര്‍

ജമ്മു കശ്മീരിലെ ശ്രീനഗറിനടുത്തുള്ള ലിദ്വാസില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ മൂന്ന് ഭീകരര്‍ കൊല്ലപ്പെട്ടതായി സൈന്യം അറിയിച്ചു. ഇന്ത്യന്‍ ആര്‍മിയുടെ ചിനാര്‍ കോര്‍പ്സിന്റെ ഔദ്യോഗിക എക്സ് അക്കൗണ്ടിലാണ് വിവരമുള്ളത്.

സുരക്ഷാ സേന ലിദ്വാസില്‍ ഓപ്പറേഷന്‍ മഹാദേവ് ആരംഭിച്ചതായി നേരത്തെ പോസ്റ്റ് ചെയ്തിരുന്നു. 'തീവ്രമായ വെടിവെപ്പില്‍ മൂന്ന് ഭീകരരെ നിര്‍വീര്യമാക്കി. ഓപ്പറേഷന്‍ തുടരുന്നു,' ഓപ്പറേഷന്‍ ഇതുവരെ അവസാനിച്ചിട്ടില്ലെന്ന് സൈന്യം ഒരു അപ്ഡേറ്റില്‍ പറഞ്ഞു.

കൊല്ലപ്പെട്ട മൂന്ന് ഭീകരരും 'ഉയര്‍ന്ന മൂല്യമുള്ള' ലക്ഷ്യങ്ങളാണെന്നും വിദേശ പൗരന്മാരാണെന്നും സ്രോതസ്സുകള്‍ പറഞ്ഞു. സൈന്യവും സിആര്‍പിഎഫും ജമ്മു കശ്മീര്‍ പോലീസും സംയുക്തമായാണ് ഓപ്പറേഷന്‍ നടത്തിയത്. രഹസ്യാന്വേഷണ വിവരത്തിന്റെ അടിസ്ഥാനത്തില്‍ സുരക്ഷാ സേന ഹര്‍വാനിലെ മുളനാര്‍ മേഖലയില്‍ ഓപ്പറേഷന്‍ ആരംഭിച്ചതായി റിപ്പോര്‍ട്ടുകള്‍ പറയുന്നു. പ്രദേശത്ത് രക്ഷാപ്രവര്‍ത്തനം നടത്തുകയും ചെയ്തിട്ടുണ്ട്.

ഏറ്റുമുട്ടലില്‍ കൊല്ലപ്പെട്ട മൂന്ന് 'ഉയര്‍ന്ന മൂല്യമുള്ള ഭീകരരുടെ' ഒളിത്താവളം ക്യാമറയില്‍ പതിഞ്ഞിട്ടുണ്ട്. തീവ്രവാദികള്‍ കുറ്റിക്കാട്ടില്‍ റൈഫിളുകളുമായി കിടക്കുന്നതിന്റെയും വസ്ത്രങ്ങള്‍, ഭക്ഷണം, പ്ലേറ്റുകള്‍ എന്നിവ ചിതറിക്കിടക്കുന്നതിന്റെയും ദൃശ്യങ്ങള്‍ സൈന്യം പുറത്തുവിട്ടിട്ടുണ്ട്.