"കിരണും ഞാനും ഒരുമിച്ച് ഹാപ്പിയാണെന്ന് എനിക്ക് നടിക്കാൻ കഴിയും; ജീവിതകാലം മുഴുവൻ അങ്ങനെ ജീവിക്കാം, പക്ഷേ അതൊരു നുണയാകും..." ആമീര്‍ ഖാന്‍

Aamir khan about marriage (Image Source: YouTube)

മിസ്റ്റര്‍ പെര്‍ഫക്ഷനിസ്റ്റായി എന്നും ബോളിവുഡ് സിനിമാപ്രേമികള്‍ ആരാധിക്കുന്ന താരമാണ് ആമിര്‍ ഖാന്‍. വ്യക്തി ജീവിതത്തില്‍ പല പ്രശ്നങ്ങളുണ്ടായിട്ടുണ്ടെങ്കിലും താരത്തിന്റെ നിലപാടുകളും കഥാപാത്രങ്ങളെ തെരഞ്ഞെടുക്കുന്ന രീതികളുമൊക്കെയാകാം ആ പേര് ഹിന്ദി ചലച്ചിത്ര ലോകം ആമീറിന് നല്‍കാനുള്ള കാരണം. ഒരുപാട് സിനിമകള്‍ വാരി വലിച്ചു ചെയ്യുന്നതിന് പകരം വളരെ സെലക്ടീവായി വര്‍ഷത്തില്‍ ഒന്നോ രണ്ടോ സിനിമ എന്ന കണക്കിലാണ് താരം അഭിനയിക്കുന്നത്.
ഇക്കഴിഞ്ഞ ദിവസങ്ങളില്‍ തന്റെ പുതിയ ചിത്രമായ സീതാരേ സമീൻ പറിന്റെ പ്രമോഷനിലാണ് ആമിർ ഖാൻ. ഈ സിനിമയുമായി ബന്ധപ്പെട്ട് പല വാര്‍ത്തകളും സോഷ്യല്‍ മീഡിയയില്‍ പ്രചരിച്ചിരുന്നു. താന്‍ അഭിനയം നിര്‍ത്തുന്നു എന്നതടക്കം ആമീര്‍ പറഞ്ഞതാണ് വൈറലായി മാറിയത്.
ഇപ്പോഴിതാ 59 കാരനായ താരം തന്റെ രണ്ട് വിവാഹമോചനങ്ങളെക്കുറിച്ചും ഗൗരിയുമായുള്ള നിലവിലെ ബന്ധത്തെക്കുറിച്ചും പറഞ്ഞ കാര്യങ്ങളാണ് ആരാധകര്‍ ഏറ്റെടുക്കുന്നത്. ഇന്ത്യയില്‍ വിവാഹം വളരെ ഗൗരവമാണെന്നും അതിനെ നിസ്സാരമായി കാണരുതെന്നും താരം പറഞ്ഞു.
‘‘ഇന്ത്യയില്‍ വിവാഹം വളരെ ഗൗരവമുള്ള ഒരു കാര്യമാണ്. നിങ്ങളുടെ ദാമ്ബത്യം തകരുമ്പോള്‍, നിങ്ങള്‍ വിവാഹമോചനത്തിലേക്ക് പോകുന്നു. ആളുകള്‍ക്ക് അത് ഇഷ്ടമല്ല. എനിക്കും അത് അറിയാം. വിവാഹം വളരെ പ്രധാനപ്പെട്ട ഒരു കാര്യമാണെന്നും അതിനെ നിസ്സാരമായി കാണരുതെന്നും ഞാൻ വിശ്വസിക്കുന്നു. ഞാൻ അതിനോട് പൂർണ്ണമായും യോജിക്കുന്നു. അതുകൊണ്ടാണ് എനിക്ക് ഈ കാര്യം ആളുകളുടെ മുന്നില്‍ സത്യസന്ധമായി അവതരിപ്പിക്കാൻ കഴിയുന്നത്.
ഞാൻ റീനയെ വിവാഹം കഴിച്ചിരുന്നു എന്ന കാര്യം സത്യമാണ്. പക്ഷേ ഞങ്ങള്‍ക്ക് ഇനി വിവാഹിതരായി തുടരാൻ കഴിയില്ല. ഞാൻ കിരണിനെ വിവാഹം കഴിച്ചിരുന്നു, ഇപ്പോള്‍ ഞങ്ങള്‍ക്കും ഇനി വിവാഹിതരായി തുടരാൻ കഴിയില്ല. ഇത് നമുക്കെല്ലാവർക്കും ഒരു നഷ്ടമാണ്. ഞങ്ങളുടെ കുടുംബങ്ങള്‍ ഇതില്‍ സന്തുഷ്ടരല്ല എന്ന് മാത്രമല്ല ഞങ്ങള്‍ അത് സന്തോഷത്തോടെ ചെയ്യുന്നതുമല്ല. സന്തോഷകരമായ ദാമ്പത്യജീവിതത്തിലാണെന്ന് നടിക്കുന്നത് സത്യസന്ധതയില്ലായ്മയാകുമായിരുന്നു.
കിരണും ഞാനും ഒരുമിച്ച്‌ സന്തോഷവാന്മാരാണ് എനിക്ക് നടിക്കാൻ കഴിയും. ഞങ്ങളുടെ ജീവിതകാലം മുഴുവൻ ഞങ്ങള്‍ക്ക് അങ്ങനെ തന്നെ ജീവിക്കാൻ കഴിയും. വ്യക്തിപരമായി, എനിക്ക് ഇഷ്ടമുള്ളത് എനിക്ക് ചെയ്യാൻ കഴിയും. അവള്‍ക്ക് അവള്‍ ആഗ്രഹിക്കുന്നത് ചെയ്യാൻ കഴിയും. പക്ഷേ ലോകത്തിന്റെ കണ്ണില്‍ ഞങ്ങള്‍ ഇപ്പോഴും വിവാഹിതരാണ്. പക്ഷേ അത് ഒരു നുണയായിരിക്കും...’’ ആമീര്‍ ഖാന്‍ പറയുന്നു.