അക്ഷയ് ഖന്നയെ പഞ്ചാരയടിക്കാന്‍ നോക്കി, പക്ഷേ അദ്ദേഹം എന്നോട് ഒരക്ഷരം മിണ്ടിയില്ല; വൈറലായി കങ്കണയുടെ വീഡിയോ

ധുരന്ധര്‍ നേടിയ വന്‍ വിജയത്തോടെ അക്ഷയ് ഖന്നയുടെ പ്രശസ്തിയും പതിന്മടങ്ങ് വര്‍ധിച്ചിരുന്നു. സോഷ്യല്‍ മീഡിയ റീലുകളില്‍ ട്രെന്റായി മാറുകയായിരുന്നു അക്ഷയ് ഖന്നയുടെ പ്രകടനവും ഡാന്‍സുമെല്ലാം. അക്ഷയ് ഖന്ന അഭിനയിച്ച് തകര്‍ത്ത പഴയ സിനിമകളും ഇതിനിടെ ചര്‍ച്ചകളിലേക്ക് കടന്നു വന്നു. അക്ഷയ് ഖന്നയെക്കുറിച്ച് നടി കങ്കണ റണാവത് പറഞ്ഞ വാക്കുകളും ചര്‍ച്ചയായി മാറുകയാണ്.

മുമ്പൊരിക്കല്‍ കോഫി വിത്ത് കരണില്‍ അതിഥിയായി എത്തിയപ്പോള്‍ കങ്കണ പറഞ്ഞ വാക്കുകളാണ് ചര്‍ച്ചയാകുന്നത്. കങ്കണയ്‌ക്കൊപ്പം അനില്‍ കപൂര്‍, സഞ്ജയ് ദത്ത് എന്നിവരും അതിഥികളായി എത്തിയിരുന്നു. തങ്ങള്‍ അഭിനയിച്ച നോ പ്രോബ്ലം എന്ന സിനിമയുടെ പ്രൊമോഷന് വേണ്ടിയായിരുന്നു മൂവരുമെത്തിയത്.

ആരോടെങ്കിലും ഫ്‌ളേര്‍ട്ട് ചെയ്യാന്‍ ശ്രമിച്ചിട്ടും മറുപടി ലഭിക്കാതെ പോയിട്ടുണ്ടോ എന്നായിരുന്നു കരണിന്റെ ചോദ്യം. ഉണ്ടെന്നും അത് അക്ഷയ് ഖന്നയായിരുന്നുവെന്നാണ് കങ്കണ നല്‍കിയ മറുപടി. ഇത് കേട്ടതും ഒപ്പമുണ്ടായിരുന്ന അനിലും സഞ്ജയ് ദത്തും പൊട്ടിച്ചിരിച്ചു. ഇക്കാര്യം കങ്കണ തന്നോട് പറഞ്ഞിട്ടുണ്ടെന്ന് അനില്‍ കപൂറും കൂട്ടിച്ചേര്‍ത്തു.

'ഞാന്‍ ആദ്യം അദ്ദേഹത്തോട് സംസാരിക്കാന്‍ ശ്രമിച്ചു. പിന്നീട് ഫ്‌ളേര്‍ട്ട് ചെയ്യാന്‍ ശ്രമിച്ചു. പക്ഷെ അദ്ദേഹം എന്നോട് ഒരു വാക്ക് പോലും സംസാരിച്ചില്ല. അദ്ദേഹം സംസാരിക്കില്ല. അദ്ദേഹം ആരോടും സംസാരിക്കാറില്ല' എന്നാണ് കങ്കണ പറഞ്ഞത്. അതേസമയം അക്ഷയ് ഖന്ന തന്നോട് സംസാരിക്കാറുണ്ടെന്നും തന്റെ അനിയനെ പോലെയാണെന്നും അനില്‍ കപൂര്‍ പറഞ്ഞു.

in Coffee with Karan #KanganaRanaut reveals she once tried flirting with #AkshayeKhanna, but he was completely in hi won world and he didn't even notice her. pic.twitter.com/BccEj0twm6— आदेश 🚩 (@ADfanatic_New) February 8, 2026

ഈ വിഡിയോ സോഷ്യല്‍ മീഡിയയില്‍ വൈറലായി മാറുകയാണ്. നേരത്തെ താന്‍ എന്തുകൊണ്ട് വിവാഹം കഴിച്ചില്ലെന്ന ചോദ്യത്തിന് അക്ഷയ് മറുപടി നല്‍കിയിരുന്നു. താന്‍ വിവാഹത്തിന് പറ്റിയ ആളാണെന്ന് തോന്നിയിട്ടില്ലെന്നും അതിനാലാണ് ഇപ്പോഴും അവിവാഹിതനായി തുടരുന്നതെന്നുമാണ് അക്ഷയ് ഖന്ന പറഞ്ഞത്.